ખુલાસો / મધ્યપ્રદેશમાં નકલી દૂધનાં કાળાં કારોબારનો પર્દાફાશઃ ફોરેન્સિક તપાસની તૈયારી

એસટીએફ એસપી રાજેશસિંહ ભદોરિયાએ જણાવ્યું કે આરોપીઓએ કબૂલ્યું છે કે ટેન્કરથી ઘણી બ્રાન્ડેડ કંપનીઓને દૂધનો સપ્લાય કર્યો હતો અને શરૂઆતની તપાસમાં એ પણ સામે આવ્યું છે કે સ્થાનિક સ્તરે સેટિંગ કરી મોટી મોટી બ્રાન્ડેડ કંપનીઓને નકલી દૂધનો સપ્લાય થાય છે.

 

આ ખુલાસા બાદ હવે એસટીએફની તપાસ એ દિશામાં પણ આગળ વધી રહી છે કે કયા સ્તર પર બ્રાન્ડેડ કંપનીઓને દૂધનો સપ્લાય કરાયો હતો, જો સપ્લાય કરાયો તો કોણ કોણ તેમાં સામેલ છે. એસટીએફ એસપી સ્પષ્ટ કહે છે કે જો આ કેસમાં© કોઇ  દોષિત સાબિત થશે તો તેને છોડાશે નહીં.

 

નકલી દૂધના આરોપીઓ સામે કઠોર કાર્યવાહી કરવા માટે અને પુરાવાઓને વધુ મજબૂત બનાવવા માટે એસટીએફ નકલી દૂધની ફોરેન્સિક તપાસ કરવા જઇ રહી છે.  રાજેશસિંહ ભદોરિયાએ જણાવ્યું કે દૂધમાં જે ખતરનાક કેમિકલ ભેળવાયાં છે તે જીવનને નુકસાન પહોંચાડનાર છે.

નકલી દૂધની ફોરેન્સિક તપાસ કરાઇ રહી છે, તેનાથી કેમિકલ એનાલિસિસ કરીને સમગ્ર ઘટનાની યોગ્ય તપાસ થઇ શકશે. ફૂડ વિભાગ જે તપાસ કરે છે તે સામાન્ય હોય છે. ફૂડ લેબમાં માત્ર દૂધના બેઝિક કન્ટેન્ટની તપાસ થાય છે, પરંતુ ફોરેન્સિક તપાસમાં કયા પ્રકારનાં ખતરનાક કેમિકલ ભેળવવામાં આવ્યાં તેની તપાસ થાય છે.