વલણ / મહારાષ્ટ્રમાં ભાજપ માટે ખરાબ સમાચાર, શિવસેના સાથે ચૂંટણી લડવાથી આટલી બેઠકોનું નુકસાન

• મહારાષ્ટ્રમાં NDA સરકાર બનાવા તરફ
• 2014 વિધાનસભા ચૂંટણીમાં ભાજપ-કોંગ્રેસ અલગ ચૂંટણી લડ્યા હતા
• ભાજપને સ્પષ્ટ બહુમતિનો ન મળતાં મોવડીમંડળ ચિંતામાં
   

ઉલ્લેખનીય છે કે 2014ની વિધાનસભા ચૂંટણીમાં શિવસેના અને ભાજપે અલગ અલગ ચૂંટણી લડી હતી જેમાં શિવસેના 63 સીટો જીતી હતી જ્યારે ભાજપ 122 સીટો પર બાજી મારી ગયું હતું. 

હવે જ્યારે બંને પાર્ટીએ એકસાથે ચૂંટણી લડી રહી છે ત્યારે અત્યાર સુધી જે વલણો આવી રહ્યાં છે જેમાં ભાજપ નુકસાનમાં દેખાઈ રહી છે. શરૂઆતમાં સવારના વલણ જ્યારે દેખાઈ રહ્યાં હતા ત્યારે ભાજપ 100ની પાર દેખાઈ રહી હતી ત્યારે લાગી રહ્યું હતું કે બહુમતિનો 145નો આંકડો ભાજપ એકલે હાથ કદાચ પાર કરી લેશે. પરંતુ આગળ જતાં બ્રેક વાગી હતી અને 11 વાગ્યા સુધીમાં આ આંકડો 100ની નીચે જતો રહ્યો હતો.

મહારાષ્ટ્ર વિધાનસભા ચૂંટણીમાં શિવસેનાને ગઠબંધનનો ફાયદો
મહારાષ્ટ્રની બધી 288 બેઠકોનું વલણ સામે આવી ગયું છે. 2014 વિધાનસભા ચૂંટણીમાં ભાજપ-શિવસેના અલગ ચૂંટણી લડયા હતા. પરંતુ આ વખતે સાથે મળી ગઠબંધન કરતા પરિણામોનું વલણ શિવસેનાને ગઠબંધનનો ફાયદો થઇ રહ્યો હોય તેવું દર્શાવી રહ્યું છે.

મહારાષ્ટ્ર વિધાનસભા ચૂંટણી સમયે ભાજપ દ્વારા મહારાષ્ટ્રના મુખ્યમંત્રી દેવેન્દ્ર ફડણવીસને લઇને પ્રજા સમક્ષ મત માગ્યા હતા. જો કે મહારાષ્ટ્રમાં સીએમ ફડણવીસની સ્વચ્છ છબી પણ ભાજપને સ્પષ્ટ બહુમતિ અપાવી શક્યું નથી. જેને લઇને ભાજપના મોવડીમંડળ અને ખાસ કરી ભાજપ અધ્યક્ષ માટે આ એક ચિંતાનો વિષય દેખાઇ રહ્યો છે.

જો કે પરિણામ જે પ્રકારના સામે આવી રહ્યાં છે તે જોતા એવું લાગી રહ્યું છે કે ભાજપ-શિવસેના વચ્ચેના મતભેદે પણ અસર કરી હોય. વિધાનસભા ચૂંટણી પહેલા શિવસેના દ્વારા વારંવાર ભાજપ વિરુધ્ધ નિવેદન આપવામાં આવી રહ્યાં હતા. જો કે વિધાનસભાની ચૂંટણીમાં બેઠકની સમજૂતિને લઇને ચૂંટણી અગાઉ જ ભાજપ અધ્યક્ષ અમિત શાહ અને શિવસેના પ્રમુખ ઉદ્ધવ ઠાકરે વચ્ચે મુલાકાત પણ યોજાઇ હતી.