મહારાષ્ટ્રના મહાનાટકનો સવારે મુખ્યમંત્રી પદના શપથ સાથે અંત આવ્યો પણ ઉપમુખ્યમંત્રી પદના શપથ સાથે નવો તંજ આવ્યો હોય તેવું લાગી રહ્યું છે. જોકે NCPએ 41 વર્ષ જુનો ઈતિહાસ દોહરાવ્યો છે. શરદ પવારે પણ આવી રીતે 1978માં જનતા દળને ટેકો આપી સરકાર બનાવી હતી. જોઈએ ઈતિહાસ અને આજની ઘટનાની સામ્યતા.
1978 અને 2019 બંને વખત NCPએ કોંગ્રેસ સાથે છેડો ફાડ્યો
1978માં શરદ પવાર જનતા દળ સાથે જોડાઈ મહારાષ્ટ્રના CM બન્યા હતા
આજે 2019માં અજિત પવાર ભાજપ સાથે જોડાઈ મહારાષ્ટ્રના DyCM બન્યા છે
જનતા દળને ટેકો આપી શરદ પવાર પોતે CM બન્યા હતા
મહારાષ્ટ્રમાં જે આજે બન્યું તેનાથી અચંબિત થવાની જરૂર નથી. આજથી ઠીક 41 વર્ષ પહેલાં મહારાષ્ટ્રની રાજનીતિમાં આવું જ બન્યું હતું. એ વખતે પણ શરદ પવારે જ કોંગ્રેસ સાથે છેડો ફાડી જનતા દળ સાથે ગયા હતા. જે તે વખતે શરદ પવારે મહારાષ્ટ્રના મુખ્યમંત્રી બનવા જનતાદળને ટેકો આપ્યો અને માત્ર 38 વર્ષની ઉંમરે સૌથી નાની વયના મુખ્યમંત્રી બની સરકાર બનાવી હતી.
1978માં કોંગ્રેસના બે જુથની લડતમાં શરદ પવાર ફાવી ગયા હતા
1978માં ઈંદિરા ગાંધીના વડપણ વાળી કોંગ્રેસ અને અન્ય કોંગ્રેસે અલગ અલગ થઈ મહારાષ્ટ્ર વિધાનસભાની ચૂંટણી લડી હતી. જેમાં જીત બાદ કોંગ્રેસના બંને દળ ભેગા થઈ સરકાર બનાવી. પરંતુ થોડા સમય બાદ શરદ પવારે અન્ય કોંગ્રેસ દળ તરીકે જનતા દળને ટેકો આપી પોતે સરકાર બનાવી મુખ્યમંત્રી બન્યા હતા.
અજિત પવાર - શરદ પવાર
કાકા-ભત્રીજાનું પુનરાવર્તન
આજે પણ 1978માં કાકા શરદ પવારે કરેલા રાજકીય સ્ટંટનું પુનરાવર્તન થયું છે. ભત્રીજા અજિત પવારે ભાજપને ટેકો આપી ઉપમુખ્યમંત્રી પદના શપથ લીધા છે. જે તે વખત શરદ પવારે કોંગ્રેસના સભ્યો પાડ્યા હતા તેવી રીતે આજે અજિત NCPના સભ્યો પાડશે.