ગાંધીનગરઃ લોકરક્ષક દળનું પ્રશ્ન પેપર લીક થવાના મામલે તપાસનો ધમધમાટ ચાલી રહ્યો છે ત્યારે જિલ્લાઓની LCB અને SOGએ તપાસ શરૂ કરી છે. ગાંધીનગર પોલીસ ATS અને ક્રાઇમ બ્રાન્ચે પણ સઘન તપાસ હાથ ધરી છે. પેપર લીકના કેસના મૂળમાં ગાંધીનગર હોવાનું જાણવા મળી રહ્યું છે.
ગાંધીનગરથી પેપર અલગ-અલગ જિલ્લાના દલાલો સુધી પહોંચ્યું હોવાનું જાણવા મળ્યું હતું. ત્યારે પેપરલીક કેસમાં સરકારી અધિકારીઓની પણ સંડોવણી હોવાની આશંકા છે. હાલ પોલીસ દ્વારા અલગ-અલગ જિલ્લાઓમાંથી 5થી વધુ લોકોની અટકાયત કરવામાં આવી છે. લોકરક્ષક દળ સમિતિના અધિકારીઓની પણ પૂછપરછ કરવામાં આવી છે. પેપર લીક મામલે ગાંધીનગરમાં પોલીસ ફરિયાદ પણ નોંધવામાં આવી શકે છે.
5 શખ્સોની કરાઇ અટકાયત
અત્યાર સુધી 5થી વધુ શખ્સોની અટકાયત કરવામાં આવી છે. સમગ્ર મામલે સરકારી અધિકારીઓની સંડોવણી હોવાની આશંકા સેવાઈ રહી છે ત્યારે ATS અને ક્રાઈમબ્રાંચ પણ તપાસ કામગીરીમાં જોડાઈ છે.
પોલીસના વડાએ દાવો કર્યો છે કે પેપરલીક કાંડના ગુનેગારો અમારા હાથમાં છે. પેપર લીક થયાના 5 કલાકમાં જ DGP શિવાનંદ ઝાએ એવો દાવો કર્યો છે કે જે વ્યક્તિએ આ કૃત્ય કર્યું છે ત્યાં સુધી અમારી પહોંચ છે.