વરસાદ / મધ્યપ્રદેશમાં મેઘરાજાએ સર્જ્યો કહેર, નદીઓએ વિકરાળ રૂપ ધરતાં અનેક ગામડાંઓ બન્યાં સંપર્કવિહોણાં

મધ્યપ્રદેશનાં અનેક શહેરો અને ગામોમાં ભારે વરસાદનો બીજો તબક્કો શરૂ થઈ ગયો છે. સતત વરસી રહેલા વરસાદનાં કારણે ફરી એક વાર નદીઓ બે કાંઠે વહી રહી છે. અનેક નદીઓ ભયજનક સપાટી પરથી વહી રહી છે. મધ્યપ્રદેશનાં સિહોરની નેવજ નદી ભયજનક સપાટી વહાવી ચૂકી છે. નદીઓની આસપાસ રહેતા નાગરિકો ધસમતા વહેણ વચ્ચેથી પસાર થવા મજબૂર બન્યાં છે. આવી જ રીતે નદી વચ્ચેથી પસાર થતા એક પિતા પુત્ર નદીના ધસમતા વહેણમાં વહેવા લાગ્યા હતાં.

પિતા પુત્રનું નદીમાં તણાવાનું દ્રશ્ય જોઈ રહેલા લોકોમાં કોલાહલ મચી ગયો. લોકો સમજી શકતા ન હતા કે આ બન્નેને કેમ બચાવવા. પરંતુ ત્યારે એવું થયું જેની કોઈએ કલ્પના પણ કરી ન હોતી. પાણીમાં વહેતા પિતા પુત્રનો જીવ બચાવવા માટે બે સ્થાનિક યુવકોએ ધસમસતી નદીમાં છલાંગ મારી દીધી. ધસમસતી નદી પિતા અને પુત્રને તાણી જવાનું મન બનાવી ચૂકી હતી. પરંતુ આ બન્ને યુવકોએ પણ તેમને બચાવવાની જિદ પકડી લીધી હતી. થોડી જ વારમાં બન્ને યુવકો તણાઈ રહેલા પિતા-પુત્ર પાસે પહોંચી ગયા અને ધસમસતી નદીના વહેણ વચ્ચેથી બન્ને લોકોને સહી સલામત રીતે બહાર કાઢી બચાવી લીધાં.

તો આ તરફ રતલામમાં ગઈ રાત્રે સતત બે કલાક પડેલા વરસાદના કારણે શહેરની તસવીર જ બદલાઈ ગઈ. સડકો જાણે નદીઓનાં વહેણ બની ગઈ અને અનેક વિસ્તારોમાં પાણી ભરાઈ ગયાં. શહેરનાં અનેક વિસ્તારોમાં ઘુટણસમા પાણી ભરાઈ ગયાં. તો આ તરફ વરસાદનાં કારણે છીંદવાડામાં પણ ઠેર-ઠેર પાણી ભરાઈ ગયા હતાં. નદી નાળા બધું છલકાઈ ગયું છે. સ્થિતિ એ સર્જાઈ છે કે, અનેક ગામડાંઓનો શહેર સાથેનો સંપર્ક કપાઈ ગયો છે.

લોકોનાં મકાનોમાં પાણી ભરાઈ ગયા છે. શહેરનાં નાના-મોટા તમામ પુલો પાણીમાં ડૂબાયેલા જોવા મળી રહ્યાં છે. તો આ તરફ છીંદવાડાનાં માચાગોડા બંધનાં તમામ આઠ ગેટ ખોલવા પડ્યાં હતાં. જેનાં કારણે નીચાણવાળા વિસ્તારમાં નદી નાળા પરના પૂલ પાણીમાં ગરકાવ થઈ ગયા છે. છતાં લોકો પોતાના વાહનો દ્વારા જોખમી રીતે પુલ પસાર કરી રહ્યાં હતાં. નદીમાં કોઝ વે પરથી પાણી વહી રહ્યું છે છતાં માલવાહક ટ્રકનાં ડ્રાઈવરે તેને પાણીમાં ઉતાર્યો અને પછી ટ્રક થોડો ચાલ્યો પરંતુ તરત જ પાણીનાં વહેણમાં ઉથલી પડ્યો. જો કે આ ઘટનામાં ટ્રક ડ્રાઈવરનો આબાદ બચાવ થયો હતો.

મધ્ય પ્રદેશમાં વરસાદને કારણે સ્થિતિ વણસી છે. પરંતુ રાહતની વાત એટલી છે કે વહીવટી તંત્ર અને સ્થાનિક લોકો દ્વારા એકબીજાની મદદ કરીને આ કુદરતી આપત્તિને ખાળવા પ્રયાસ કરાઈ રહ્યો છે. વળી ગત વર્ષે પડેલા અપર્યાપ્ત વરસાદને કારણે કૃષિ  અને પીવાના પાણીની તંગી સર્જાઈ હતી. તેની હાલત આ વર્ષે સર્જાશે નહીં એ રાહતની વાત છે.