ધારાસભ્યો સહિત કુલ 70 લોકોને ગુવાહાટી ખસેડાશે: સૂત્ર, મહારાષ્ટ્ર ભાજપના નેતા સંજય કુટે પણ સુરત ખાતે હોટેલમાં હાજરાહજુર
મહારાષ્ટ્રમાં રાજકીય સંકટ વચ્ચે સૌથી મહત્વના સમાચાર
સુરતથી સિંદેના સમર્થક ધારાસભ્યોને ખસેડવા તૈયારીઓ
સુરત આવેલા ધારાસભ્યોને ગુવાહાટી લઈ જવાનું નક્કી : સૂત્ર
મહારાષ્ટ્રમાં રાજકીય સંકટ વચ્ચે સૌથી મહત્વના સમાચાર મળી રહ્યા છે કે સુરતથી સિંદેના સમર્થક ધારાસભ્યોને ખસેડવા તૈયારીઓ ચાલી રહી છે. ખાસ સૂત્રો દ્વારા મળતી માહિતી મુજબ સુરત આવેલા ધારાસભ્યોને આસામના ગુવાહાટી લઈ જવાનું નક્કી કરવામાં આવ્યું છે. ચાર્ટડ પ્લેનથી દિલ્લી સુધી ધારાસભ્યોને લઈ જવાશે તે બાદ તેમણે ગુવાહાટી ખસેડવામાં આવશે. શિવસેનાના 33 અને અપક્ષના 4 એમ કુલ 37 ધારાસભ્યોને લઈ જવા માટે ખાસ વ્યવસ્થા પણ કરવામા આવી છે. રાત્રે 12 વાગ્યા બાદ આ MLAની હેરફેર કરવામાં આવશે.
સંજય કુટેની મહત્વની ભૂમિકા
આપને જણાવી દઈએ કે મહારાષ્ટ્ર ભાજપના નેતા સંજય કુટે પણ સુરત ખાતે હોટેલમાં ખડેપગે છે. બપોર બાદથી સંજય કુટે સતત ધારાસભ્યોના સંપર્કમાં છે. મહારાષ્ટ્ર ભાજપે સંજય કુટેને સિંદે જુથના ધારાસભ્યોને સાચવવા અને સમજાવવાની કમાન સોંપી છે. હાલ સંજય કુટે ભાજપ હાઈકમાન્ડ અને ધારાસભ્યો વચ્ચે કોર્ડિનેશન કરી રહ્યા છે.
સુરતની લા મેરેડિયન હોટેલની અંદરના દ્રશ્યો,
મહારાષ્ટ્રની મહાવિકાસ અઘાડી સરકાર પર સંકટના નવા વાદળો ઘેરાયા છે. મહારાષ્ટ્ર શિવસેનામાં ભંગાણની શક્યતાઓ સેવાઇ રહી છે. શિવસેનાના નેતા અને મંત્રી એકનાથ શિંદે નારાજ હોય જે પોતાના સમર્થકો સાથે મહારાષ્ટ્ર છોડી ગુજરાત પહોંચ્યા હતા. જેને પગલે દેશના રાજકારણમાં ચર્ચા જાગી છે. મહારાષ્ટ્રના મંત્રી, ધારાસભ્યો સુરતની ફાઇવસ્ટાર હોટલ લા મેરેડિયનમાં રોકાયા છે. જે હોટેલનો અંદરનો અને બહારનો વિડીયો સામે આવ્યો છે. જેમાં અમુક ધારાસભ્યો હોટેલમાં બેસીને આરામથી વાતો કરી રહ્યા છે તો અમુક ધારાસભ્યો આરામથી બેઠેલા અને અમુક હરતા, ફરતા નજરે પડી રહ્યા છે.
