પંચમહાલ જિલ્લામાં છેલ્લા 48 કલાકથી ધીમીધારે વરસાદ વરસી રહ્યો છે. જિલ્લામાં વરસાદ આવતા ડેમમાં પાણીની આવકમાં વધારો છે. મહત્વનું છે કે પંચમહાલમાં પાનમ અને હડફ ડેમ આવેલા છે. વરસાદ આવતા ડેમમાં પાણી સંગ્રહ ક્ષમતાના 90% જેટલા ભરાયા છે. ત્યારે હવે પાનમ ડેમની હાલની જળસપાટી 126.05 મીટરે પહોંચી છે. આ ડેમની ભયજનક સપાટી 127.41 મીટર છે.
હાલ ડેમમાં 14 હજાર 950 ક્યૂસેક પાણીની આવક થઈ રહી છે. તો બીજી તરફ હડફ ડેમમાં પણ હાલ 3000 ક્યૂસેક પાણીની આવક થઈ રહી છે. પાણીની આવક થતા ડેમનો 1 દરવાજો 2 ફૂટ સુધી ખોલવામાં આવ્યો છે. ડેમમાંથી 2658 ક્યૂસેક પાણી હડફ નદીમાં છોડવામાં આવી રહ્યું છે. હડફ ડેમની હાલની જળસપાટી 165.45 મીટર છે. આ ડેમની ભયજનક સપાટી 167 મીટર છે.
તો આ તરફ મહિસાગર જિલ્લામાં ધોધમાર વરસાદ વરસી રહ્યો છે. મહિસાગરના કડાણામાં વરસાદ આવતા કડાણા ડેમમાં પાણીની આવકમાં વધારો થયો છે. ડેમમાં પાણીની આવક થતા હાલ જળસપાટી 397.4 ફૂટ પર પહોંચી છે. હાલમાં ડેમમાં પાણીની 1 લાખ 80 હજાર ક્યુસેક પાણીની આવક થઈ રહી છે. ભારે વરસાદ આવતા દર કલાકે ડેમની સપાટીમાં 6થી 7 ઈંચનો વધારો થયો છે.
ઉલ્લેખનીય છે કે ઉપરવાસમાં ભારે વરસાદને પગલે સુરતના ડેમો ઓવરફ્લો થયા છે. ભારે વરસાદ આવતા હથનુર ડેમ ઉકાઈ ડેમ આમલી ડેમ કાકરાપાર ડેમ અને માંડવીનો લાખી ડેમ ઓવરફ્લો થયો છે. માંડવીનો લાખી ડેમ ઓવરફ્લો થતા ખેડૂતોમાં ખુશીનો માહોલ જોવા મળ્યો છે.
ડેમ ઓવરફ્લો થતાં જિલ્લા કલેક્ટર દ્વારા 4 ગામોને હાઈએલર્ટ કરવામાં આવ્યા છે. જ્યારે 20 જેટલા ગામોને એલર્ટ કરવામાં આવ્યા છે. 4 વર્ષમાં પહેલી વખત લાખી ડેમ ઓવરફ્લો થતા ખેડૂતોમાં ખુશીનો માહોલ જોવા મળ્યો છે.