ખુશખબર! / થોડી ટાઢક વળે એવાં સમાચાર! અહીં 1 એપ્રિલથી CNG થઈ જશે સસ્તો, રાજ્ય સરકારે લીધો મહત્વનો નિર્ણય

• મોંઘવારી વચ્ચે મહારાષ્ટ્ર સરકારનો મોટો નિર્ણય
• 1 એપ્રિલથી કોમ્પ્રેસ્ડ નેચરલ ગેસ (CNG) સસ્તું થઇ જશે
• 6 જ દિવસમાં દેશની અંદર 5મી વાર પેટ્રોલ-ડીઝલના ભાવમાં વધારો

વધતી જતી મોંઘવારી વચ્ચે મહારાષ્ટ્રની જનતાને મોટી રાહત મળવા જઈ રહી છે. મહારાષ્ટ્રમાં 1 એપ્રિલથી કોમ્પ્રેસ્ડ નેચરલ ગેસ (CNG) સસ્તું થઇ જશે. મહારાષ્ટ્ર સરકારે CNG પર વેટના દરમાં ધરખમ ઘટાડો કરવાનો નિર્ણય લીધો છે. સરકારે CNG પરનો વેટ 13.5 ટકાથી ઘટાડીને 3 ટકા કરી દીધો છે. સીએનજીના નવા દર 1 એપ્રિલ, 2022થી લાગુ થશે. સરકારના આ નિર્ણયથી CNG વાહન માલિકોને મોટી રાહત મળશે. તેમને CNG માટે ઓછાં પૈસા ચૂકવવા પડશે. તમને જણાવી દઈએ કે, આ મહિનાની શરૂઆતમાં બજેટ સત્ર દરમિયાન મહારાષ્ટ્રના નાણામંત્રી અજિત પવારે કુદરતી ગેસ પર વેટ 13.5 ટકાથી ઘટાડીને 3 ટકા કરવાનો પ્રસ્તાવ મૂક્યો હતો. તેમણે કહ્યું હતું કે, ટેક્સ કાપના કારણે રાજ્યને વાર્ષિક રૂ. 800 કરોડનું નુકસાન થશે.

પવારે બજેટ સત્ર દરમિયાન કહ્યું હતું કે, કુદરતી ગેસ પર્યાવરણને અનુકૂળ છે અને તેનો ઉપયોગ ઘરેલું પાઈપ ગેસ સપ્લાય તેમજ સીએનજીથી ચાલતા મોટર વાહનો, ઓટો-રિક્ષા, ટેક્સી અને ખાનગી વાહનો માટે વ્યાપકપણે થાય છે.

વેટ ઘટાડવા સૂચના જારી કરાઇ

રિપોર્ટ અનુસાર, મહારાષ્ટ્ર સરકારે રાજ્યમાં CNG પર વેટ ઘટાડવા માટે નોટિફિકેશન બહાર પાડ્યું છે. નાણા વિભાગ દ્વારા જારી કરાયેલા નોટિફિકેશન મુજબ રાજ્યમાં 1 એપ્રિલથી CNG સસ્તું થશે, જેનો ફાયદો ઓટોરિક્ષા, ટેક્સી ડ્રાઈવરો, પેસેન્જર વાહનો તેમજ નાગરિકોને થશે. પ્રદૂષણ પર નિયંત્રણ માટે સરકારનો આ નિર્ણય અત્યંત મહત્વપૂર્ણ છે.

મહારાષ્ટ્રની રાજધાની મુંબઈ અને તેની આસપાસના વિસ્તારોમાં મહાનગર ગેસ CNGનું સપ્લાય કરે છે. હાલમાં મુંબઈમાં CNGની કિંમત 66 રૂપિયા પ્રતિ કિલો છે. વેટમાં ઘટાડાથી કિંમતોમાં પણ ઘટાડો થશે.

અહીંયા CNG થયું છે મોંઘું

ઇન્દ્રપ્રસ્થ ગેસ લિમિટેડે તાજેતરમાં જ દિલ્હી-એનસીઆરમાં CNGના ભાવમાં પ્રતિ કિલો 50નો વધારો કર્યો છે. જ્યારે PNGના ભાવમાં પ્રતિ SCM 1 રૂપિયાનો વધારો કરવામાં આવ્યો છે. દિલ્હીમાં CNGની કિંમત વધીને 59.01 રૂપિયા પ્રતિ કિલો થઈ ગઈ છે. ત્યારે નોઈડા, ગ્રેટર નોઈડા અને ગાઝિયાબાદમાં CNGની કિંમત વધીને 61.58 રૂપિયા પ્રતિ કિલો થઈ ગઈ છે.

ગુજરાતમાં પણ CNG મોંઘું થઇ ગયું છે. ગુજરાત ગેસે CNGના ભાવમાં પ્રતિ કિલો 3 રૂપિયાનો વધારો કર્યો છે. અહીંયા એક કિલો CNG માટે 70.53 રૂપિયા ચૂકવવા પડશે.

6 જ દિવસમાં દેશની અંદર 5મી વાર પેટ્રોલ-ડીઝલના ભાવમાં વધારો

દિલ્હીમાં 27 માર્ચે પેટ્રોલ 50 પૈસા તો ડીઝલ 55 પૈસા પ્રતિ લીટર મોંઘુ થયું છે. જ્યાર બાદ દિલ્હીમાં પેટ્રોલની કિંમત 99.11 રૂપિયા અને ડીઝલની કિંમત 90.42 રૂપિયા પ્રતિ લીટર થઈ ગઈ છે. છેલ્લાં 6 જ દિવસની અંદર દેશમાં 5મી વખત ઇંધણના ભાવમાં વધારો કરવામાં આવ્યો છે.