ધજાગરા / VIDEO : મહીસાગરમાં ભાજપ ધારાસભ્ય સહિતના હોદ્દેદારોનો દારૂ પાર્ટીનો કથિત વીડિયો વાયરલ, રાજકીય કાવાદાવાની ચર્ચા

• મહિસાગર જિલ્લામાં દારૂની પાર્ટીનો વીડિયો વાયરલ
• ભાજપના MLA સહિત હોદ્દેદારો હોવાની સોશિયલ મીડિયામાં ચર્ચા
• વાયરલ વીડિયો અંગે VTV કોઈ પુષ્ટિ કરતું નથી

તાજેતરમાં મહિસાગરના જિલ્લાના કેટલાંક રાજકીય કાર્યકર્તાઓ દારૂની મહેફિલ માણી રહ્યાં હોવાનો એક વીડિયો સોશિયલ મીડિયામાં વાયરલ થયો છે. આ કાર્યકર્તાઓ ભાજપના કાર્યકરો હોવાની ચર્ચા ચાલી રહી છે. વાયરલ વીડિયોમાં કેટલાંક યુવાનો દારૂની મહેફિલ માણતા નજરે ચડી રહ્યાં છે. જો કે, કોઇ ચોક્કસ નેતાને બદનામ કરવાના હેતુથી આ વીડિયો વાયરલ કરાયો હોવાની ચર્ચા ચાલી રહી છે. તમને જણાવી દઇએ કે, આ વીડિયો ક્યાંનો અને ક્યારનો છે અગે VTV કોઇ પુષ્ટિ નથી કરી રહ્યું.

રાજકીય કાર્યકર્તાઓ પણ ભાજપના કાર્યકર્તાઓ હોવાની ચર્ચા

મળતી માહિતી અનુસાર, આ વાયરલ વીડિયો મહિસાગરના જિલ્લાનો હોવાનું કહેવાઇ રહ્યું છે તેમજ રાજકીય કાર્યકર્તાઓ પણ ભાજપના કાર્યકર્તાઓ હોવાની ચર્ચા ચાલી રહી છે. ફોટા અને વીડિયો વાયરલ થતા રાજકીય કાવાદાવા હોવાની ચર્ચા ચાલી રહી છે. જો કે, આ વીડિયો વાયરલ થતા રાજકીય વર્તુળમાં પણ ભારે હડકંપ મચી જવા પામ્યો છે.

સોશિયલ મીડિયા પર વાયરલ વીડિયોમાં રિસોર્ટમાં યોજવામાં આવેલી પાર્ટીમાં કેટલાંક કાર્યકર્તાઓ દારૂના નશામાં ધૂત જોવા મળી રહ્યાં છે અને દારૂની મહેફિલમાં સંગીતના તાલે ઝૂમી રહ્યાં છે. એક તરફ ગીતો વાગી રહ્યાં છે તો બીજી બાજુ હાથમાં દારૂના ગ્લાસ રાખીને મન મૂકીને DJના તાલ પર આ યુવાનો ઝૂમી રહ્યાં છે. જો કે, હવે જોવાનું એ રહ્યું કે, આખરે આ ઘટનાને લઇને આગળ પોલીસ શું કાર્યવાહી કરે છે?