મહારાષ્ટ્રના પુણેમાં એક 42 વર્ષીય પરણિત મહિલાને શું ખબર હતી કે ફેસબુક પર એક યુવક સાથે કરેલી દોસ્તી તેની આટલી મોંધી પડશે અને તેણે જીવ ગુમાવવો પડશે. હકીકતમાં પુણેના મુંડવા વિસ્તારમાં રહેલતી 42 વર્ષીય મહિલા 22 જુનના રોજ ગુમ થઇ ગઇ. તેના 18 વર્ષના દિકરાએ 25 જૂનના રોજ ગુમ થવા અંગેની ફરિયાદ નજીકના પોલીસ મથકે નોંધાવી હતી.
ઉલ્લેખનીય છે કે પોલીસે ફરિયાદ નોંધ્યા બાદ તપાસ હાથ ધરી. મહિલાના ફોન કોલ્સ અને સોશિયલ મીડિયા પરથી જાણવા મળ્યું કે તેણી 31 વર્ષીય યુવક આનંદ નિકમના સંપર્કમાં હતી. જે પુણેના ભોંસલે નગરમાં ચાનો સ્ટોલ ધરાવે છે. જ્યારે પોલીસ આનંદની પૂછપરછ કરવા પહોંચી તો તે ફરાર થઇ ગયો હતો. 3 દિવસ બાદ પોલીસે આરોપીને કસ્ટડીમાં લીધો અને પૂછપરછમાં તે ણે પોતાના ગુનાની કબૂલાત કરી છે.
પોલીસ નિરીક્ષક સંપત ભોંસલે જાહેર માધ્યમો સાથે વાતચીત કરતા જણાવ્યું કે, 6 મહિના પહેલા આરોપી આનંદ નિકમની ફેસબુક દ્વારા મિત્રતા થઇ હતી. ત્યારથી બંન્ને એકબીજાને વારંવાર મળતા હતા. આરોપીએ જણાવ્યું કે મહિલા એક સારા અને ધનવાન પરિવારની છે. તેણે મહિલા સાથે પ્રેમનું નાટક રચ્યું અને પછી તે જે કહેતો તેમ મહિલા કરતી.
22 જૂનના દિવસે આરોપીએ મહિલાને ઘરેણાં પહેરીને ફોટોશૂટ કરવા માટે બોલાવી. આરોપી આનંદ નિકમ મહિલાને પુણેથી આશરે 80 કિલોમીટર જંગલ વિસ્તારમાં લઇ ગયો જ્યાં તેણે મહિલાની આંખો પર કપડું બાંધીને ધારદાર હથિયારથી હત્યા કરી દીધી.