હોટલમાં પોલીસનો ચુસ્ત બંદોબસ્ત
મહારાષ્ટ્ર શિવસેનાના ધારાસભ્યોએ સુરતમાં ધામાં નાખ્યા છે. જે સુરતની લા મેરેડિયન હોટેલમાં રોકાયા છે. આ હોટેલની અંદરના વીડિયો પણ વહેતા થયા છે. સુરતની લી મેરિડિયન હોટેલના બહારના અને હોટલમાં પોલીસનો ચાંપતો બંદોબસ્ત વિડીયોમાં દ્રશ્યમાન થઈ રહ્યો છે વધુમાં ચુસ્ત બંદોબસ્ત વચ્ચે હોટલમાં કેટલાક ધારાસભ્યો પણ જોવા મળી રહ્યા છે. મહત્વનું છે કે, હોટલના 100 મીટર દૂરથી જ પોલીસ બંદોબસ્ત ગોઠવી દેવાયો છે. એટલું જ નહિ 100 મીટર દૂરથી જ પોલીસે બેરિકેટિંગ કરી નો એન્ટ્રી કરી દીધી છે. ઉલ્લેખનિય છે કે, થોડા દિવસ પહેલાં બાલા સાહેબ નેશનલ મેમોરિયલના ગ્રાઉન્ડ બ્રેકિંગ સેરેમનીના કાર્યક્રમની આમંત્રણ પત્રિકામાં શિંદેનું નામની બાદબાકી જોવા મળી હતી. ત્યારબાદ મહારાષ્ટ્ર સરકારમાં ભડકો થયો હોવાનું સામે આવ્યું છે.
એકનાથ શિંદે સુરત સિવિલ હોસ્પિટલ ગયા
તો બીજી તરફ એકનાથ શિંદે સુરત સિવિલ હોસ્પિટલ પહોંચ્યા છે. નીતિન દેશમુખની ખબર પૂછવા સિવિલ હોસ્પિટલ ગયા છે.સવારે તબિયત ખરાબ થતા દેશમુખને હોસ્પિટલ ખસેડાયા હતા. નીતિન દેશમુખનો પરિવાર પણ સિવિલ હોસ્પિટલ પહોંચી ગયો છે.
BJP સાથે ગઠબંધન થશે તો શિવસેના નહીં તૂટે
મહારાષ્ટ્ર સરકાર સંકટ વચ્ચે એકનાથ શિંદેનું દિવસભરની રાજકિય હલચલ બાદ પ્રથમ વખત નિવેદન સામે આવ્યું છે. જેમાં તેમણે સ્પષ્ટ શબ્દોમાં સંકેત આપ્યા છે કે BJP સાથે ગઠબંધન થશે તો શિવસેના નહીં તૂટે, સાથે તેમણે કહ્યું કે શિવસેના છોડવાની પણ મારી કોઈ ઇચ્છા નથી કે CM બનવાનો મારો કોઈ પ્લાન નથી. પણ શિવસેનાએ અઘાડી ગઠબંધન સાથે છેડો ફાડવો પડશે અને ભાજપ સાથે રહી સરકાર બનાવવી પડશે. આગળની રણનિતિ બહુ જલ્દી જાહેર કરશે તેવા વાત કહી તેઓએ દાવો કર્યો કે 35 ધારાસભ્યો તેમની સાથે છે.
સુરતમાં શિવસેનાએ મોકલેલા નેતાઓ સાથે શિંદેની બેઠક પૂર્ણ
મહારાષ્ટ્ર સરકારના ઘણા નારાજ ધારાસભ્યો મંત્રી એકનાથ શિંદે સાથે ગુજરાતમાં સુરતની મેરેડિયન હોટલમાં આવી ગયા છે. તેની વચ્ચે ઉદ્ધવ ઠાકરે નારાજ શિંદે અને મનાવવા માટે શિંદેના નજીક માનવામાં આવતાં રવીન્દ્ર પાઠક અને મિલિંદ નાર્વેકર તાબડતોબ સુરત ખાતે મોકલ્યા હતા. બંને નેતાઓ સુરતની હોટલ મેરેડિયન ખાતે એકનાથ શિંદે સાથે લગભગ 1 કલાકથી વધુ સમય બેઠક કરી હતી. જેમાં 3 મોટી શરતો એકનાથ શિંદે અને નારાજ ધારાસભ્યો દ્વારા મૂકવામાં આવી છે.
કઈ 3 મોટી શરતો એકનાથ શિંદેએ મૂકી?
MVA થી છેડો ફાડી બહાર આવે શિવસેના
ભાજપ સાથે મળે સરકાર બનાવે
સસ્પેન્ડ એકનાથ શિંદેને ફરી પદ પરત કરે
શું મિલિંદ નર્વેકર એકનાથ શિંદે મનાવવામાં ના સફળ?
