કોરોના સંકટ / મહારાષ્ટ્ર રાજ્ય અને પાકિસ્તાન દેશના કોરોનાના કેસ અને મોતના આંકડાની સરખામણી ચોંકાવનારી

ભારતમાં બુધવારે કોવિડ 19 ના લગભગ 24,800 કેસ આવ્યા છે. આ સાથે ભારતમાં કુલ કેસનો આંક 7.68 લાખ પર પહોંચી ગયો છે વર્લ્ડોમીટર અનુસાર 4.76 લાખ લોકો કોરોનાથી સાજા થયા છે, જ્યારે 2.7 લાખ એક્ટિવ કેસીસ છે. લગભગ 21 હજાર લોકોનાં મોત નીપજ્યાં છે. ભારતમાં એટલા બધા કેસ થઇ ગયા છે કે ઘણા રાજ્યોમાં એક લાખથી વધુ કેસ છે. મહારાષ્ટ્રમાં બે લાખથી વધુ કેસ છે. વિશ્વના ફક્ત 12 દેશો એવા છે જ્યાં મહારાષ્ટ્ર કરતા પણ વધુ કેસ છે. 

મહારાષ્ટ્ર અને પાકિસ્તાનના કેસીસની સરખામણી

જો મહારાષ્ટ્ર કોઈ દેશ હોત, તો કોરોના કેસમાં તેની સંખ્યા પાકિસ્તાન પછીના સ્થાને હોત. પાકિસ્તાનમાં હાલમાં 2.37 લાખ કેસ છે, જ્યારે મહારાષ્ટ્રમાં 2.23 લાખ કેસ છે. એટલે કે, બંને વચ્ચે માત્ર 14 હજાર કેસનો તફાવત છે. બુધવારે મહારાષ્ટ્રમાં લગભગ 6600 નવા કેસ આવ્યા હતા. આ દિવસે પાકિસ્તાનમાં 2980 નવા કેસ નોંધાયા હતા. એટલે કે, મહારાષ્ટ્રની તુલનામાં પાકિસ્તાનમાં અડધાથી પણ ઓછા નવા કેસ સામે આવ્યા હતા. મંગળવારે પણ આ જ સ્થિતિ હતી. એવું માનવામાં આવે છે કે મહારાષ્ટ્રમાં છ દિવસની અંદર પાકિસ્તાન કરતા વધુ કેસ હોઈ શકે છે.

મહારાષ્ટ્રમાં 9,448 લોકો 

કોરોનાથી થતા મૃત્યુ વિશે વાત કરીએ તો મહારાષ્ટ્રમાં આ મહામારીને કારણે બુધવારે લગભગ 198 લોકોનાં મોત નીપજ્યાં હતાં. રાજ્યના લગભગ 9,448 લોકોએ કોરોનાને કારણે પોતાનો જીવ ગુમાવ્યો છે. પાકિસ્તાનમાં આ વાયરસને કારણે અત્યાર સુધીમાં 4980 લોકોનાં મોત નીપજ્યાં છે. એટલે કે મહારાષ્ટ્રમાં થયેલા મોત પાકિસ્તાનમાં થતાં મૃત્યુ કરતાં લગભગ બમણા છે.

કેનેડા, કતાર, તામિલનાડુ અને દિલ્હી

એવું નથી કે ફક્ત મહારાષ્ટ્રમાં કોરોના કેસ દુનિયાના બીજા દેશોના કુલ કેસ જેટલા છે. તામિલનાડુ અને દિલ્હીની સ્થિતિ પણ આટલી જ ચિંતાજનક છે. આ બંને રાજ્યોમાં એક લાખથી વધારે કેસ નોંધાઈ ચુક્યા છે. અત્યાર સુધી 21 દેશોમાં 1 લાખથી વધારે કેસ નોંધાઈ ચુક્યા છે. કતાર 1,00,950 કેસ સાથે 21માં નંબરે છે. તામિલનાડુ અને દિલ્હીમાં કતાર કરતા પણ વધારે કેસ છે. કેનેડામાં 1.06 લાખ કેસ અને કોલંબિયામાં 1.24 લાખ કેસ છે. દિલ્હીમાં 1.04 લાખ કેસ છે અને કેનેડાથી સહેજ ઓછા કેસ છે. તામિલનાડુમાં લગભગ 1.20 લાખ કેસ સાથે કેનેડા કરતા વધારે કેસ છે અને અત્યારે કોલંબિયા જેટલા કેસ છે.