અમદાવાદ / વાજતે ગાજતે મામાના ઘરે સરસપુર પહોંચ્યા ભગવાન જગન્નાથ, જળયાત્રામાં ભક્તોના મનની સાથે રસ્તાઓ પણ ભીંજાયા

• ભગવાન જગન્નાથની 146મી રથયાત્રાની તૈયારીઓ તેજ
• ભગવાન જગન્નાથ પહોંચ્યા મોસાળ સરસપુરમાં પહોંચ્યા
• 15 દિવસ ભગવાન મામાના ઘરે રોકાશે
• ભગવાનની આંખ પર બાંધવામાં આવશે પાટા

 જગતનાં નાથ ભગવાન જગન્નાથની 146 મી રથયાત્રાને લઈને તમામ તૈયારીઓ પૂર્ણ કરી દેવામાં આવી છે. ત્યારે આજે ભગવાન જગન્નાથ, ભાઈ બલરામ અને બહેન સુભદ્રા સરસપુર મામાને ત્યાં પહોંચ્યા છે. ત્યારે સરસપુર ખાતે ભગવાનનું ભવ્ય સ્વાગત કરવામાં આવ્યું છે.  ત્યારે ભગવાન જગન્નાથ, બહેન સુભદ્રા તેમજ ભાઈ બલરામનું મોસાળમાં ભવ્ય સ્વાગત કરવામાં આવ્યું હતું.  શોભાયાત્રામાં સૌ પ્રથમ ગજરાજો હતા. જે બાદ ડીજેનાં તાલે લોકો ઝુમ્યા હતા.  ત્યારે મામાનાં ઘરે પહોંચ્યા બાદ ભગવાનની આંખે પાટા બાંધવામાં આવશે.

શું હોય છે નેત્રોત્સવવિધિ ?
નાથ જ્યારે નગરચર્યાએ નીકળે છે તે અગાઉ 15 દિવસ પહેલા ભગવાન પોતાના મોસાળમાં રહેવા જાય છે. મામાના ઘરે આગતા સ્વાગતા એટલી દમદાર હોય છે કે શું ખાવુ ને શું નખાવુ ?  મોસાળમાં ભાણેજને અનેક મિષ્ઠાન્ન અને જાંબુ ખવડાવવામાં આવે છે આથી તેમને આંખો આવી જાય છે. જેથી ભગવાન જ્યારે નિજ મંદિર ફરે છે ત્યારે નેત્રોત્સવ વિધી કરવામાં આવે છે. આ વિધિ બાદ તેમની આંખો પર પાટા બાંધી દેવામાં આવે છે. આથી ભગવાનને આંખોને ઠંડક મળે તેવા દ્રવ્યોથી નેત્રોત્સવ વિધિ કરવામાં આવે છે. 

અષાઢી બીજે ખોલવામાં આવશે પાટા
ભગવાન જગન્નાથને અષાઢી બીજના દિવસે સવારે 4 વાગ્યે આંખેથી પાટા ખોલવામાં આવશે. ત્યાર પછી ધ્વજારોહણની વિધિ કરવામાં આવશે જે બાદ મંગળાઆરતી થશે. મહત્વનું છે કે રથયાત્રામાં ધોળી દાળ અને કાલી રોટીનું ખાસ મહત્વ હોય છે. ધોળી દાળ અને કાલી રોટીનો ભંડારો કરવામાં આવશે જેમાં લાખોની સંખ્યામાં ભાવિકો લાભ લેશે. 
ભાણેજને વધાવવા સરસપુરમાં ઉત્સાહનો માહોલ 
આજે ભગવાન તેમના મોસાળ સરસપુર પહોંચ્યા હતા. જ્યાં તેઓ 15 દિવસ મામાના ઘરે રોકાવાના છે. જેને લઈને મોસાળ સરસપુરમાં તડામાર તૈયારીઓ ચાલી રહી છે. વરસાદની શક્યતાને  લઈને સરસપુરમાં રણછોડરાય મંદિરમાં  વોટરપ્રૂફ ડોમ બાંધવામાં આવ્યો છે. જેની સાથે આ વર્ષે 15 દિવસ સુધી અલગ અલગ પ્રકારે ભગવાનનાં મનોરથ, ભજન, કીર્તન, શોભાયાત્રા અને લક્ષ્મીનારાયણ યજ્ઞનું આયોજન કરવામાં આવ્યું છે. 7 જૂનથી 17 જૂન સુધી ભગવાન સરસપુરમાં રહેશે.

