ડુંગળી અને મોબાઈલ રિચાર્જ કે પછી બિલની વધતી કિંમતો વચ્ચે સબસિડી વિનાના મોંઘા LPG સિલિન્ડરોને કારણે સામાન્ય માણસને વધુ એક આંચકો લાગ્યો છે. મળતી માહિતી અનુસાર, દિલ્હીમાં 14.2 કિલો બિન સબસિડીવાળા ઘરેલૂ એલપીજી સિલિન્ડરના ભાવમાં રૂ .13.50 નો વધારો થયો છે.
મોંઘવારીનો માર
સામાન્ય લોકોને નવા મહિને વધુ એક ઝટકો
સબ્સિડી વિનાના ગેસ સિલિન્ડરના ભાવ વધ્યા
સતત વધતી જતી મોંઘવારી વચ્ચે સામાન્ય માણસ પીસાઈ રહ્યો છે. રોજ બરોજ વધતા ભાવને લઈને તે અટવાઈ ચૂક્યો છે. ડિસેમ્બરની શરૂઆતથી જ સબસિડી વિનાના ગેસની કિંમત 681.50 રૂપિયાને બદલે દર સિલિન્ડરે 695.00 રૂપિયા થઈ ચૂકી છે. એટલે કે તમારે વધારે રૂપિયા ચૂકવવા પડશે.
જાણો ક્યાં થયો કેટલા રૂપિયાનો વધારો
આ રીતે કોલકત્તામાં પણ 19.50 રૂપિયાનો વધારો થયો છે. ચેન્નઈમાં આ વધારો 18 રૂપિયા, મુંબઈમાં 14 રૂપિયા સુધી પહોંચ્યો છે. દિલ્હીમાં વ્યાપારીકરણમાં ઉપયોગમાં લેવામાં આવતા 19 કિલોગ્રામ સિલિન્ડરમાં 7.50 રૂપિયાનો વધારો થયો છે.
ઉલ્લેખનીય છે કે વધેલી કિંમતો 1 ડિસેમ્બર એટલે કે રવિવારથી જ લાગૂ કરવામાં આવી છે. એલપીજીના ભાવમાં સતત ચોથા મહિને પણ વધારો કરવામાં આવ્યો છે. ગેસ વિતરક કંપનીઓ દર મહિનાની એક તારીખે કિંમતો જણાવે છે અને તેની ચર્ચા બાદ તેમાં ફેરફાર કરવામાં આવે છે.