મિલિંદ નાર્વેકર અને રવિન્દ્ર પાઠક એકનાથ શિંદેને સાંભળી ઉદ્ધવ ઠાકરેનો સંદેશો આપી પરત મુંબઈ ફર્યા છે. આમ જોવા જોઈએ તો એકનાથ શિંદેના ટ્વિટ પરથી લાગી રહ્યું છે કે તેઓ શિવસેના સામે ફૂલ મૂડમાં છેડો ફાડવાની તૈયારીમાં છે. એકનાથ શિંદેનો કોઈ કોન્ટેક્ટ ન થતાં ઉદ્ધવ ઠાકરે તેમના ખાસ ગણાતા બે લોકોને મનાવવા સુરત મોકલ્યા હતા. મિલિંદ નર્વેકર અને રવીન્દ્ર પાઠક શિંદેના ખાસ મિત્રો છે. જેથી તેમણે આ જવાબદારી શિવસેના તરફથી સોંપવામાં આવી હતી. પણ હિન્દુત્વનો રાગ અલાપી શિંદે સાથી ધારાસભ્યો સાથે કઈંક મોટું કરવાની ફિરાકમાં છે. રિસામણા મનામણાનો 'સામનો' એકનાથ શિંદે અને ઉદ્ધવ ઠાકરેના દૂત બનીને આવેલા નેતાઓ સામે 3 મોટી શરતો જે અશક્ય માનવવામાં આવી રહી છે તે મૂકી છે. ત્યારે આ શરતોનો સામનો શિવસેના અને ઉદ્ધવ સરકાર કઈ રીતે કરે છે તે જેમ જેમ રાજકીય ખેલના પત્તા ઉઘડશે તેમ તેમ ખબર પડશે.હાલ તો બેઠક બાદ પણ નારાજગી યથાવત જોવા મળી રહી છે.
એકનાથ શિંદે સાથે મારી વાત થઈ: સંજય રાઉત
મહારાષ્ટ્રમાં ઉદ્ધવ સરકાર પર ખતરો મંડારાઈ રહ્યો છે. આ વચ્ચે શિવસેના નેતા સંજય રાઉતની મોટું નિવેદન સામે આવ્યું છે. તેમનું કહેવું છે કે એકનાથ શિંદે સાથે તેમની વાતચીત થઈ ગઈ છે. આ સમગ્ર તોડજોડ પાછળ ભાજપનો હાથ હોવાનો આરોપ લગાવ્યો છે. ઈડીની કાર્યવાહીના ડરથી એકનાથે આ પગલું ભર્યું હોવાનું પણ રાઉતે જણાવ્યું છે. રાઉતે કહ્યું કે ઘણા ધારાસભ્યો સાથે મારો સંપર્ક થઈ ગયો છે. તેમણે પ્રેશર કરી સુરત લાવવામાં આવ્યા છે. તેમના એક ધારાસભ્ય રાત્રીના જ સુરતથી મુંબઈ આવવાની કોશિશ કરી રહ્યા છે. તેમની સાથે અન્ય 4 MLA પણ મહારાષ્ટ્ર આવવાના પ્રયાસ કર્યા હતા. પણ ગુજરાત પોલીસે ધારાસભ્યોને જકડી રાખ્યા છે. મહારાષ્ટ્ર પોલીસને ગુજરાત જવાનો મોકો આપવામાં આવે તો તમામ ધારાસભ્યો પરત આવી શકે છે. મિલિંદ નર્વેકર અને રવીન્દ્ર પાઠક સુરત પહોંચી ગયા છે પણ તેમણે બાગી ધારાસભ્યોને મળવા દેવામાં આવ્યા ન હોવાનો પણ સંજય રાઉત આરોપ કરી રહ્યા છે.
17 થી 18 ધારાસભ્યો જ શિંદેની સાથે: સંજય રાઉત
વધુમાં રાઉતે કહ્યું હતું કે એકનાથ શિંદેનો સાથ આપવા વાળા તમામ મંત્રીઓનું મંત્રી પદ છીનવી લેવામાં આવશે. એકનાથ શિંદેને મનાવવાની કોશિશો કરાઇ રહી છે. એકનાથ શિંદે સાથે 27 નહીં પણ 17 થી 18 ધારાસભ્યો હોવાનો દાવો પણ રાઉત દ્વારા કરવામા આવ્યો છે.
જુઓ ક્યાંથી ખેલ શરૂ થયો?
