લોકરક્ષક દળનું પેપર લીકકાંડ મામલે વડોદરામાંથી વધુ 2 યુવકોની અટકાયત કરવામાં આવી છે. ગાંધીનગર ATSએ 2 યુવકોની અટકાયત કરી છે.
પેપર લીકકાંડમાં સંડોવણીની આશંકાએ કપુરાઈ ચોકડી પરથી બન્ને યુવકની અટકાયત કરવામાં આવી છે. આ અટકાયત કરાયેલા બન્ને યુવકના યશપાલ અને મનહર પટેલ સાથે કનેક્શન હોવાની સંભાવના છે.
ઉલ્લેખનીય છે કે રાજ્યમાં લોકરક્ષક દળનું પેપર લીકકાંડના સૂત્રધાર યશપાલસિંહ સોલંકીની પોલીસે ધરપકડ કરી લીધી છે. ક્રાઈમબ્રાંચ અને ATSએ મહિસાગરના વિરપુર ગામમાંથી યશપાલને મોડી રાત્રે ઝડપી લીધો હતો.
યશપાલની ધરપકડ બાદ હવે તેને ગાંધીનગર લાવવાની કવાયત હાથ ધરવામાં આવી છે. મહત્વનું છે કે યશપાલ પેપરકાંડનો સૂત્રધાર છે અને અન્ય ઉમેદવારો સાથે દિલ્લી ગયો હતો.
જ્યારે બીજી તરફ ગુજરાતમાં લોકરક્ષક પરીક્ષાનું પેપર લીક થતા તમામ ઉમેદવારોમાં ભારે રોષ જોવા મળી રહ્યો છે. ત્યારે આ મામલે આરોપીઓનું આજે પોલીસ રિકન્ટ્રક્શન કરી શકે છે. ચિલોડા ખાતે લઈ જઈ આરોપીઓનું રિકન્ટ્રક્શન થઈ શકે છે.