ફ્યૂઝ ઉડાવતું ફ્રોડ / મેડમ, હું વીજળી વિભાગમાંથી બોલું છું...: 30 રૂપિયા બચાવવાના ચક્કરમાં 97000 ગયા, પાવરકટ ટોળકીથી થઈ જજો સાવધાન 

• દેશમાં પાવરકટ ટોળકીથી થઈ જજો સાવધાન 
• હું વીજળી વિભાગમાંથી બોલું છું... અને મહિલાના 97000 ગયા
• ગુજરાતમાં પણ સક્રિય છે 'પાવરકટ ટોળકી' 

દેશમાં વધી રહેલા સાયબર ક્રાઈમના કેસ ખરેખર ચિંતાનું કારણ છે. જોકે સાયબર ક્રાઈમ બ્રાન્ચ આ કેસોમાં ઘણી મદદ કરે છે. પરંતુ કડક નિયમો અને કડક સજાની સાથે નાગરિકોમાં જાગૃતિ પણ હોવી જોઈએ જેથી કરીને તેઓ કોઈની જાળમાં ફસાઈ ન જાય અને પોતાના પૈસાની રક્ષા કરી શકે. હાલમાં જ ઉત્તર પ્રદેશના ગાઝિયાબાદમાંથી સાયબર ક્રાઈમનો એક ગંભીર કિસ્સો પ્રકાશમાં આવ્યો છે. તો વળી ગુજરાતમાં પણ આવી અનેક ઘટનાઓ સામે આવતી હોય છે. તેવામાં દરેક વ્યક્તિએ આવી છેતરપિંડીથી બચવા શું ધ્યાન રાખવું જોઈએ તે અમે આપને જણાવીશું. 

ગાઝિયાબાદમાં મહિલાએ 30 રૂપિયા બચાવવાના ચક્કરમાં 97,000 ખોયા 

ગાઝિયાબાદની રહેવાસી અંજલિ રાણાએ નોંધાવેલી ફરિયાદ મુજબ તેમણે અજાણ્યા નંબર પરથી ફોન આવ્યો હતો. ફોન કરનાર વ્યક્તિ વિદ્યુત વિભાગના અધિકારી તરીકે ઓળખાવતો હતો. આ વ્યક્તિએ પીડિતને વીજળીનું બિલ અપડેટ કરવાનું કહ્યું અને કહ્યું કે બિલમાં 30 રૂપિયાથી ઓછા છે. 30 રૂપિયા બચાવવાના ચક્કરમાં પીડિતા હેકરના ચક્કરમાં ફસાઈ ગઈ. આરોપીએ પીડિત અંજલિને Paytm નંબર પર 30 રૂપિયા મોકલવાનું કહ્યું અને પૈસા આવતા જ તેનો ફોન હેક કરી લીધો. આ પછી પીડિતને 97,000 રૂપિયા કાપવાનો મેસેજ આવ્યો, જેના પછી તેને ખબર પડી કે તેની સાથે છેતરપિંડી થઈ છે. ગાઝિયાબાદની રહેવાસી અંજલિ રાણાએ પોલીસમાં ફરિયાદ નોંધાવી છે અને કેસ નોંધ્યો છે. સાયબર સેલની મદદથી મામલાની તપાસ કરવામાં આવી રહી છે. સ્ટેશન ઈન્ચાર્જનું કહેવું છે કે ટૂંક સમયમાં જ આરોપીઓની ધરપકડ કરવામાં આવશે.

ગુજરાતમાં પણ વીજ કંપનીના નામે મસમોટું ષડયંત્ર 

વીજ કંપનીના નામે મસમોટું ષડયંત્ર ચાલી રહ્યું છે. વીજબિલના નામે લોકો સાથે છેતરપિંડી આચરવામાં આવી છે. એટલે કે જો તમને તમારું વીજ કનેકશન કપાઈ જશે એવો મેસેજ આવે તો ચેતી જજો. તમારુ બાકી લાઈટબીલ ભરવાનું છે તેવો કોલ આવે તો સાવધ થઇ જજો નહીં તો છેતરાઇ જશો.

