ઝટકો / ચૂંટણીના પરિણામો બાદ ભાજપની ઈચ્છા હતી આ કરવાની, આશા પર ફરી ગયું પાણી

• ભાજપની આશા પર ફરી વળ્યું પાણી
• ધાર્યા બહારના પરિણામો આવતા કાર્યકર્તાઓ નિરાશ
• ઉજવણી માટે અગાઉથી તૈયાર કરેલી તૈયારીઓ પડી ભાંગી 

મહારાષ્ટ્રમાં અત્યાર સુધીના વલણો મુજબ, ભાજપ અને શિવસેનાના જોડાણને બહુમતી મળી છે, પરંતુ ભાજપની ગત ચૂંટણીની તુલનામાં બેઠકો ઓછી થઈ છે. તે જ સમયે, હરિયાણાની ગત ચૂંટણીમાં બહુમતી મેળવનાર ભાજપ આ વખતે પાછળ પડી ગઈ છે. હરિયાણામાં હુડ્ડાના નેતૃત્વમાં કોંગ્રેસ ભાજપને કડક લડત આપી રહી છે.

સંભાવના બહારનું પરિણામ

અત્યાર સુધીના વલણો મુજબ મહારાષ્ટ્રમાં ભાજપ શિવસેનાના જોડાણને 166 બેઠકો મળતી જોવા મળી રહી છે જ્યારે કોંગ્રેસ અને એનસીપીના ગઠબંધનને 94 બેઠકો મળવાની સંભાવના છે. જો આપણે તે જ સમયે હરિયાણા વિશે વાત કરીએ, તો અત્યાર સુધીના વલણો અનુસાર, કોંગ્રેસ હાલની ખટ્ટર સરકારને મજબૂત ટક્કર આપી રહી છે. 

હરિયાણામાં નાના પક્ષે કાઠું કાઢ્યું

ખટ્ટરના નેતૃત્વ હેઠળ ભાજપે આ વખતે ચૂંટણી લડી હતી. હરિયાણાના વલણો મુજબ, ભાજપને 37 બેઠકો ઉપર લીડ હાંસલ થયેલ છે, જ્યારે કોંગ્રેસના ઉમેદવારો 33 બેઠકો પર આગળ છે. દુષ્યંત ચૌટાલાની પાર્ટી જેજેપીએ ક્ષમતાની દ્રષ્ટિએ હરિયાણામાં સારું પ્રદર્શન કર્યું છે.

NCP ને મૂશળધાર વરસાદમાં કરેલ ચૂંટણી સભા ફળી 

રાષ્ટ્રવાદી કોંગ્રેસ પાર્ટી (NCP) અધ્યક્ષ શરદ પવારે જ્યાં 19 ઓક્ટોબરના રોજ સતારામાં મૂશળધાર વરસાદ દરમિયાન ચૂંટણી સભાને સંબોધન કર્યું હતું જેમાં લોકસભા પેટાચૂંટણીમાં પોતાના પક્ષના ઉમેદવાર માટે મત માગ્યા હતા. વરસાદ દરમિયાન ભીના થઇને પ્રચાર કરતો ફોટો તેમજ વીડિયો વાયરલ થયો હતો.

ભાજપની આશા પર પાણી ફર્યું

ભાજપની આશા મુજબ પ્રદર્શન નહીં કરી શકતા બંન્ને રાજ્યોની પાર્ટીના કાર્યાલય ખાલી દેખાઇ રહ્યા હતા અને કાર્યકર્તાઓ પણ ચૂપચાપ પરિણામો પર નજર રાખી રહ્યા છે. સંભવિત જશ્ન માટે ભાજપ દ્વારા મોટા સ્તરે બંન્ને રાજ્યોમાં તૈયારી હાથ ધરવામાં આવી હતી પરંતુ આશાઓ પર પાણી ફરી વળ્યું હતું.