ભારતી આશ્રમ / હરિહરાનંદ સ્વામી ગુમ થયા બાદ પહેલીવાર સામે આવ્યા મહામંડલેશ્વર ઋષિભારતી, પ્રોપર્ટી વિવાદ મામલે જુઓ શું કહ્યું

• જૂનાગઢના ભારતી આશ્રમના મહામંડલેશ્વર હરિહરાનંદજીના ગુમ થવાનો મામલો
• મહામંડલેશ્વર ઋષિભારતી બાપુનું નિવેદન
• વિવાદ હોય તો સામે આવી વાત કરવી જોઈએઃ ઋષિ ભારતી બાપુ

જૂનાગઢના ભારતી આશ્રમના મહામંડલેશ્વર હરિહરાનંદ સ્વામી  છેલ્લા 2-3 દિવસથી ગુમ થતાં કેવડિયા આશ્રમના પરમેશ્વર ભારતીએ  વડોદરાનાં વાડી પોલીસ સ્ટેશનમાં ફરિયાદ નોંધાવતા પોલીસે તપાસનો ધમધમાટ શરુ કર્યો છે. વડોદરા પોલીસે ચિઠ્ઠી, વાયરલ વીડિયો મેળવી ગુમ થવાનું કારણ શોધવા તેમજ હાઈવે પરના સીસીટીવી અને મોબાઈલ લોકેશન  તેમજ સેવકોની તપાસ શરૂ કરવામાં આવી  છે. ગુમ થવા પાછળ સંપત્તિ વિવાદ હોવાની ચર્ચા ચાલી રહી છે ત્યારે આ મામલે  મહામંડલેશ્વર ઋષિભારતી બાપુનું નિવેદન સામે આવ્યું છે.

સંતો કોઈ દિવસ સંપત્તિ માટે લડતા નથી: ઋષિ ભારતી બાપુ

મહામંડલેશ્વર ઋષિભારતી બાપુએ નિવેદન આપતા જણાવ્યું કે  વિવાદ હોય તો સામે આવીને  વાત કરવી જોઈએ.  બાપુના સેવકો સાથે મેં વાત કરી છે. સંતો કોઈ દિવસ સંપત્તિ માટે લડતા નથી. બાપુ સામે આવીને વિવાદની જાણ કરે તો જ ખુલાસો થાય. બાપુના જલદી દર્શન થાય તેવું તમામ લોકો અને મારી ઈચ્છા છે. સાથે એમ પણ જણાવ્યું કે વિલ પર જે પણ વિવાદ છે તેનો ખુલાસો બાપુ જાતે કરશે.

 
મારા પર વિવાદો કરીને દબાણ કરવાનો પ્રયાસ થયો : હરિહરાનંદ સ્વામી

હરિહરાનંદ સ્વામી એક લખાણ અને વીડિયો મુકીને ગુમ થયા છે. જેમાં તેઓ ભારતી આશ્રમ સરખેજનો ખુબ વિવાદ થયો હોવાની વાતનો ઉલ્લેખ કરી રહ્યા છે તેમજ કહી રહ્યા છે કે ભારતીબાપુ બ્રહ્મલીન થયા બાદથી વિવાદ ચાલુ જ રહ્યો છે. વિલ મારા નામનુ હતુ છતા ફ્રોડ વિલ બનાવવામાં આવ્યા છે. મારા પર વિવાદો કરીને દબાણ કરવાનો પ્રયાસ થયો છે. હું આ બધી સ્થિતીથી કંટાળીને આ નિર્ણય કરી રહ્યો છુ. મે આશ્રમ છોડીને નિકળી જવાનો રસ્તો પકડ્યો હોવાની કબૂલાત તેઓએ વીડિયોમાં કરી છે.

હરિહરાનંદના ગુમ થવા પાછળ સંપત્તિ વિવાદ હોવાની ચર્ચા

બીજી તરફ ભારતી આશ્રમના ગાદીપતિ હરિહરાનંદ ગુમ થવા પાછળ સંપત્તિ વિવાદ હોવાની ચર્ચાઓ જોર પકડ્યું છે. સૂત્રોના જણાવ્યા અનુસાર આશ્રમ સાથે સંકળાયેલા કેટલાક લોકોએ બહુ મોટો ગોટાળો કર્યો છે. નાણાકીય ગરબડો ગાદીપતિ હરિહરાનંદના ધ્યાને આવી હતી. ત્યારે આ આર્થિક કૌભાંડની વાતથી ગાદીપતિ હરિહરાનંદ ખૂબ જ વ્યથિત હતાં. હરિહરાનંદજીએ ખુલાસા પૂછતા શિષ્યોએ જ દબાણ ઉભુ કર્યાની પણ ચર્ચા ઉભી થઈ રહી છે. ઉલ્લેખનીય છે કે, બ્રહ્મલીન ભારતીબાપુએ પોતાની વિલનો કારોભાર હરિહરાનંદને સોંપ્યો હતો. આ મામલે અન્ય કેટલાક નજીકના શિષ્યોની નારાજગી હોવાની પણ ચર્ચા છે.

શું છે સમગ્ર મામલો?

વડોદરાના ભારતી આશ્રમના મહામંડલેશ્વર હરિહરાનંદ સ્વામી છેલ્લા 2-3 દિવસથી ગાયબ થતાં કેવડિયા આશ્રમના પરમેશ્વર ભારતીએ પોલીસ ફરિયાદ નોંધાવી હતી. મળતી માહિતી અનુસાર હરિહરાનંદ વડોદરામાં રાકેશ નામના ભક્તને ત્યાં ગયા હતા. જે બાદ વડોદરા હાઇવે પર કપુરાઈ ચોકડી સુધી સ્વામી તેઓ પરત પણ મૂકી ગયો હતો. હનુમાન મંદિર નજીક રાકેશે કારથી હરિહરાનંદને છોડ્યા હતા. જે બાદ ખાસવાડી આશ્રમમાં કાળું નામના વ્યક્તિને ત્યાં જવાનું કહીને તે થયા ગુમ થયા હોવાની વાતો વહેતી થઈ હતી.જે બાદ વાડી પોલીસે હરિહરાનંદ સ્વામીની તપાસ હાથધરી હતી જેમાં તેમણે હાથે હરિહરાનંદ સ્વામીએ લખેલી ચિઠ્ઠી અને એક વીડિયો હાથ લાગ્યો હતો.