કાર્યવાહી / હનીટ્રેપમાં વૃદ્ધ પાસેથી 2.69 કરોડ ખંખેરવા મામલે એક આરોપીની ધરપકડ, PI-CBIના નામે કરતાં હતા બ્લેકમેલ

• અમદાવાદના 68 વર્ષીય બિઝનેસમેન હનીટ્રેપમાં ફસાયા
• બિઝનેસમેને 11 લોકો સામે સાયબર ક્રાઈમમાં નોંધાવી ફરિયાદ
• પોલીસે હનીટ્રેપ મામલે 1 આરોપીની કરી ધરપકડ

અમદાવાદના 68 વર્ષીય બિઝનેસમેન હનીટ્રેપમાં ફસાયા હોવાની ઘટના સામે આવી છે. જેને પગલે બિઝનેસમેને 11 લોકો સામે સાયબર ક્રાઈમમાં નોંધાવી ફરિયાદ નોંધાવી હતી. જેની તપાસ બાદ પોલીસે હનીટ્રેપમાં સંડોવાયેલ 1 આરોપીની ધરપકડ કરી કાર્યવાહી હાથ ધરી છે. જેની પૂછપરછમા સામે આવ્યું કે આરોપી અને  બિઝનેસમેન સાથે મિત્રતા હતી. ત્યારબાદ રૂપિયા ચાઉ કરી જવાના ઇરાદે જેમાં આરોપીએ મિત્રતા કેળવી બિઝનેસમેનન બીભત્સ વીડિયો બનાવી લીધો હતો.ત્યારબાદ વીડિયો વાયરલ કરવાની ધમકી આપી બિઝનેસમેન પાસેથી 2.69 કરોડ જેટલી જંગી રકમ પડાવી લીધી હતી.

શુ હતી સમગ્ર ઘટના?

નવરંગપુરા વિસ્તારમાં રહેતા ૬૮ વર્ષીય વૃદ્ધ એક ખાનગી કંપનીમાં એડ્વાઈઝર અને ડાયરેક્ટર તરીકે ફરજ બજાવે છે. ૮ ઓગસ્ટ, ર૦રરના દિવસે રાતના  દસ વાગ્યાની આસપાસ તેઓ તેમના ઘરે હાજર હતા તે દરમિયાન તેમના મોબાઇલ નંબર પર વોટ્સએપમાં રિયા શર્મા નામની એક યુવતીનો મેસેજ આવ્યો હતો, જેથી વૃદ્ધે ‌રીપ્લાય આપતાં યુવતીએ પોતે ગુજરાતના મોરબીથી વાત કરી રહી હોવાનું જણાવ્યું હતું. ત્યાર બાદ તરત જ તેણે વીડિયો કોલ કર્યો હતો અને પોતે વર્ચ્યુઅલ સેક્સ કરવાનું કહીને યુવતીએ કપડાં કાઢી નાખ્યાં હતાં, બાદમાં વૃદ્ધે પણ તેનાં કપડાં ઉતાર્યાં હતાં. લગભગ એકાદ મિ‌નિટ સુધી વીડિયો કોલ ચાલ્યા બાદ યુવતીએ વીડિયો કોલ કટ કરી દીધો હતો.

નિર્વસ્ત્ર વીડિયો ક્લિપ ઉતારી 
થોડી વાર બાદ યુવતીએ  વીડિયો ક્લિપ વૃદ્ધને મોકલી આપી હતી. અને સો‌શિયલ મીડિયામાં વાઈરલ કરી દેવાની ધમકી આપીને રૂ‌પિયા પ૦ હજારની માગણી કરી હતી, જેથી વૃદ્ધે બદનામીના ડરથી યુવતીને પ૦ હજાર ટ્રાન્સફર કરી તેનો નંબર બ્લોક કરી દીધો હતો. થોડા સમય બાદ ‌દિલ્હીથી પોલીસ ઇન્સ્પેક્ટર ગુડ્ડુ શર્માની ઓળખ આપી  અજાણ્યા નંબર પરથી વૃદ્ધ પર ફોન આવ્યો હતો અને તેણે વૃદ્ધને કહ્યું હતું કે તમારો સેક્સી વીડિયો અમારી પાસે છે તેમ કહી રૂપિયા ત્રણ લાખ પડાવ્યા હતા. ૧૩ ઓગસ્ટના દિવસે સતીશ નામની વ્યક્તિએ ફોન કરી તેણે આ વીડિયો ગુડ્ડુ પાસેથી મેળવ્યો હોવાનું જણાવી જો રૂપિયા એક લાખ નહીં આપે તો ફરિયાદ દાખલ કરાવી દેવાની ધમકી આપી હતી, જેથી વૃદ્ધે તેને પણ એક લાખ રૂપિયા આપ્યા હતા.

