સામાન્ય રીતે પરાઠા એવી વાનગી છે જેને તમે બ્રેકફાસ્ટ, લંચ, ઈવનિંગ સ્નેક્સ કે ડિનર ગમે તે સમયે માણી શકો છો. તો તમે પણ આજના મેનુમાં ક્યાંય પણ આ આલુ પ્યાઝ પરાઠાને સામેલ કરો તે જરૂરી છે.
સૌપ્રથમ બટાકાને ધોઈને સાફ કરીને તેના ચાર કટકા કરી લો. હવે પ્રેશર કૂકરમાં બટાકા, મીઠું અને થોડું પાણી ઉમેરીને ચાર સીટી વગાડી લો. આ દરમિયાન પરાઠા માટેની સોફ્ટ કણક તૈયાર કરી લો. તેના માટે લોટ ઘઉંના લોટમાં મોણ અને મીઠું ઉમેરીને બરાબર મિક્સ કરી લો. ત્યારબાદ તેમાં જરૂર પૂરતું પાણી ઉમેરીને એકદમ સોફ્ટ કણક તૈયાર કરો. હવે જ્યાં સુધી સ્ટફિંગની તૈયારી કરીએ ત્યાં સુધી તેને ઢાંકીને એકબાજુ મૂકી દો. હવે કૂકર ઠંડુ થઈ ગયું હોય તો તેને ખોલીને બટાકામાંથી પાણી નીતારી લો. બટાકાને છોલીને તેનો છુંદો કરી લો. હવે એક નોનસ્ટિક પેનમાં બે ચમચી તેલ ગરમ કરો. તેલ ગરમ થાય એટલે તેમાં જીરું ઉમેરો. જીરું લાલ થાય એટલે તેમાં સમારેલી ડુંગળી અને લીલા મરચા ઉમેરીને સાંતળો. એકાદ મિનિટ સાંતળ્યા બાદ તેમાં હળદર અને મીઠું ઉમેરીને બરાબર મિક્સ કરી લો. ડુંગળી લાઈટ બ્રાઉન રંગની થાય એટલે તેમાં બટાકાનો છુંદો કરેલો માવો ઉમેરીને બરાબર મિક્સ કરી લો. બધી જ સામગ્રી એકરસ થઈ જાય એટલે ગેસ બંધ કરીને પુરણને ઠંડું થવા દો. હવે એક નોનસ્ટિક તવાને ગરમ કરો. તવીને ધીમા તાપે ગરમ થવા દો. આ દરમિયાન તૈયાર કરેલની કણકમાંથી લુઓ લઈને તેની જાડી પુરી વળી લો. હવે તેમાં એકાદ ચમચી જેટલું પુરણ ભરીને તેને કચોરીની જેમ સીલ કરી દો. ત્યારબાદ તેને હાથેથી જ દબાવીને પરાઠાને થોડો વણી લો. હવે તેને અટામણમાં રગદોળીને પરાઠું વણી લો. નોનસ્ટિક તવી પર થોડું તેલ લગાવીને પરાઠાને બંને બાજુથી શેકી લો. બંને બાજુથી લાઈટ બ્રાઉન રંગના થાય પરાઠા એ રીતે શેકો. ગરમા-ગરમ પરાઠાને દહીં અને ચટણી સાથે સર્વ કરો.