મહારાષ્ટ્રમાં રાજકીય ખેલ રાજ્યસભા ચૂંટણીથી શરૂ થયો હતો. અહીં યોજાયેલ રાજ્યસભાની ચૂંટણીમાં 113 ધારાસભ્યોના સમર્થનવાળી ભાજપને 123 વોટ મળ્યા હતાં. ત્યાર બાદ MLC ચૂંટણીમાં તેની તાકાત વધારે વધતી જોવા મળી હતી. સોમવારના રોજ યોજાયેલ વિધાનસભા ચૂંટણીમાં ભાજપને 134 ધારાસભ્યોનું સમર્થન મળ્યું છે અને ભાજપ અહીં વિધાન પરિષદના પોતાના તમામ પાંચેય ઉમેદવારો જીતવામાં સફળ રહ્યાં. તેનાથી વિપરીત, શિવસેનાને પોતાના 55 ધારાસભ્યો અને અપક્ષ ધારાસભ્યોને સમર્થન હોવા છતાં માત્ર 52 મત મળ્યા હતા.તમને જણાવી દઈએ કે મહારાષ્ટ્રમાં રાજ્યસભાની ચૂંટણી બાદ વિધાન પરિષદની ચૂંટણીમાં પણ મહાવિકાસ અઘાડી સરકારમાં સામેલ પક્ષોના ધારાસભ્યોએ ક્રોસ વોટિંગ કર્યું છે. વિધાનસભામાં ભાજપના 106 ધારાસભ્યો છે. અપક્ષો સહિત આ સંખ્યા 113 સુધી પહોંચી ગઈ હતી. પરંતુ તેઓને રાજ્યસભાની ચૂંટણીમાં 123 વોટ મળ્યા અને MLCની ચૂંટણીમાં 134 વોટ મળ્યા હતા. આ રીતે એકનાથ શિંદેએ ખુલ્લેઆમ વિદ્રોહનો ઝંડો ઉઠાવ્યા બાદ સીએમ ઉદ્ધવ ઠાકરેની સામે રાજકીય સંકટ ઊભું થયું છે.
જુઓ શું છે મહારાષ્ટ્ર વિધાનસભાનું આંકડાકીય ગણિત?
મહારાષ્ટ્ર વિધાનસભામાં કુલ 288 સીટો હતી. આથી સરકાર બનાવવા માટે 145 ધારાસભ્યોની જરૂર છે. પરંતુ શિવસેનાના એક ધારાસભ્યનું અવસાન થતા હાલમાં મહારાષ્ટ્ર વિધાનસભામાં 287 સીટો જ બાકી છે અને એવામાં સરકાર બનાવવા માટે એટલે કે બહુમતી માટે 144 ધારાસભ્યોની જરૂર છે. બળવા પહેલાં શિવસેનાની આગેવાની હેઠળની મહાવિકાસ આઘાડીને 169 ધારાસભ્યોનું સમર્થન હતું, જ્યારે ભાજપ પાસે 113 ધારાસભ્યો અને વિપક્ષમાં 5 અન્ય ધારાસભ્યો છે.
ભાજપ પાસે હાલમાં 113 ધારાસભ્યો
મહારાષ્ટ્રમાં મુખ્ય વિપક્ષી દળ ભાજપ પાસે 113 ધારાસભ્યોનું સમર્થન છે. જેમાં ભાજપના 106, RSPના 1, જેએસએસના 1 અને 5 અપક્ષ ધારાસભ્ય સામેલ છે. જ્યારે અન્ય પક્ષોની પાસે 5 ધારાસભ્ય છે. જેમાં AIMIM ના 2, CPIના 1 અને MNSના 1 ધારાસભ્ય સામેલ છે.
જુઓ કેવી રીતે શિંદેએ બગાડી નાખ્યું ઉદ્ધવ ઠાકરેનું ગણિત?
એકનાથ શિંદેની સાથે બળવાખોર કરનારા 30 ધારાસભ્યો છે કે જે ઉદ્ધવ સરકારની સાથે છે. એવામાં હવે ઉદ્ધવ સરકાર પાસેથી જો આ 30 ધારાસભ્યોનું સમર્થન હટાવી દઇએ તો ઉદ્ધવ સરકાર પાસે 139 ધારાસભ્યો જ બચે છે. એવામાં અપક્ષ અને અન્ય કેટલીક નાની પાર્ટીઓના 2થી 3 ધારાસભ્યો જો ઉદ્ધવ ઠાકરે સરકારનો સાથ છોડી દે છે તો લગભગ એ તો નક્કી છે કે ઠાકરે સરકાર માટે વિધાનસભામાં બહુમત સાબિત કરવું એ મુશ્કેલ થઇ શકે છે. જો કે, આ રીતે, મહાવિકાસ અઘાડી બહુમતની ઓછી સંખ્યા પર આવી ગઈ છે.