તાસીર / સર્વે મુજબ હેલ્ધી અને શાંત જીવન માટે પારિવારીક સંબંધો સાચવવા ખૂબ મહત્વના...

સર્વે કહે છે.. 

એક સર્વે અનુસાર  ૩૦ ટકા લોકોને અંગત સબંધ સાચવવામાં રસ છે જ્યારે ૨૦ ટકા લોકો એવુ માને છે કે, જીવનમાં ગમે તેટલા આગળ વધીએ પરંતુ રીલેટીવ વીનાનું જીવન નકામુ છે. જ્યારે સાડાસાત ટકા લોકો કોઇ પણ ભોગે સબંધોને હંમેશા જીવંત રાખવા માંગે છે. પરંતુ ૪૩ ટકા લોકો એવુ માની રહ્યા છે કે સબંધ નીભાવવા  જોઇએ. પણ એટલી હદે પણ નહી કે પાછળથી તમને એમ લાગે કે કાશ મે આમ ના કર્યુ હોત તો સારૂ. 

શું કહે છે ડોક્ટર..

આ વીશે વાત કરતા ડોક્ટર દિપક વ્યાસ કહે છે કે, “કોઇ પણ સબંધને ટકાવી રાખવા માટે આત્મમંથન કરવુ જરૂરી છે. એવા કયા ગુણ પોતાની અંદર છે જેના કારણે તમારા સાથી કે અન્ય સહકર્મી તમારી સાથે જોડાઇ રહેવાનું પસંદ કરે. પોતાને પારખવા માટે સ્વયંમ સિવાય કોઇ ઉત્તમ નથી. મારી પાસે એવા ઘણા કેસ આવે છે જે કારણ વગર ડીપ્રેશનથી પીડાતા હોય છે. એટલે કે નાની અમથી વાતને ઘણું મોટુ સ્વરૂપ આપીને પોતાની જાતને બીજાની સાથે સરખાવતા અથવા તો બીજા મારા વીશે આવુ જ વિચારે છે જેવી ખોટી માન્યતામાં રહીને ડીપ્રેશનનો ભોગ બની જતા હોય છે. જેના કારણે એક બે નહી પણ ઘણા બધા સબંધો દાવ પર લાગી જાય છે. ઘણીવાર તો ત્યાં સુધી કે પાંચ સાત વર્ષના બાળકને પણ પોતાની માતાનો સ્વભાવ પસંદ નથી પડતો.  અહીં એક વાત ઉલ્લેખવી જરૂરી છે કે પુરૂષોની સરખામણીમાં મહિલાઓમાં આવા કેસ વધુ જોવા મળે છે. પરિવાર સાથે થોડી વાતચીત, સબંધો પ્રત્યે ઇમાનદારી રાખવાથી કોઇ પણ પ્રશ્નોનું નિરાકરણ લાવી શકાય છે.”

અહીં વાત માત્ર પતી-પત્ની નથી પરંતુ એવા દરેક રીલેશન જે તમારા જીવનને સ્પર્શ કરે છે. હું છુ તુ તારે ચીંતા ના કર એવુ કહેનાર કોઇ ના હોય ત્યારે હિંમતથી આગળ વધવાની ઝંખના મરી પરવારે છે. માટે જ સબંધને સાચવતા અને તેમાં જીવતા શીખવુ તે જીવનનું પહેલુ અધ્યન છે.

સબંધને જીવંત રાખવા આત્મ વિશ્લેષણ જરૂરી

ઇમાનદારઃ

કોઇ પણ સબંધને દીર્ધકાલીન સુધી કાયમી રાખવા માટે જરૂરી છે કે સબંધોમાં ઇમાનદારી હોય. ઇમાનદારીના કારણે લોકોનો વિશ્વાસ આપણા પર ટકી રહે છે. ખોટુ બોલનાર અને ખોટુ કરનારા લોકો પર કોઇ જલ્દી વિશ્વાસ નથી કરતા પછી તે ઘરના સદસ્ય હોય કે બહારના લોકો હોય. 

સ્પષ્ટ વાતચીતઃ 

સબંધ એ ભુલ નથી માટે તેને દિલથી નિભાવવી જોઇએ. કોઇની વાત ગમતી ના હોય તો તેને સ્પષ્ટ કહેવુ જરૂરી છે. તે મારા વિશે શુ વિચારશે તેમ સમજવાથી સબંધોમાં કડવાશ આવે છે અને અંતે સબંધ પર પુર્ણ વિરામ આવી જાય છે. 

નિડરતાઃ 

 સબંધને સાચવવા માટે નિડર હોવુ પણ અનિવાર્ય છે. મિત્રમાં કોઇ અવગુણ છે તો નિડરતાથી તેને જણાવો અને તેને દુર કરવામાં મદદ પણ કરો. સબંધને તોડી નાંખવાથી મિત્ર ગુમાવવાની સાથે એ પણ સાબિત થાય છે કે સબંધ સાચવવામાં તમે નિડર નથી.

આશા જીવંત રાખોઃ 

જીવનમાં હારીને બેસી જવુ તે કાયર લોકોની નિશાની છે. જાતથી હારી બેસનાર લોકો ઘણીવાર નજીકના સબંધોને પણ ગુમાવી બેસતા હોય છે. કારણ કે નિરાશા આવવાથી કોઇ પણ સબંધને સમજવાનો પ્રયત્ન કરી શકાતો નથી. જેના કારણે આપણે જાતે જ આપણા લોકોથી દુર થતા જઇએ છીએ. માટે આશાને હંમેશા જીવંત રાખવુ જરૂરી છે.

પારિવારીક સબંધઃ 

જેમ આપણે પોતાના પરિવાર સાથે સબંધ નિભાવીએ છીએ તેવી જ રીતે આપણા સાથીદારના પરિવાર સાથે પણ સબંધ નિભાવવા જોઇએ. દરેક સબંધને માન આપો.