પોલીસની ઓળખ આપી રૂપિયા સેરવ્યા
૧૪ ઓગસ્ટે ‌દિલ્હી સાયબર ક્રાઇમથી પોલીસ ઇન્સ્પેક્ટર ગોસ્વામીની ઓળખ આપીને વૃદ્ધ પર ફોન આવ્યો હતો, જેમાં તેણે કહ્યું હતું કે ‌રિયાએ સ્યુસાઇડ કરવાની કોશિશ કરી છે અને તે હોસ્પિટલમાં છે. તેણે આત્મહત્યા કરવા માટે તમને જવાબદાર ઠેરવ્યા છે. તમારે આ કેસમાંથી બચવું હોય તો હું કહું તે પ્રમાણે પૈસા ટ્રાન્સફર કરી દો, નહીં તો તમારી વિરુદ્ધ ફરિયાદ કરીને તમારી અટકાયત કરવી પડશે. આ સાથે તમારા વીડિયો સોશિયલ મીડિયામાં વાઈરલ કરી દઇશ તેમ કહીને વૃદ્ધ પાસેથી ૮૦.૭૭ લાખ રૂપિયા પડાવી લીધા હતા.

યુવતીએ સ્યુસાઇડનો પ્રયાસ કર્યો છે, જેની ફરિયાદ અમારી પાસે છે. જો તમારે ધરપકડથી બચવું હોય અને ઇજ્જત બચાવવી હોય તો અમે કહીએ તેટલા રૂ‌િપયા આપવા પડશે તેમ કહ્યું હતું. અમે અમારા ખાતાના દરેક અધિકારીને રૂપિયા આપીને એફઆઇઆર દફતરે કરીશું તેમ જણાવી વૃદ્ધ પાસેથી ર૯.૩પ લાખ પડાવ્યા હતા. ર૩ નવેમ્બરે જયપુરથી અશોક નામની વ્યક્તિનો ફોન આવ્યો હતો કે યુવતીનાં પરિવારજનોએ ફરિયાદ કરી છે, તમારી ધરપકડ કરવા ૧ર માણસોની ટીમ નીકળી ગઈ છે અને મોબાઇલમાં સાઈરનનો અવાજ પણ સંભળાવ્યો હતો. પોલીસનો ખર્ચ, યુવતીનાં કુટુંબીજનોને વળતર તેમજ કેસ પૂરો કરવાના બહાને વૃદ્ધ પાસેથી બીજા ૧૯.૭૦ લાખ પડાવી લીધા હતા.

કટકે કટકે વૃદ્ધ પાસેથી ૨.૬૯ કરોડ પડાવી લીધા

વૃદ્ધ પાસેથી અલગ અલગ પોલીસ અધિકારીની ઓળખ આપીને જુદાં જુદાં બહાનાં બનાવી  કુલ રૂપિયા ૨.૬૯ કરોડ પડાવી લીધા હતા. વધુ રૂપિયાની માગણી થતી હોવાથી આખરે વૃદ્ધે કંટાળીને સાયબર ક્રાઇમ પોલીસ સ્ટેશનમાં ફરિયાદ નોંધાવી છે. પોલીસે આ મામલે ગુનો નોંધી વધુ તપાસ શરૂ કરી છે. ‌દિલ્હીની ટોળકીએ ખાનગી કંપનીના એડ્વાઈઝર અને ડાયરેક્ટરને હની ટ્રેપમાં ફસાવ્યાઃ પોલીસ, સાયબર ક્રાઇમ, સીબીઆઈના સ્પેશિયલ અધિકારીના નામે વૃદ્ધ પાસે ડરાવી-ધમકાવી કેસની પતાવટ માટે ટુકડે ટુકડે કરોડોનો તોડ કર્યો હતો