જુઓ સાયબર માફિયાઓ કઇ રીતે ગ્રાહકોને છેતરી રહ્યાં છે ?

સૌ પહેલા તો સાયબર માફિયાઓ ગ્રાહકોને ફોન કરે છે. બાદમાં ગ્રાહકને વીજબીલ પ્રોસેસ થવાનું બાકી છે તેમ કહેવામાં આવે છે. ગ્રાહકને એવું ઠસાવી દેવાય છે કે પેમેન્ટ ભલે કર્યું છે પરંતુ તે ઓનલાઈન બતાવતું નથી. ઠગબાજ ગ્રાહકને ટીમ વ્યુઅર એપ ડાઉનલોડ કરવાનું કહે છે. બાદમાં જો ગ્રાહક ટીમ વ્યુઅર એપ ડાઉનલોડ કરે છે તો તેના મોબાઈલનો કંટ્રોલ મળે છે. બાદમાં ગ્રાહકને ઓનલાઈન પેમેન્ટની ફરજ પાડવામાં આવે છે. ટીમ વ્યુઅરના પાસવર્ડથી ગ્રાહકની તમામ વિગતો ઠગબાજને મળી જાય છે. આમ, આ રીતે સંપૂર્ણ માસ્ટર પ્લાન ઘડાય છે કે જેના દ્વારા વીજ વપરાશકારોને વીજળીથી પણ તીવ્ર ઝટકો મળે છે.

સાવચેત રહેવા જુઓ સાયબર એક્સપર્ટે શું ટિપ્સ આપી ?

આથી, આ અંગે સાયબર એક્સપર્ટ દ્વારા લોકોને સાવચેત રહેવા માટેની ટિપ્સ અપાઇ છે. જેમાં સાયબર એક્સપર્ટનું કહેવું છે કે, 'વીજ કંપનીના નામે મેસેજ કરતાં લોકો પાસે તમારી માહિતી નથી હોતી. તમે જાતે તમારી માહિતી ઠગબાજોને આપો છો. તમારી માહિતી મેળવી તમારી જ સામે તેનો ઉપયોગ કરે છે. આ માહિતી થકી તમારૂં એકાઉન્ટ ખાલી થઇ શકે છે.'

Torrent Power કંપનીએ શું કહ્યું ? 

વીજ ગ્રાહકો સાથે થઇ રહેલી છેતરપિંડી અંગે ટોરેન્ટ પાવરે સ્પષ્ટતા કરતા જણાવ્યું કે, 'અમારા તરફથી ગ્રાહકોને ખાનગી નંબરથી મેસેજ નથી મોકલાતા. અમે માત્ર ઓફિશિયલ નંબરથી ગ્રાહકોને મેસેજ કરીએ છીએ. ઓફિશિયલ સેન્ટર ID T-POWER પરથી જ મેસેજ કરીએ છીએ. ખાનગી નંબરથી આવતા મેસેજ પર ધ્યાન ન આપવામાં આવે. ગ્રાહકને શંકા જાય તો બિલ પર લખેલા હેલ્પલાઈન પર સંપર્ક કરો. બિલ ન ભર્યું હોય તો કોઈપણ વીજ કંપની વોટ્સએપ મારફતે જણાવતી નથી. રાત્રે સાડા નવ વાગે વીજ કનેક્શન કપાઈ જશે તેવો મેસેજ વીજ કંપની નથી કરતી. જો ગ્રાહક વીજ બિલ ન ભરે તો પહેલા નોટિસ આપવામાં આવે છે. નોટિસ આપ્યા બાદ ગ્રાહકને વીજ બિલ ભરવા સમય અપાય છે. નોટિસ પર ગ્રાહકની પ્રતિક્રિયા ન આવે તો જ વીજ કનેક્શન કપાય છે. માત્ર એક મેસેજના કારણે ગ્રાહકોએ ગભરાવાની જરૂર નથી.'