એક્શન / રૂપાણી સરકાર હચમચી ગઈ : મહીસાગરમાં ઘરમાં જ ચાલતા ગર્ભપાત રેકેટનો પર્દાફાશ થતાં નીતિન પટેલ દોડતા થયા

• સંતરામપુર ખાતે ગર્ભપાતના વીડિયોનો મામલો
• DyCM નીતિન પટેલનું નિવેદન 
• યોગ્ય પગલા લેવાના આપ્યા નિર્દેશ

મહિસાગરના સંતરામપુરમાં મહિલાના પેટમાં જ બાળકની હત્યા કરવાનો વીડિયો સામે આવ્યો બાદ સમગ્ર ગુજરાત હચમચી ઉઠ્યું છે. સામે આવેલ વીડિયો સ્પષ્ટ રીતે દેખાઈ રહ્યું છે કે, નાની ઉંમરની યુવતીના પેટમાં રહેલા બાળકને સ્થાનિક મહિલાઓ દ્વારા જ ગર્ભપાત કરાવવામાં આવી રહ્યો છે ત્યારે આ મામલે ગુજરાત સરકાર પણ એક્શનમાં આવી છે અને રાજ્યના નાયબ મુખ્યમંત્રી નિતીન પટેલે કડક પગલાના આદેશ આપ્યા છે. 

યોગ્ય પગલા લેવાના આપ્યા આદેશ 

રાજ્યના નાયબ મુખ્યમંત્રીએ ગર્ભપાતનો વીડિયો સામે આવ્યાની ઘટનાને લઈને નિવેદન આપ્યું હતું કે, કોઈપણ સ્થળે ગર્ભપાત કરવો એ રાજ્યમાં ગેરકાયદેસર છે અને સમગ્ર મામલે તપાસ કરીને યોગ્ય પગલાં લેવાશે. 

શું છે સમગ્ર મામલો ? 

મહિસાગરના સંતરામપુરમાં અનેક જગ્યાએ મંજૂરી વિના ગર્ભપાત કરવામાં આવી રહ્યા છે. તેવી માહિતી સામે આવી છે. સાથેજ વીડિયો પણ સંતરામપુરનો હોવાનું સામે આવ્યું છે. જે વીડિયો સામે આવ્યો છે. તેમા 4 મહિલાઓ ગર્ભવતી મહિલાનો ગર્ભપાત કરી રહી છે.  સંતરામપુરમાં અનેક જગ્યાએ ગર્ભપાતનું રેકેટ ચાલી રહ્યું છે. જેના કારણે લોકોમાં હવે રોષ ફેલાયેલો છે. અહીયા ગર્ભવતી મહિલાઓને હોસ્પિટલમાંથી ઈન્જેકશન આપીને અન્ય જગ્યાએ લઈ જવામાં આવે છે. જેમા મોટા ભાગે અવાવરુ જગ્યાએ લઈ જઈને તેમનો ગર્ભપાત કરવામાં આવતો હોય છે. 

આરોગ્ય વિભાગ અજાણ 

ઉલ્લેખનીય છે કે રહેણાંક મકાન ભાડેથી લઈને મહિલાઓના ગર્ભપાત કરવામાં આવી રહ્યા છે તેવી માહિતી સામે આવી છે. બીજી તરફ આ મામલે આરોગ્ય વિભાગનું કહેવું છે કે તેમની પાસે કોઈ માહિતી નથી. ત્યાારે લોકોની માગ છે કે આ રેકેટ પાછળ સંકળાયેલા લોકોની ધરપકડ કરવામાં આવે.