ખેર નથી / મહેન્દ્ર ફળદુ આપઘાત કેસઃ 'એકે'ય વકીલ આરોપીઓ તરફથી નહીં લડે', રાજકોટ બાર એસો.નો નિર્ણય

• ઉદ્યોગપતિ મહેન્દ્ર ફળદુ આપઘાત કેસ
• બાર એસો.ની બેઠકમાં લેવાયો નિર્ણય 
• આપઘાત કેસના આરોપીનો કેસ નહી લડે કોઈ વકીલ 

રાજકોટનું નામ આવે એટલે રંગીલા સિટીની ઓળખ હોઠ પર આવીને ઊભી રહી જાય. પરંતુ આ રંગીલા સિટીમાં હવે ભ્રષ્ટાચાર, લાંચ-રૂશ્વત, અને ઠગાઈ જેવા કિસ્સાઓ પણ વધતા જઈ રહ્યા છે. કારણ કે, આવા જ એક કેસના કારણે જાણીતા ઉદ્યોગકાર મહેન્દ્ર ફળદુએ આત્મહત્યા કરી લીધી છે. તેમની આત્મહત્યા પાછળ પર કરોડોની મિલકત કારણ બની છે. તેમની સુસાઇડ નોટ અને ઓડિયો ક્લીપમાં ચોંકાવનારા ખુલાસા થયા છે. આ વચ્ચે હવે રાજકોટ બાર એસોસિએશન દ્વારા મોટો નિર્ણય લેવામાં આવ્યા છે.ઉદ્યોગપતિ મહેન્દ્ર ફળદુને ન્યાય અપાવવા માટે રાજકોટનો કોઈ વકીલ આરોપીના પક્ષ તરફથી કેસ નહીં લડે તેવો બેઠકમાં નિર્ણય લેવામાં આવ્યો છે.

આરોપીઓ તરફથી રાજકોટ બાર એસો.ના એક પણ વકીલ નહીં રોકાય
ઉદ્યોગપતિ મહેન્દ્ર ફળદુએ આપઘાત પહેલા પ્રેસનોટ અને ઓડિયો ક્લિપ બનાવી હતી. જેમાં તેમણે તેમના સાથે થયેલી તમામ આપવીતી અને ઓઝોન ગ્રુપ સહિત 7 આરોપીઓએ IPS અને IASના ઘરોબોના નામે વારંવાર ધમકીઓ તેમણે માનિસક રીતે હેરાન કર્યા હોવાનો ધટસ્ફોટ કર્યો હતો. મહત્વનું છે કે ઉદ્યોગપતિ મહેન્દ્ર ફળદુ એડવોકેટ પણ હતા જેને લઈને ગઈ કાલે બનેલી આ ઘટના બાદ આજે રાજકોટ બાર એસો.ના વકીલોએ શોક સભા યોજી હતી. જે બાદ રાજકોટ બાર એસો.ની બેઠક મળી હતી જેમાં શ્રદ્ધાંજલિ આપી એડવોકેટ મહેન્દ્ર ફળદુ આપઘાત કેસમાં રાજકોટનો કોઈ પણ વકીલ આરોપીઓ તરફથી કેસ નહીં લડે તેવી જાહેરાત કરવામાં આવી છે. 

7 આરોપી સામે નામજોગ ફરિયાદ નોંધાઇઃ રાજકોટ પોલીસ
પરિવાર દ્વારા ગઈકાલે સાંજે 8:30 વાગ્યે રાજકોટ પોલીસમાં 7 આરોપીઓ વિરૂદ્ધ નામજોગ ફરિયાદ નોંધવામાં આવી છે. જેમાં 5 આરોપીઓ અમદાવાદના અને 2 આરોપીઓ રાજકોટના રહેવાસી છે. જેમાં એમ.એમ. પટેલ, અમિત ચૌહાણ, અતુલ મહેતા જયેશ કાંતિલાલ પટેલ, દીપક પટેલ, પ્રકાશ ચંદુલાલ પટેલ અને પ્રણય કાંતિલાલ પટેલ વિરૂદ્ધ ફરિયાદ નોંધી છે. આ તમામ વિરૂદ્ધ દુષ્પ્રેરણાનો ગુનો દાખલ કરાયો છે. 

તપાસ માટે SITની કરાઇ રચના
હાઈપ્રોફાઇલ આત્મહત્યા કેસને લઇને રાજકોટ પોલીસ દ્વારા SITની રચના કરાઇ છે. તપાસ માટે 4 ટીમો બનાવી આરોપીઓને ઝડપી પાડવા પ્રયાસ કરવામાં આવી રહ્યા છે. અગાઉ મહેન્દ્ર ફળદૂએ પોલીસમાં કોઇ અરજી આપી નથી. SIT સમગ્ર તપાસને સુપરવાઇઝ કરશે. જેમાં યુનિવર્સિટી પોલીસ સ્ટેશનના PI તપાસ કરશે. હાલ ડિજીટલ પુરાવા એકત્ર કરાયા છે. તેમણે સુસાઇડ નોટ ઘરે બનાવી હતી પછી ફોટો લીધો હતો. ઘટના રાજકોટમાં બની છે એટલે રાજકોટ તપાસ કરશે.

