હાય રે મોંઘવારી ! / વધ્યાં રસોઈ ગેસના ભાવ, જાણો હવે કેટલામાં મળશે સિલિન્ડર

• મોંઘવારીનો ઝાટકો, ફરી એક વખત વધ્યાં રસોઈ ગેસના ભાવ
• 14.2 કિલોગ્રામવાળા LPG ગેસ સિલિન્ડરના ભાવમાં 25 રૂપિયાનો વધારો
• 19 કિલોગ્રામ કોમર્શિયલ ગેસ સિલિન્ડરના ભાવમાં 75 રૂપિયાનો વધારો

દેશની ઓઈલ માર્કેટિંગ કંપનીઓએ 14.2 કિલોગ્રામવાળા એલપીજી રસોઈ ગેસ સિલિન્ડરની કિંમતમાં 25 રૂપિયાનો વધારો કર્યો છે. જ્યારે 19 કિલોગ્રામ કોમર્શિયલ ગેસ સિલિન્ડરની કિંમતમાં 75 રૂપિયાનો વધારો થયો છે.

14.2 કિલોવાળા સિલિન્ડરની કિંમત

દિલ્હીમાં 14.2 કિલોગ્રામવાળા સબસિડી વગરના એલપીજી સિલિન્ડર 859.50 રૂપિયાથી વધીને 884.5 રૂપિયા થયો છે. કલકત્તામાં સિલિન્ડરના ભાવ 886થી વધીને 911 રૂપિયા થયા છે. જ્યારે મુંબઈમાં આ 859.50 રૂપિયાથી વધીને 884.5 રૂપિયા અને ચેન્નઈમાં 875.50 રૂપિયાથી વધીને 900.5 રૂપિયા થઈ ગયા છે.

પહેલાં સીએનજી અને પીએનજીના ભાવમાં થયો હતો વધારો

દિલ્હીમાં હવે કોમર્શિયલ સિલિન્ડરની કિંમત વધીને 1693 રૂપિયા થઈ છે. કલકત્તામાં તેની કિંમત 1772 રૂપિયા, મુંબઈમાં 1649 રૂપિયા અને ચેન્નઈમાં આ 1831 રૂપિયા થયા છે. તાજેતરમાં દેશમાં દિલ્હી, નોઈડા, ગ્રેટર નોઈડા અને ગાજિયાબાદના લોકોને સીએનજી અને પીએનજીની કિંમતો વધારીને ઝાટકો આપ્યો છે. ઈન્દ્રપ્રસ્થ  ગેસ લિમિટેડે સીએનજીના ભાવમાં વધારો કર્યો છે. રાષ્ટ્રીય રાજધાની દિલ્હીમાં હવે સીએનજીની કિંમત 45.20 રૂપિયા પ્રતિ કિલોગ્રામ જ્યારે  પીએનજીની કિંમત 30.91 રૂપિયા પ્રતિ એસસીએમ છે. નોએડા, ગ્રેટર નોઈડા અને ગાજિયાબાદમાં સીએનજીની કિંમત 50.90 રૂપિયા પ્રતિ કિલોગ્રામ, પીએનજીની કિંમત 30.86 રૂપિયા પ્રતિ એસસીએમ છે.