પેટ્રોલ-ડીઝલની કિંમતોને લઈને છેલ્લા અમુક સમયથી દેશનો સામાન્ય માણસ ત્રાહિમામ પોકારી ઉઠ્યો છે, તેને લઈને કદાચ હવે તેને થોડી રાહત મળવાની આશા જાગી શકે છે.
મોદી સરકાર પર વધી રહ્યું છે દબાણ
પેટ્રોલ-ડીઝલની કિંમતોથી સામાન્ય માનવી પરેશાન છે
સૂત્રોની માહિતી અનુસાર ૮.૫ રૂપિયા જેટલો થઈ શકે છે ઘટાડો
મોદી સરકાર જ્યારે ૨૦૧૪માં પ્રથમ વાર સત્તામાં આવી ત્યારે કોંગ્રેસની યુપીએ સરકાર પર પેટ્રોલ-ડીઝલની કિંમતોના વધારાને લઈને ભાજપે ઘોર વિરોધ કર્યો હતો અને હવે જ્યારે મોદી સરકારના સમયમાં પહેલી વાર એવું બન્યું છે કે દેશના ઘણા શહેરોમાં પેટ્રોલની કિંમતોએ પ્રતિ લિટર ૧૦૦ રૂપિયાના માર્કને પણ વટાવી દીધો છે, ત્યારથી મોદી સરકાર પર આ ઊંચી કિંમતોને લઈને કોઈ કાર્યવાહી કરવાનું દબાણ ઊભું થયું છે, પણ સૂત્રોની જાણકારી મુજબ મુજબ મોદી સરકાર એક્સાઈઝ ડયુટીમાં ૮.૫ રૂપિયાનો ઘટાડો કરી શકે છે.
રાજ્ય સરકાર અને કેન્દ્ર સરકાર વસૂલે છે કર
મોદી સરકાર પેટ્રોલ-ડીઝલ પર એક્સાઈઝ ડયુટી વસૂલે છે અને રાજ્ય સરકારો તેની ઉપર વેટ વસૂલે છે. આ બંનેને પેટ્રોલ-ડીઝલની કિંમતોમાં ઉમેરીએ તો તેની કિંમત ઘણી મોંઘી થઈ જાય છે અને સામાન્ય માણસને તે મોંઘું પડે છે, માટે એક્સાઈઝ ડયુટીની આવક ઘટાડવા માટે સરકાર પર ન માત્ર વિરોધ પક્ષો દ્વારા પરંતુ ભાજપના અમુક નેતાઓ દ્વારા પણ નિંદા કરીને દબાણ ઊભું કરવામાં આવી રહ્યું છે, મહત્વનું છે કે હાલમાં જ રિઝર્વ બેન્ક ઓફ ઇન્ડિયાના ગવર્નર શક્તિકાન્તા દાસ અને ભાજપના રાજ્યસભા સાંસદ સુબ્રમણ્યમ સ્વામીએ પણ આ મુદ્દે સરકારને ઘટાડો કરવું જોઈએ તેવુ નિવેદન આપ્યું હતું.
મહત્વનું છે કે આ મુદ્દે પેટ્રોલિયમ મંત્રી ધર્મેન્દ્ર પ્રધાને તેમના નિવેદનમાં એમ પણ જણાવ્યું હતું કે તેમની સરકાર પેટ્રોલ-ડીઝલને જીએસટીમાં સમાવવા માંગે છે અને આ મુદ્દે તેઓ નાણાં મંત્રીએ રજૂઆત પણ કરી ચૂક્યા છે પણ આ બાબતે આખરી નિર્ણય જીએસટી કાઉન્સિલ જ લઈ શકે છે, અને નોંધનીય છે કે વેટ દ્વારા આની ઉપર રાજ્યોને પણ સારી આવક મળતી હોવાથી તેઓ પણ પેટ્રોલ-ડીઝલને જીએસટીમાં સમાવવા મુદ્દે એકમત થઈ શકે તેમ નથી.
ભાજપ પર ચૂંટણીઓનું દબાણ પણ હોઇ શકે છે
આગામી દિવસોમાં દેશમાં પાંચ રાજ્યોમાં વિધાનસભાની ચૂંટણીઓ આવી રહી છે અને ભાજપ માટે આ બધા રાજ્યોમાં સારું પ્રદર્શન કરવાનું દબાણ છે, હાલમાં થયેલ મોંઘવારી અને ખેડૂત આંદોલનના લીધે મોદી સરકારની ઇમેજ થોડી ધૂમિલ થઈ છે, આનો અસર ચૂંટણી પર પણ ન પડે તે માટે સરકાર ટૂંક સમયમાં એક્સાઈઝ ડ્યૂટીમાં ઘટાડો કરીને પેટ્રોલ-ડીઝલની કિંમતોમાં રાહત આપવાનો નિણર્ય કરી શકે છે.