એક્શન / PFI પર પ્રતિબંધ બાદ વડોદરામાં ATSની મોટી કાર્યવાહી, મદ્રસા-એ-હિફઝુલ ઇમામ સંસ્થાની બિલ્ડિંગ સીલ, આયેશા મસ્જિદમાં પણ કાર્યવાહી

• વડોદરામાં ATSની મોટી કાર્યવાહી 
• બાવામાનપુરાની આયેશા મસ્જિદમાં કાર્યવાહી 
• NIAના ઇનપુટને પગલે વડોદરામાં સર્ચ 

NIAના ઇનપુટને પગલે વડોદરામાં સર્ચ ઓપરેશન હાથ ધરવામાં આવ્યું છે. શહેરના બાવામાનપુરા વિસ્તારને કોર્ડન કરીને કાર્યવાહી હાથ ધરવામાં આવી છે. આ વિસ્તારમાં આવેલી આયેશા મસ્જિદમાં કાર્યવાહી ચાલું છે.  મદ્રસા-એ-હિફઝુલ ઈમામ સંસ્થાની બિલ્ડિંગને સીલ કરવામાં આવી છે. સૂત્રોના જણાવ્યા અનુસાર, મૌલવીની પૂછપરછ ચાલી રહી છે. ઓલ ઈન્ડિયા ઇમામ કાઉન્સિલની બેઠક મદ્રસા-એ-હિફઝુલ ઈમામ સંસ્થામાં મળી હતી.

NIA એજન્સીની માહિતીના આધારે ATS ની ટીમે પાડ્યા દરોડાઃ સૂત્ર
સૂત્રો દ્વારા જણાવવામાં આવ્યું છે કે, પોલીસે સંસ્થામાંથી 3 વ્યક્તિની ધરપકડ કરી છે. એટીએસની ટીમે NIA એજન્સીની માહિતીના આધારે દરોડા પાડ્યા છે. એટીએસએ મદ્રસાએ હિફઝુલ ઈમામ ઓફિસમાંથી મહત્વના દસ્તાવેજો પણ જપ્ત કર્યા છે. તો મદ્રસા-એ-હિફઝુલ ઇમામ સંસ્થાની બિલ્ડિંગ સીલ કરી છે.

પીએફઆઇ પર પ્રતિબંધ
અત્રે ઉલ્લેખનીય છે કે, દરોડા અને ધરપકડ બાદ ગત 28 સપ્ટેમ્બરે કેન્દ્ર સરકારે પોપ્યુલર ફ્રન્ટ ઓફ ઇન્ડિયા એટલે કે પીએફઆઇ અને તેની સાથે જોડાયેલા 8 સંગઠનો પર પ્રતિબંધ લગાવી દીધો છે. કેન્દ્રીય ગૃહ મંત્રાલયે આ માટે નોટિફિકેશન જાહેર કર્યું હતું. આ પ્રતિબંધ ગેરકાયદેસર પ્રવૃત્તિ નિવારણ અધિનિયમ (UAPA) હેઠળ લાદવામાં આવ્યો છે. 

કેટલા સંગઠનો પર આરોપ?
ગૃહ મંત્રાલયના નોટિફિકેશન અનુસાર, પીએફઆઈ ઉપરાંત તેની આઠ સહયોગી સંસ્થાઓ - રિહેબ ઈન્ડિયા ફાઉન્ડેશન (RIF), કેમ્પસ ફ્રન્ટ ઓફ ઈન્ડિયા (CFI), ઓલ ઈન્ડિયા ઈમામ કાઉન્સિલ (AIIC), નેશનલ કોન્ફેડરેશન ઓફ હ્યુમન રાઇટ્સ ઓર્ગેનાઇઝેશન (NCHRO), નેશનલ વિમેન્સ ફ્રન્ટ (NWF), જુનિયર ફ્રન્ટ, એમ્પાવર ઇન્ડિયા ફાઉન્ડેશન અને રિહેબ ફાઉન્ડેશન, કેરળ પર પણ પ્રતિબંધ મૂકવામાં આવ્યો છે.

PIFના નેતા આતંકવાદી ગતિવિધિઓમાં સામેલઃ વિક્રમ સિંહ
યુપીના પૂર્વ ડીજીપી વિક્રમ સિંહે કહ્યું હતું કે, પીએફઆઈ અને તેની સાથે જોડાયેલા લોકો દેશમાં આતંકવાદી ગતિવિધિઓમાં સામેલ છે. કેટલાક સભ્યો હિંસા સાથે સંકળાયેલા છે, કેટલાક ભંડોળ એકત્ર કરવામાં સામેલ થયા છે, કેટલાક સરકાર વિરુદ્ધ કાવતરું ઘડવામાં રોકાયેલા છે અને કેટલાક આંતરરાષ્ટ્રીય આતંકવાદી સંગઠનો સાથે સંકળાયેલા છે. આવી સ્થિતિમાં, આ સભ્યો પર યુએપીએ, આઈપીસી અને પીએમએલએ હેઠળ આરોપ મૂકવામાં આવશે.