સંયુક્ત રાષ્ટ્રસંઘમાં ભારત દુનિયાના દેશોને કોલસાના ફેઝ આઉટને બદલે ફેઝ ડાઉનમાં સામેલ કરવા માટે મનાવવા સફળ રહ્યો છે. આ મુદ્દે સંમતિ મળ્યાં બાદ આખરે ભારતે COP26ના ડ્રાફ્ટને ટેકો આપી દીધો જેને લગભગ 200 દેશોએ સર્વસંમતિ આપી દીધી છે.
કોલસાને ધરમૂળથી ખતમ કરવાને બદલે ધીરે ધીરે તેનો ઉપયોગ ઓછો કરવાની દરખાસ્ત યુએને સ્વીકારી
ભારતે ક્લાઈમેટ ચેન્જને પહોંચી વળવા કોલસાને ધરમૂળથી ખતમ કરવાને બદલે ધીરે ધીરે તેનો ઉપયોગ ઓછો કરવાની દરખાસ્ત કરી હતી અને તેને ટેકો આપ્યો હતો તથા દુનિયાના દેશો તેની આ વાત સ્વીકારે તેવો આગ્રહ સેવ્યો હતો. ભારતનો આ આગ્રહ કામ આવ્યો છે અને આજે દુનિયાના દેશોએ ભારતની આ માગમાં હામી ભરી દીધી છે.
1.5 ડિગ્રી સેલ્સિયસ તાપમાન રાખવાનું લક્ષ્ય
ગ્લોબલ વોર્મિંગને 1.5 ડિગ્રી સેલ્સિયસ સુધી ઘટાડવાના લક્ષ્યને આ કરારમાં રાખવામાં આવ્યું છે તેમાં ભારત અને ચીન અંતિમ સમયે કોલસા અને જીવાશ્મ ઈંધણને તબક્કાવાર રીતે ખતમ કરવાને બદલે તેનો ઉપયોગ ઘટાડો કરવાની વાત દુનિયાને સમજાવી શક્યો છે. ગ્લાસગો ક્લાઈમેટ ચેન્જ કરાર હેઠળ તમામ દેશ 2030 સુધી તેના હાલના ઉત્સર્જન લક્ષ્યો પર ફરી વાર વિચાર પર તૈયાર થયા છે.
આપણે હજુ ઘણું બધું કરવાની જરુર
સંયુક્ત રાષ્ટ્રના મહાસચિવ એન્ટોનિયો ગુટેરેસ દ્વારા સંયુક્ત રાષ્ટ્રજળવાયુ પરિવર્તન પરિષદને એક મોટું પગલું ગણાવ્યું હોવા છતાં તેમણે વિશ્વને વધતી જતી આબોહવા કટોકટીની ચેતવણી પણ આપી છે. અમેરિકાના ક્લાઈમેટ ચેન્જ વિભાગના વડા જ્હોન કેરીએ જણાવ્યું હતું કે આબોહવા પરિવર્તન પરનો કરાર અંતિમ નથી. આપણે હવે ઘણું બધું કરવાની જરૂર છે.