કયા કારણે કર્યો આપઘાત?
આપઘાતના કારણ અંગે રાજકોટ પોલીસે જણાવ્યું કે, અમદાવાદની જમીનની બબાલને લઇ આપઘાત કર્યો હોવાનું પ્રાથમિક કારણ જાણવા મળી રહ્યું છે. અમદાવાદ રૂરલમાં બાવળા પાસે મહેન્દ્રભાઇની કંપની અને ઓઝોન ગ્રુપ બન્ને કંપની વચ્ચે MoU થયા હતા. મૃતકને જમીનને લઇને પ્રેશર રહેતું હતું. આરોપીઓને ઝડપવા માટે હાલ કાર્યવાહી ચાલી રહી છે. જે જગ્યાએથી સુસાઇડનોટ ટાઇપ કરાઇ અને તમામ પૂરાવા એકત્ર કરીને ઉંડાણ પૂર્વક તપાસ કરીને કાયદેસરની કાર્યવાહી કરવામાં આવી રહી છે. ફરિયાદમાં સ્પષ્ટ છે કે આ 7 લોકો પૈસા પરત પણ નહોતા આપતા અને જમીન પણ પાછી નહોતા આપતા. પૈસાની માંગણી માટે જાય તો તેઓ ધમકાવતા હતા. તેના આધારે તપાસ કરીશું
     
4 પાનું નહીં હોવા અંગે પોલીસે શું કહ્યું?
મહત્વનું છે કે, મહેન્દ્ર ફળદુના મોબાઇલમાંથી સુસાઇડનોટના 3 પેજ મળ્યા છે. ત્યારે ચોથુ પેજ ગુમ થયાની ચર્ચા ચાલી રહી છે. આ અંગે રાજકોટ પોલીસે જણાવ્યું કે, અમને પ્રાથમિક માહિતી અનુસાર, સુસાઇડ નોટ તેમણે આગલા દિવસે તેમના ઘરે ટાઇપ કરીને બનાવરાવી હતી બાદમાં તેના ફોટો લીધા. આત્મહત્યના 12-15 કલાક પહેલા સુસાઇડનોટ બનાવી હતી. સુસાઇડનોટમાં ચોથુ પેજ નહીં હોવાનું એટલે અમે માની રહ્યા છીએ કે, તેમના મોબાઇલમાંથી જ તમામ વિગતો મળી છે. તેમના પરિવાર સાથે બેસીને ફરિયાદ દાખલ કરી છે. 

મોબાઇલની બાજુમાં મળી હતી ચિઠ્ઠી
પોલીસના જણાવ્યા અનુસાર, આપઘાતના સ્થળ પર સૌથી પહેલા ઓફિસ ખોલનાર વ્યક્તિ 10.10 વાગ્યે પહોંચ્યો હતો. આ વ્યક્તિ દ્વારા મૃતકના ભાઇ અને દીકરાને બોલાવવામાં આવ્યા હતા. મૃતકના ટેબલ પર નાનકડી નોટ હતી. જેમાં લખ્યું હતું કે મોબાઇલ ડેટા ઓન કરો. મોબાઇલનો ડેટા થાય છે એટલે પ્રેસ મીડિયા અને પોલીસને તેમની સુસાઇડનોટ મળી જાય છે. ત્યારબાદ પોલીસ ત્યાં પહોંચે છે.

મહેન્દ્ર ફળદુએ સુસાઈડ પહેલા બનાવેલી ઓડિયો ક્લિપમાં શું કહ્યું?
આત્મહટ્યા પહેલા બનાવેલી ઓડિયો ક્લિપમાં કહેવામાં આવ્યું છે કે મનસુખભાઈ એમ. સુરેજા, અતુલ મેહતા, અમદાવાદ, અમિત ચૌહાણ , રાજકોટ, જયેશ કાંતિલાલ પટેલ , ડાયરેક્ટર, ઓઝોન ગૃપ, દિપક મણીલાલ પટેલ, પ્રકાશ ચંદુલાલ પટેલ, પ્રણયકુમાર કાંતિલાલ પટેલ, 2007માં 48 હજારથી વિશેષ વારની જગ્યામાં રોકાણ કર્યુ છે જેનાથી આપ સર્વે માહિતગાર છો તમામ રકમ ચૂકવેલ છે, તમામ નિયમની મેં અમલવારી કરેલ છેતેમ છતા ટસ્કની પ્રોજેક્ટમાં તમે અમોને દસ્તાવેજ કરી આપેલ નથી કે અમારી પાસેથી પ્લોટ પરત લેતા નથી એનકેન પ્રકારે અમને ખુબ હેરાન કરવામાં આવ્યા આ બુકિંગ મારા ઉપરાંત મારા નાના ભાઈ શૈલષભાઈ, બીજો નાનો ભાઈ રમેશભાઈ, મારા કાકા વિનુભાઈ અને મિત્રોના મારફતે તમારે ત્યાં ઓછામાં ઓછી એક લાખવાર જગ્યાનું બુકિંગ કરાવ્યું છે 2007માં આ તમામ રકમ ચુકવી આપેલ છે, જે તમારા બેન્ક ખાતામાં જમા છે ઈન્કમ ટેક્સમાં રિર્ટનમાં પણ આ રકમ બોલે છે 2007થી આ જગ્યાના દસ્તાવેજો કરાવવા માટે વિનંતીઓ કરી કોઈ જવાબ કે કોઈ પ્રકારનો સાથ સહકાર મળ્યો નથી ત્યાં જમીનનો ભાવ વધી ગયો છે અમને કાઢી મુકવા કે સસ્તા ભાવે પ્લોટ પચાવી પાડવાના સતત પ્રયત્નો કરાયા તેમની ઓફિસે જતા વારંવાર મને ગોળગોળ ફેરવ્યો. જે બાદ કોઈ છેડો ન મળતા આખરે કંટાળી મહેન્દ્ર ફળદુએ જિંદગી સાથે આપઘાત કરી છેડો ફાડી લીધો હતો.