પ્રતિબંધ / મદ્રાસ હાઈકોર્ટે શરતો સાથે ચીની વીડિયો એપ TikTok પર હટાવી રોક 

ટિકટોકના યુઝર્સ માટે એક સારા સમાચાર સામે આવ્યા છે. મદ્રાસ હાઈકોર્ટે ચીની મોબાઈલ એપ ટિકટોક પરથી 21 દિવસ બાદ પ્રતિબંધ હટાવી લીધો છે. મદ્રાસ હાઈકોર્ટે ત્રીજી એપ્રિલના રોજ આ એપ પર પ્રતિબંધ લગાવ્યો હતો. જે બાદ દૂરસંચાર મંત્રાલયે ગૂગલ અને એપ્પલને પોતાના સ્ટોર પરથી આ એપ હટાવવા માટે નિર્દેશ આપ્યો હતો.

મદ્રાસ હાઈકોર્ટના નિર્ણયને ચીની કંપની બ્રાઈટડાંસે સુપ્રીમ કોર્ટમાં પડકાર્યો હતો અને અપીલ કરી હતી. કંપનીએ કહ્યું હતુ કે પ્રતિબંધ લાગતા તેમની કંપનીને રોજ પાંચ લાખ ડોલરનું નુકસાન થઈ રહ્યું છે.

કંપનીમાં કાર્યરત 250 જેટલા લોકોની નોકરી પણ ખતરામાં છે. આ એપને બ્રાઈટડાંસ ટેકનોલોજીએ બનાવી છે અને તેનું મુખ્યાલય બિજીંગમાં છે. હાલના સમયમાં ટિકટોક એપ ખૂબ જ લોકપ્રિય બની છે. ખાસ કરીને યુવાઓમાં વીડિયો બનાવવાને લઈને આ એપ ખૂબ જ હોટફેવરિટ છે. ભારતમાં જ અંદાજે 30 કરોડ જેટલા યુઝર્સ છે.