યુપીના બાહૂબલિ ગેંગસ્ટર અતિક અહેમદને સાબરમતી જેલમાં સિફ્ટ કરાયો છે. હવે ગુજરાતની જેલના રોટલા આ ગેંગસ્ટર તોડશે. જોકે સાબરમતી જેલમાં અતિક અહેમદનો તમામ ખર્ચ યુપી સરકાર ઉઠાવશે.
તમામ દસ્તાવેજી કામગીરી પૂર્ણ થયા બાદ આખરે ગેંગસ્ટર અતિક અહેમદને અમદાવાદની જેલમાં સિફ્ટ કરી દેવાયો છે. છેલ્લા ઘણા સમયથી અતિક અહેમદને યુપીથી ગુજરાત લાવવાની કામગીરી ચાલી રહી હતી. સુપ્રીમ કોર્ટના આદેશ બાદ યુપીની નૈની સેન્ટ્રલ જેલમાંથી સાબરમતી સેન્ટ્રલ જેલમાં અતિક અહેમદને લવાયો છે. વારાણસીથી વિમાન માર્ગે અહેમદને સવારે અમદાવાદ લવાયો હતો. અમદાવાદ એરપોર્ટથી ચુસ્ત સુરક્ષા વચ્ચે તેને જેલમાં ધકેલવામાં આવ્યો હતો.
અમદાવાદની સાબરમતી જેલમાં અનેક કુખ્તાત આરોપીઓ સજા ભોગવી રહ્યા છે. પોતાના કરેલા કર્મોનું ફળ જેલમાં લઈ રહ્યા છે. ત્યાં હવે યુપીમાં કરેલા કાળા કામોની સજા ભોગવવા યુપીનો ગેંગસ્ટર સાબરમતી જેલમાં આવ્યો છે. અતિક અહેમદ પર મોટા ભાગના કેસ યુપી અને બિહારમાં નોંધાયેલા છે. તેની ક્રાઈમ કુંડળી પણ યુપી, બિહારમાં જ રચાયેલી છે. પણ હવે ગુજરાતમાં તેને લાવવામાં આવતા સાબરમતી જેલમાં અતિક અહેમદને લગતો તમામ ખર્ચ યુપી સરકાર ઉઠાવશે. અતિક અહેમદને જેલમાં રાખવાનો ખર્ચ લગભગ એક લાખ રૂપિયા આસપાસ થાય છે. આ ખર્ચને લઈ જે જાણકારી મળી છે તે મુજબ યુપીની નૈની જેલ તંત્રએ લગભગ 4-5 મહિના પહેલા જ ખર્ચનો ડ્રાફ્ટ અમદાવાદ જેલને મોકલવાની તૈયારી કરી લીધી હતી. હવે આ ડ્રાફ્ટ સાબરમતી જેલને મળી પણ ગયો છે.
દેવરિયા જેલમાં વેપારીનું અપહરણ કરી માર મારવાનો મામલો સુપ્રીમ કોર્ટે ગંભીરતાથી લીધો હતો. અતીક અહેમદને ગુજરાતની કોઈ જેલમાં સ્થળાનંતરિત કરવાનો આદેશ કર્યો હતો. જેલમાં મારા મારીની ઘટના સામે આવ્યા બાદ અતીકને દેવરિયા જેલથી બરેલી જેલમાં મોકલી દેવાયો હતો. બરેલીથી નૈની જેલમાં અતિક અહેમદને ટ્રાન્સફર કરાયો હતો. કારણ કે કેસ યુપી અને ગુજરાતની વચ્ચે હતો. જેના કારણે આદેશ મળવામાં વિલંબ થયો. પરંતુ હવે આદેશ મળી ગયા બાદ વિમાન માર્ગે અતિક અહેમદને અમદાવાદ ટ્રાન્ફસર કરી દેવાયો છે.