કર્ણાટકના પૂર્વ મુખ્યમંત્રી અને JDsના નેતા એચડી કુમારસ્વામીએ શનિવારના રોજ કહ્યું કે કોંગ્રેસ સાથે ગઠબંધન કરી પાર્ટીએ રાજ્યની જનતાની વચ્ચે બનાવ્યો અને 12 વર્ષ સુધી યથાવત રાખેલો ભરોસો ગુમાવી દીધો. કર્ણાટકના પૂર્વ મુખ્યમંત્રી કુમાર સ્વામીએ કહ્યું કે તેઓ 'જાળ'માં ફસાઇ ગયા હતા. કુમાર સ્વામીએ કોંગ્રેસ નેતા સિદ્ધારમૈયા પર ષડયંત્રનો આરોપ લગાવતા કહ્યું કે ભાજપે પણ આવડો મોટો 'વિશ્વાસઘાત' આપ્યો નથી.
સિદ્ધારમૈયાએ પલટવાર કરતા કહ્યું કે કુમારસ્વામી 'ખોટુ બોલવામાં' હોંશિયાર છે અને ખોટું રોવાનું તેમના પરિવારની જૂની ટેવ છે. કુમારસ્વામીએ મૈસૂરમાં કહ્યું, 'જો મે ભાજપ સાથે સારા સંબંધ ટકાવી રાખ્યો હોત તો હજુ પણ મુખ્યમંત્રી જ હોત. મે 2006-07માં (મુખ્યમંત્રી તરીકે) રાજ્યની જનતાનો ભરોસો પ્રાપ્ત કર્યો હતો અને જેને 12 વર્ષ સુધી યથાવત રાખ્યો હતો, જે કોંગ્રેસ સાથે ગઠબંધન કરી ગુમાવી દીધો. '
પૂર્વ મુખ્યમંત્રી કુમારસ્વામીએ કહ્યું કે કોંગ્રેસ સાથ ગઠબંધન કરવાની જરુર નહોતી, જેઓએ JD(s)ને ભાજપની 'B' ટીમ કહી તેના સામે અભિયાન ચલાવ્યું હતું, પરંતુ પાર્ટીના સુપ્રીમો એચડી દેવગૌડાના વલણના કારણે તેઓ ગઠબંધન સરકાર બનાવા માટે રાજી થયા હતા.
કુમારસ્વામીએ કહ્યું કે, મારી પાર્ટીએ પોતાની મજબૂતી ગુમાવી તેનું પરિણામ ભોગવવું પડી રહ્યું છે. હું દેવગૌડાની ભાવનાઓના કારણે કોંગ્રેસની જાળમાં ફસાઇ ગયો હતો, જેનું પરિણામ સ્વતંત્ર રીતે 28-40 બેઠકો જીતનાર મારી પાર્ટીને ત્રણ વર્ષમાં થયેલ ચૂંટણી દરમિયાન ભોગવવું પડ્યું છે.
કુમારસ્વામીએ જો કે સ્પષ્ટતા કરી છે કે દેવગૌડાને આ મુદ્દે દોષ નથી આપી રહ્યાં કારણ કે તેઓ ધર્મનિરપેક્ષ ઓળખ પ્રતિ પોતાના પિતાની આજીવન પ્રતિબદ્ધતાને સમજતા અને તેઓનું સન્માન કરે છે. ઉલ્લેખનીય છે કે 2018માં કર્ણાટક વિધાનસભા ચૂંટણીમાં જ્યારે કોઇ પાર્ટીને સ્પષ્ટ બહુમત મળી નહોતી, ત્યારે એક-બીજા સામે ચૂંટણી લડનાર કોંગ્રેસ-JD(s) સાથે મળીને સરકાર બનાવી હતી અને કુમાર સ્વામીને મુખ્યમંત્રી બનાવ્યા હતા.
જો કે બંને પાર્ટીઓ વચ્ચે ગત વર્ષે સાથે મળીને ચૂંટણી લડ્યાં, ત્યારબાદ ગઠબંધનમાં આંતરિક મતભેદ ચરમસીમાએ પહોંચ્યા જેના કારણે કેટલાંક ધારાસભ્યોએ બળવો કરતા ગઠબંધન સરકાર પડી ગઇ. કુમારસ્વામીના આરોપનો પલટવાર કરતા સિદ્ધારમૈયાએ આરોપ લગાવ્યો, 'કુમારસ્વામી ખોટુ બોલવામાં હોંશિયાર છે, તેઓ રાજકારણ માટે સમય અનુસાર ખોટુ બોલી શકે છે. JD(s) ને 37 બેઠક મળવના કારણે તેઓને મુખ્યમંત્રી બનવું એ અમારી ભુલ હતી?'