ગાંધીનગર: આજે લોકરક્ષકદળ ભરતી માટેની પ્રેક્ટિકલ પરીક્ષા રાજ્યમાં 6 વિવિધ પોલીસ ગ્રાઉન્ડ પર યોજાશે. અમદાવાદ, ગાંધીનગર, વાવ, રાજકોટ, સુરત અને નડિયાદમાં યોજાનારી પ્રેક્ટિકલ પરીક્ષામાં આજે પ્રથમ દિવસે 750 ઉમેદવારો પરીક્ષા આપશે.
આજથી શરૂ થતી પ્રેક્ટિલ પરીક્ષા 8માર્ચ સુધી યોજાશે. દરેક કેન્દ્ર પર 1 આઈજી અને ડીઆઈજી કક્ષાના અધિકારી તહેનાત રહેશે, એસપી કક્ષાના 1 અધિકારી સુપરવાઈઝર તરીકે હાજર રહેશે. રનિંગની ચકાસણી માટે આરએફ આઈડી ટેકનોલોજીનો પ્રયોગ કરવામાં આવશે.
ઉલ્લેખનીય છે કે, રનિંગ એરિયા પર સીસીટીવીથી નજર રાખવામાં આવશે. તમામ 6 સ્થળો પર પરીક્ષાર્થીની બાયોમેટ્રિક તપાસ થશે અને ફિંગર પ્રિન્ટ તપાસવામાં આવશે. રક્ષા શક્તિ યુનિવર્સિટીના કોંન્ફરન્સ હોલમાં સેન્ટ્રલ કન્ટ્રોલ રૂમની વ્યવસ્થા કરવામાં આવી છે.
કટઓફ તાજેતરમાં કરાયા છે જાહેર
રાજ્યમાં લેવાયેલ લોકરક્ષક પરીક્ષા માટે કટઓફ માર્ક જાહેર કરવામાં આવ્યા છે. જેમાં જનરલ કેટેગરીના પુરુષો માટે કટઓફ માર્ક 65 જાહેર કરાયા છે. જનરલ કેટેગરીની મહિલાઓ માટે કટઓફ માર્ક 47 જાહેર કરાયા છે. SCના પુરુષ ઉમેદવારો માટે કટઓફ માર્ક 58.25 જાહેર કરાયા છે.
SCની મહિલા ઉમેદવારો માટે કટઓફ માર્ક 41 જાહેર કરાયા છે. STના પુરુષ ઉમેદવારો માટે કટઓફ માર્ક 46.25 જાહેર કરાયા છે. ST અને OBC મહિલા ઉમેદવારો માટે કટઓફ માર્ક 40 જાહેર કરાયા છે. OBC પુરુષ ઉમેદવારો માટે કટઓફ માર્ક 58.75 જાહેર કરાયા છે.
કટઓફ માર્ક પ્રમાણે કુલ 54224 પુરુષ ઉમેદવારો જ્યારે કુલ 21657 મહિલા ઉમેદવારો શારીરિક કસોટી માટે પાસ થઈ છે. લોકરક્ષકની પરીક્ષામાં અંદાજીત 8 લાખ વિદ્યાર્થીઓએ હાજરી આપી હતી. 9 હજાર જગ્યા માટે લોકરક્ષક દળની પરીક્ષા લેવાઈ હતી. એકવાર પેપર લીક થતા પરીક્ષા રદ્દ થઈ હતી અને ફરી લેવાઈ હતી.
મહત્વનું છે કે 26 ફેબ્રુઆરીથી 9 માર્ચ સુધી LRDની ભરતી માટે શારીરિક કસોટી યોજાશે. શારીરિક કસોટી માટે ગ્રાઉન્ડ અને કંટ્રોલ રૂમ ફાળવવા વિકાસ સહાયે પત્ર લખ્યો હતો.