ભાવવધારો / હવે તો ખાવાનું પણ છોડી દઈએ તો થાય! છેલ્લા 8 વર્ષમાં 2.5 ગણાં થયા ગેસના ભાવ, સબસિડી પણ ગઈ

• મોંઘવારી વચ્ચે રસોઈ ગેસના ભાવવધારાથી જનતા પરેશાન
• ઘરના એલપીજી સિલિન્ડરની કિંમત ફરીથી 50 રૂપિયા વધારાઈ
• છેલ્લાં 8 વર્ષમાં સિલિન્ડરના ભાવમાં આશરે અઢી ગણો વધારો થયો

રસોઈ ગેસના વધતા ભાવવધારાથી સામાન્ય જનતા પરેશાન

દિલ્હીમાં હવે ઘરના LPG સિલિન્ડર 1053 રૂપિયામાં મળશે. રેકોર્ડબ્રેક મોંઘવારીની વચ્ચે રસોઈ ગેસના વધતા ભાવવધારાથી સામાન્ય જનતા પરેશાન છે. એક દિવસ પહેલા જ ઘરના એલપીજી સિલિન્ડરની કિંમત ફરીથી 50 રૂપિયા વધારવામાં આવી છે. ઐતિહાસિક આંકડા પર વિચાર કરીએ તો છેલ્લાં 8 વર્ષમાં રસોઈ ગેસ સિલિન્ડરના ભાવમાં આશરે અઢી ગણો વધારો થયો છે. 

એક દિવસ પહેલા ફરીથી વધ્યાં રસોઈ ગેસના ભાવ 

સરકારી ઑઈલ માર્કેટીંગ કંપની ઈન્ડિયન ઑઈલ કોર્પોરેશનના આંકડા મુજબ માર્ચ 2014માં સબ્સિડીવાળા એલપીજી સિલિન્ડરની કિંમત 410 રૂપિયા હતી. હાલમાં થયેલા વધારા બાદ 14.2 kg વાળા ઘરના LPG સિલિન્ડરના ભાવમાં 50 રૂપિયાનો વધારો કરવામાં આવ્યો છે. દિલ્હીમાં હવે ઘરના LPG સિલિન્ડર 1053 રૂપિયામાં મળશે. 14.2 kg વાળા સિલિન્ડરની સાથે-સાથે 5kg વાળા નાના ઘરના સિલિન્ડરના ભાવ પણ વધારવામાં આવ્યાં છે. જેના ભાવમાં પ્રતિ સિલિન્ડરે 18 રૂપિયાનો વધારો કરવામાં આવ્યો છે. આ રીતે જોઈએ તો ઘર વપરાશમાં લેવામાં આવતા 14.2 kg સિલિન્ડરના ભાવ છેલ્લાં 8 વર્ષમાં અંદાજે 157 ટકા વધ્યા છે.

એક વર્ષમાં આટલા વધ્યાં રસોઈ ગેસના ભાવ 

છેલ્લા એક વર્ષમાં દિલ્હીમાં ઘરના ગેસ સિલિન્ડર આશરે 219 રૂપિયા મોંઘા થયા છે. એક વર્ષ પહેલા તેની કિંમત 834.50 રૂપિયા હતી. જે હવે વધીને 1053 રૂપિયે પહોંચી ગઇ છે. 14.2 કિલોવાળા ઘરના એલપીજી સિલિન્ડરના ભાવમાં આની પહેલા 19 મેના રોજ વધારો કરાયો હતો ત્યારે તેની કિંમતમાં ચાર રૂપિયાનો વધારો થયો હતો. આની પહેલા 22 માર્ચે પણ ઘરના એલપીજી સિલિન્ડરની કિંમતોમાં 50 રૂપિયાનો વધારો થયો હતો.