રેસિપિ / કરી લો ગણેશ ચતુર્થીની તૈયારીઃ ગજાનનને પ્રિય છે આ ખાસ લાડુ, ધરાવો ઘરે બનાવેલો પરંપરાગત શુદ્ધ ભોગ

• આવી રહ્યો છે ગણેશચતુર્થીનો તહેવાર
• જાણો સાચા માપ સાથે ચુરમાના લાડુ બનાવવાની રીત
• ગજાનનને પ્રિય છે આ પરંપરાગત લાડુનો ભોગ

ગણેશ ચતુર્થીનો તહેવાર નજીકમાં છે ત્યારે તમે પણ દૂંદાળા દેવને પ્રસન્ન કરવા માટેની તૈયારી કરી રહ્યા હશો. તો આ સમયે તમે તેમનો પ્રિય પ્રસાદ બનાવીને તેમને ખુશ કરી શકો છો. જો તમે યોગ્ય માપથી ચુરમના લાડુ બનાવો છો તો તે ખૂબ જ સરસ બને છે. તો જાણી લો સાચું માપ અને બનાવી લો ગણેશજી માટે આ ખાસ પ્રસાદ ઘરે જ.

ચુરમાના લાડુ

સામગ્રી

• ૧ કિલો ઘઉં નો જાડો લોટ
• ૫૦૦ ગ્રામ દેશી ઘી
• ૨૫૦ ગ્રામ ગોળ
• કાજુ, બદામ, ઈલાયચી, કિસમિસ
• તળવા માટે તેલ અથવા ઘી
• ખસખસ

આ રીતે બનાવી લો લાડુ

સૌ પ્રથમ ઘઉંના જાડા લોટમાં મુઠી પડતું ઘીનું મોણ નાખી સહેજ હુંફાળા પાણીથી કઠણ લોટ બાંધો. પછી તેના મુઠીયા વાળો. મુઠીયા દબાવીને વળી શકાય એવો કઠણ લોટ બાંધવો. પછી મુઠીયા તળવા માટે ઘી અથવા તેલ મૂકવું. એકદમ ધીમા તાપે મુઠીયા તળવા જેથી અંદર કાચા ના રહે. બધા મુઠીયા તળાયા પછી ઠંડા કરી મિક્સરમાં પીસી (દરદરા) લેવા. મુઠીયા પીસતી વખતે છેલ્લે તેમાં થોડી ઈલાયચી પણ સાથે પીસી લેવી. ત્યારબાદ તૈયાર થયેલા ભુકામાં કાજુ, બદામ, કિસમિસના ટુકડા ભેળવી તૈયાર કરવું. ત્યારબાદ એક કઢાઈમાં ઘી ગરમ મૂકવું. તેમાં ગોળનો ચૂરો કરી નાખવો અને હલાવવું. જયારે ગોળ બધો ઓગળી જાય અને ફૂલીને ઉપર આવી જાય ત્યારે તરત જ ગોળ ઘીનું મિશ્રણ મુઠીયાના ભુકામાં રેડી દેવું. હવે તવેથાથી બરાબર હલાવી ભેળવી દેવું. થોડું ઠંડુ થાય એટલે માપસરના લાડુ વાળી લેવા અને ઉપર ખસખસ લગાવતા જવું. આ રીતે તૈયાર થઈ જશે તમારા ચુરમાના લાડુ.