146મી રથયાત્રાના યજમાન બન્યા છે ઘનશ્યામ પટેલ  
રથયાત્રાને લઈને મોસાળવાસીઓ પણ હવે ભાવવિભોર બનીને ભગવાનના મોસાળ પધારવાની રાહ જોઈ રહ્યા છે. આ વર્ષે 146મી રથયાત્રાના યજમાન ઘનશ્યામ પટેલ બન્યા છે. છેલ્લાં 10 વર્ષથી તેઓ યજમાન બનવાની રાહ જોતા હતા. આ વર્ષે શાયોના ગ્રુપના ઘનશ્યામ પટેલનું ડ્રોમાં નામ ખૂલતાં પરિવારમાં આનંદનો માહોલ છે. 

આજે ભગવાન જગન્નાથજીની જળયાત્રા યોજાઈ હતી
ભગવાન જગન્નાથજીની રથયાત્રાને ગણતરીના દિવસો જ બાકી છે. ત્યારે રથયાત્રા પૂર્વે આજે ભગાવાન જગન્નાથજીની જળયાત્રા યોજાઈ હતી. ઢોલ-નગારા, બેન્ડવાજા સાથે ભગવાનની જળયાત્રા યોજાઈ હતી. નિજમંદિરથી 108 કળશની સાથે ભજન મંડળી, રાસ મંડળી, અખાડા અને ભક્તો સાથે જળયાત્રા નીકળી હતી. આ જળયાત્રા જગન્નાથ મંદિરથી શોભાયાત્રારૂપે શરૂ થઈને સાબરમતી રિવરફ્રન્ટ ખાતે પહોંચી હતી, જ્યાં 108 કળશમાં જળ ભર્યા બાદ આરતી કરવામાં આવી હતી. 

ભગવાનનો કરાયો જળાભિષેક
જે બાદ ભગવાનની જળયાત્રા પરત મંદિરે પહોંચી હતી. ત્યાર પછી ભગવાનની જળાભિષેકની પૂજાવિધિ શરૂ કરવામાં આવી છે. મંદિરના મહંત દિલીપદાસજી મહારાજ દ્વારા પૂજા કરવામાં આવી હતી. મંદિરમાં મહંત દિલીપદાસજી, મહેન્દ્ર ઝા, પૂર્વ ગૃહ રાજ્યમંત્રી પ્રદીપસિંહ જાડેજા દ્વારા ભગવાન જગન્નાથજીનો જળાભિષેક કરવામાં આવ્યો હતો.

ભગવાન જગન્નાથજીની કરાઈ મહાઆરતી
જે બાદ ભગવાન જગન્નાથજીએ ગજવેશ ધારણ કર્યો હતો. જે બાદ ભગવાનની મહાઆરતી કરવામાં આવી હતી. આ દરમિયાન ભગવાનના દર્શન કરવા મોટી સંખ્યામાં ભક્તો ઉમટી પડ્યા હતા.
અમાસ સુધી ભગવાન રોકાશે મામાના ઘરે
આજે બપોરે બાદ ભગવાન મોસાળમાં જવા રવાના થયા હતા. ભગવાન જગન્નાથ, બહેન સુભદ્રા અને ભાઈ બલરામ સાથે સરસપુર ખાતે આવેલા મોસાળ પહોંચ્યા હતા. ભગવાન મોસાળમાં અમાસ સુધી રોકાશે.