સામાન્ય જનતાને જીવવા માટે ખરેખર કપરા ચઢાણો ચડવા પડી રહ્યા છે ત્યારે રાંધણ ગેસ, પેટ્રોલ ડિઝલના ભાવ બાદ હવે તેલના ભાવ પણ આસમાને પહોંચ્યા છે
ખાદ્યતેલના ભાવમાં ફરી વધારો
સિંગતેલ અને કપાસિયા તેલમાં રૂ.40નો વધારો
સનફ્લાવર તેલમાં 60 રૂપિયાનો વધારો
મોંઘવારી રાજકુમારીની વાર્તાની જેમ રાતે નથી વધતી એટલી દિવસે વધે છે અને દિવસે નથી વધતી એટલી રાતે વધે છે ત્યારે આમ આદમીની કમર મોંઘવારીએ તોડી નાંખી છે. કોરોના લોકડાઉને નોકરી ધંધા ઠપ્પ કરી મુક્યા અને જ્યારે હવે થોડા બજાર ખુલ્યા છે ત્યારે સામાન્ય જનજીવનની વસ્તુઓના ભાવ ભડકે બળી રહ્યા છે.
રાંધણ ગેસ, અનાજ, ઘી-તેલના ભાવ આસમાનને આંબી રહ્યા છે અને હજુ વધી રહ્યા છે. પેટ્રોલ ડિઝલ, એલપીજી અને સીએનજીના ભાવ પણ આસમાને પહોંત્યા છે ત્યારે આસમાની સુલતાની જોનારો આમ આદમી એ જ વિચારમાં છે કે જીવવું દિવસેને દિવસે મોંઘું થઈ રહ્યુ છે.
સિંગતેલના ભાવમાં ભડકો
રાજકોટમાં ખાદ્યતેલના ભાવ ફરી એક વખત વધ્યા છે. સિંગતેલ અને કપાસિયા તેલમાં 40 રૂપિયાનો વધારો થયો છે. સનફ્લાવર તેલમાં 60 રૂપિયાનો વધારો થયો છે. સિંગતેલના ડબ્બાના ભાવ રૂ.2580 પર પહોંચ્યા છે જ્યારે કપાસિયા તેલના ડબ્બાના ભાવ રૂ.2150 પર પહોંચતા સામાન્ય માણસ મુશ્કેલીમાં મુકાયો છે.
100 રૂપિયાના ભાવની પાડવી પડશે આદત
દરેક દેશવાસીને હાલ પેટ્રોલ-ડીઝલના ભાવ દઝાડી રહ્યા છે. સતત વધી રહેલા ભાવથી દેશની જનતા ત્રસ્ત થઈ ગઈ છે. દેશના અનેક રાજ્યોમાં હાલ પેટ્રોલના ભાવ 100 રૂપિયા લીટરે પહોંચી ગયા છે. જે રાજ્યોમાં વેટ અને સેસની ટકાવારી વધારે છે ત્યાં આ કિંમત હવે ન્યૂ નોર્મલ થઈ શકે છે. તો કેન્દ્રએ પહેલા જ એક્સાઈઝ ડ્યૂટીમાં ઘટાડો કરવાનો ઈન્કાર કરી દીધો છે. તેથી જો ભાવમાં ઘટાડો ન થાય કે તેલ ઉત્પાદક દેશો એપ્રિલથી ઉત્પાદનમાં ભારે વધારો નથી કરતા તો ગ્રાહકોને દૂર દૂર સુધી કોઈ રાહત મળવાની આશા દેખાતી નથી.
LPG ભાવમાં 1 મહિનામાં ત્રીજી વખત વધારો થયો છે. સબસિડિ વિનાના LPG સિલિન્ડરમાં રૂ.25નો વધારો થતાં 3 મહિનામાં LPG સિલિન્ડરના ભાવમાં રૂ.200નો વધારો નોંધાયો છે.