દાવો / અયોધ્યા મામલે નેપાળના PM ઓલીનું બ્રહ્મજ્ઞાન મેઇડ ઇન ચાઇના

તેમણે વધુમાં જણાવ્યું હતું કે ભાનુ ભક્તનો જન્મ પશ્ચિમ નેપાળના તાનહુમાં ૧૮૧૪માં થયો હતો અને તેમણે વાલ્મીકિ રામાયણનો નેપાળમાં અનુવાદ કર્યો હતો. તેમનો દેહાંત ૧૮૬૮માં થયો હતો. ઓલીએ જણાવ્યું કે વાસ્તવિક અયોધ્યા દીરગંજના પશ્ચિમના થોરીમાં આવેલું છે. ભારતે માત્ર પોતાને ત્યાં ભગવાન રામનું જન્મસ્થળ હોવાનો દાવો કર્યો છે. જ્યારે ભગવાન રામનો જન્મ નેપાળના થોરીમાં થયો હતો. ભારતમાં અયોધ્યા મામલે મોટો વિવાદ પ્રવર્તે છે, પરંતુ આપણા અયોધ્યા બાબતે કોઇ વિવાદ નથી.

ઓલીએ પોતાના દાવાના સમર્થનમાં એવું જણાવ્યું હતું કે વાલ્મીકિ આશ્રમ પણ નેપાળમાં છે કે જ્યાં રાજા દશરથે પુત્ર માટે યજ્ઞ કર્યો હતો. આમ દશરથ નેપાળના રાજા હતા અને તેથી સ્વાભાવિક છે કે તેમના પુત્ર રામનો જન્મ પણ નેપાળમાં થયો હતો અને તેથી અયોધ્યા પણ નેપાળમાં છે.

નેપાળના વડા પ્રધાન કે.પી.ઓલીના આ નિવેદન સામે ભારતમાં ઉગ્ર વિરોધ થઇ રહ્યો છે. વાસ્તવમાં અયોધ્યા પર ઓલીનું આ બ્રહ્મજ્ઞાન મેઇડ ઇન ચાઇના છે. આજકાલ ઓલી ચીનનાં દબાણ અને ઇશારે ભારત વિરોધી બફાટ કર્યે રાખે છે. તેનું મુખ્ય કારણ એ છે કે નેપાળના વડા પ્રધાન ઓલીની ખુરશી ચીનને કારણે બચી ગઇ છે અને ચીનનું ઋણ ચૂકવવા ઓલી ભારતનેે ભડકાવે એવા નિવેદનો કર્યે રાખે છે. આમ બેબુનિયાદ અને આધારહીન હકીકતો પર જે ઇતિહાસની રજૂૂઆત કે.પી.ઓલી દુનિયા સમક્ષ કરી રહ્યા છે તે ઇતિહાસ ચીન દ્વારા લખવામાં આવ્યો છે.

કે.પી.ઓલી પોતાની ખુરશી બચાવવાથી લઇને ચીનના અનેક અહેસાન અને ઉપકાર તળે દબાયેલા છે. એક નવા રિપોર્ટમાં એવો દાવો કરવામાં આવ્યો છે કે ચીનની મદદથી કે.પી.ઓલીએ છેલ્લા કેટલાંય વર્ષોમાં જંગી પ્રમાણમાં કાળું નાણું એકત્ર કર્યું છે અને આ રકમ સ્વિટ્ઝર્લેન્ડની એક બેન્કમાં જમા છે. ઓલીના આ નિવેદન સામે સંત સમુદાય પણ ભારે ખફા છે. અયોધ્યાના સંતો ઓલી પર ભડકયા છે. રામદલ ટ્રસ્ટના અધ્યક્ષ રામદાસ મહારાજે જણાવ્યું છે કે નેપાળમાં સરયૂ નદીનું અસ્તિત્વ જ નથી. નેપાળી પીએમ ઓલીએ એક મહિનાની અંદર ખુરશી પરથી ઊતરી જવું પડશે.

હું ધર્માદેશ જારી કરું છું કે મારા શિષ્યો નેપાળમાં ઓલી વિરુદ્ધ ઉગ્ર દેખાવો કરે અને ઓલીને સત્તા પરથી હટાવી દે. તેમણે જણાવ્યું હતું કે માત્ર ભારતની જ નહીં, પરંતુ સમગ્ર વિશ્વની સાંસ્કૃતિક રાજધાની અયોધ્યા છે. વેદ, રામાયણ કે પુરાણમાં સ્પષ્ટ લખ્યું છે કે જ્યાં સરયૂ નદી છે ત્યાં જ અયોધ્યા છે. નેપાળમાં તો સરયૂ નદીનું અસ્તિત્વ જ નથી. ધર્મગુરુ મહંત પરમહંસે તો એટલી હદે કહ્યું કે ઓલી સ્વયં નેપાળી નથી. ઓલી નેપાળને પાકિસ્તાનની રાહે ભિખારી બનાવવા નીકળી પડયા છે.

ઓલી નેપાળની પ્રજા સાથે વિશ્વાસઘાત કરી રહ્યા છે. ચીને નેપાળનાં બે ડઝનથી વધુ ગામો પર કબજો જમાવી દીધો છે અને હવે ચીનની આ હરકતને છાવરવા ઓલી ભગવાન રામના નામનો સહારો લઇ રહ્યા છે. ચોમેરથી વિરોધ થતાં હવે ઓલી સ્વયં ગભરાઇ ગયા છે.

ઓલીએ સત્તાવાર સ્પષ્ટતા કરવી પડી છે. નેપાળ સરકારે એક નિવેદન જારી કરીને ઓલીના વિધાન પર ખુલાસો કરતાં જણાવ્યું છે કે વડા પ્રધાનનો ઇરાદો કોઇની પણ લાગણીને ઠેસ પહોંચાડવાનો નહોતો. હવે તો નેપાળના રાજકીય પક્ષોએ પણ ઓલીનો આ મુદ્દે ઉગ્ર વિરોધ કર્યો છે. તેમના નિવેદનને વાહિયાત ગણાવીને તાત્કાલિક પાછું ખેંચવા નેપાળના વિવિધ રાજકીય પક્ષોએ માગણી કરી છે.