ગુજરાતમાં એક તરફ કોરોના સંકટ યથાવત જોવા મળી રહ્યું છે.ત્યારે બીજી તરફ રાજ્યમાં આગામી રાજ્યસભાની ચૂંટણીને લઇને રાજકારણ ગરમાયું છે. કોંગ્રેસના ધારાસભ્યોના રાજીનામાં બાદ રાજ્યમાં ભાજપ અને કોંગ્રેસ બંને પક્ષો દ્વારા એડીચોટીનું જોર લગાવામાં આવી રહ્યું છે. જો કે આ બધા વચ્ચે રાજ્યના પાટનગર ગાંધીનગર ખાતે લોકરક્ષક દળની પરીક્ષા મુદ્દે ફરી એક વખત આંદોલનના એંધાણ દેખાઇ રહ્યાં છે.
LRD મુદ્દે ગાંધીનગરમાં ફરી એક વખત થશે આંદોલન
LRDના પુરૂષ ઉમેદવારોનું અમદાવાદ કલેક્ટરને આવેદન
અમારા મુદ્દાનો ઉકેલ નહીં આવે તો ફરીથી આંદોલન
લોકરક્ષક દળની પરીક્ષા મુદ્દે ગાંધીનગરમાં ફરી એક વખત આંદોલન થશે. LRDના પુરૂષ ઉમેદવારોએ અમદાવાદ કલેક્ટરને આવેદન આપ્યું છે. સરકાર દ્વારા બંધારણ વિરૂદ્ધ જઈને પુરૂષો સાથે અન્યાય થયો હોવાનો ઉમેદવારોએ આક્ષેપ કર્યો છે.
આ મામલે ઉમેદવારોએ લોકડાઉન દરમિયાન અઢી લાખ જેટલા મેઈલ કર્યા છે. જોકે સરકાર દ્વારા કોઈ જવાબ આપવામાં આવ્યો નથી. ત્યારે હવે ઉમેદવારોએ સરકારને 15 તારીખ સુધીનું અલ્ટીમેટમ આપ્યું છે. પ્રશ્નોનો હલ નહી થાય તો ઉમેદવારોએ 15 તારીખ પછી ગાંધીનગરમાં ફરી આંદોલન કરવાની ચીમકી ઉચ્ચારી છે.
સુરેન્દ્રનગરમાં LRD પુરૂષ ઉમેદવારો દ્વારા આવેદન
સુરેન્દ્રનગરમાં પણ LRD પુરૂષ ઉમેદવારો દ્વારા આવેદન આપવામાં આવ્યું છે. પુરૂષ ઉમેદવારોએ જિલ્લા કલેકટરને આવેદન આપ્યું છે...મહિલા ઉમેદવારો સામે પુરૂષ ઉમેદવારોની બેઠકો વધારવા માંગ કરવામાં આવી છે. રાજ્ય સરકાર દ્વારા યોગ્ય ઉકેલ લાવે તેવી કરી રજૂઆત કરાઇ છે..જો ઉકેલ ન આવે તો ગાંધીનગર ખાતે ઉગ્ર આંદોલનની ચીમકી પણ ઉચ્ચારી છે.