પર્દાફાશ / કચ્છમાં મહિલાના હાથ-પગ બાંધી, મોંઢે ડૂચો મારીને ચલાવી લૂંટ, શખ્સનું નામ સામે આવતા સૌ ચોંકી ઉઠ્યા

• પૂર્વ કચ્છના ગાંધીધામ સપનાનગરમાં વૃદ્ધ મહિલાને બંધક આચરી લૂંટ
• ઘરમાં કામ કરતો નિશાંત નેપાળી ભેદી રીતે ગાયબ થઈ ગયો હતો
• નિશાંત, ધીરેન્દ્ર અને દિપક સાથે મળીને લૂંટનો કારસો રચ્યો હતો

પૂર્વ કચ્છના ગાંધીધામમાં સપનાનગરમાં લૂંટનો બનાવ બન્યો હતો. બે જેટલા આરોપીઓએ ઘરમાં ઘૂસી વૃદ્ધ મહિલાને બંધક બનાવી લૂંટને અંજામ આપી ફરાર થયા હતા. સપના નગરમાં રહેતા રવિન્દ્ર દાસના ઘરે આ બનાવ બન્યો હતો. રવિન્દ્રભાઈ નિત્યક્રમ મુજબ ગાયત્રી મંદિર રોડ પર આવેલા તેમની રેસ્ટોરન્ટ પર ગયા હતા. ઘરમાં તેમની પત્ની રેખાબેન અને 90 વર્ષિય સસરા હાજર હતા. તે સમયે બે અજાણ્યા શખ્સો રેખાબેનના રૂમમાં ધસી આવ્યાં હતા. યુવકોએ રેખાબેનના હાથ-પગ બાંધી દઈ, મોંઢે કપડાંથી ડૂચો મારીને કબાટ તોડી રોકડ રકમ, મોબાઈલ ફોન અને ઘરેણાંની લૂંટ ચલાવી હતી. આરોપીઓના ભાગી ગયાં બાદ રેખાબેને પોતાની રીતે બંધનમુક્ત થઈ નજીકમાં રહેતી દીકરીને પડોશીના ફોનથી ઘટના અંગે જાણ કરી હતી.

ઘરમાં કામ કરતો નિશાંત નેપાળી ભેદી રીતે ગાયબ થઈ ગયો હતો, જેને લઇને ભાંડો ફૂટ્યો

લૂંટના બનાવ અંગે રવિન્દ્રભાઈએ ગાંધીધામ પોલીસને જાણ કરી હતી. લૂંટમાં જાણભેદુ હોવાની શંકાના આધારે લૂંટના બનાવમાં પોતાની રેસ્ટોરન્ટમાં કામ કરતાં ધીરેન્દ્ર બહાદુર અને ઘરે સસરાની સંભાળ માટે રાખેલાં નિશાંત નેપાળીની સંડોવણી હોવાની ફરિયાદ નોંધાવી હતી. ધીરેન્દ્ર તે દિવસે સાંજે કામ પર આવ્યો નહોતો અને ઘરમાં કામ કરતો નિશાંત પણ ભેદી રીતે ગાયબ થઈ ગયો હતો. બંનેના ફોન પણ બંધ હતા. જેને લઇને સમગ્ર ભાંડો ફૂટ્યો હતો. ગાંધીધામ બી ડિવિઝન પોલીસે ફરિયાદ નોંધી તપાસ તેજ કરી હતી. ટેક્નિકલ તેમજ હ્યુમન સર્વેલન્સની મદદથી પોલીસની બાતમી મળી કે ગાંધીધામ લૂંટમાં સંડોવાયેલા ત્રણે આરોપીઓ નખતાણા મોટી વિરાણી સિમ વિસ્તારમાં છુપાયેલા છે. તુરત જ ગાંધીધામ બી ડિવિઝન પોલીસે સતર્કતા દાખવી ત્રિપુટી આરોપીની ધરપકડ કરી.

નિશાંત, ધીરેન્દ્ર અને દિપક સાથે મળીને લૂંટનો કારસો રચ્યો હતો

પોલીસની પ્રાથમિક પૂછપરછમાં આરોપીએ કબૂલાત આપી કે, આરોપી નિશાંતના માથે ત્રણેક લાખ રૂપિયાનું દેવું થઈ ગયું હતું. ધીરેન્દ્રના માથે પણ નાનું મોટું દેવું હતું. જેથી નિશાંતે જ મોટો હાથ મારવાના હેતુથી ધીરેન્દ્ર અને દિપક સાથે મળીને લૂંટનો કારસો રચ્યો હતો. પોલીસે આરોપીઓ પાસેથી 1 લાખની રોકડ, 10 હજારના ફોન સાથે 15.58 લાખના દાગીના મળી લૂંટેલો તમામ 16.68 લાખનો મુદ્દામાલ રીકવર કર્યો છે. 

તો, આરોપીઓ પાસે રહેલાં 20 હજારની કિંમતના ચાર મોબાઈલ ફોન પણ ગુના કામે કબ્જે લેવાયાં છે. ફરિયાદમાં જે-તે સમયે નિશાંત અને ધીરેન્દ્ર સાથે બે અજાણ્યા સાગરીતો એમ ચાર આરોપીનો ઉલ્લેખ કરાયો હતો. પરંતુ, આ ત્રણ જણે જ ગુનો આચર્યો હોવાનું સ્પષ્ટ થયું છે. ધીરેન્દ્ર શાહી અને નિશાંત શાહી સાથે દિપેન્દ્ર ઉર્ફે દિપક શાહીની ધરપકડ કરી છે. સાથે પોલીસે જાહેર જનતાએ અપીલ કરી છે કે તમારા વ્યવસાયિક કે ઘરમાં કામે રાખતા પરપ્રાંતિયોની પુરી માહિતી પોલીસ સ્ટેશને નોંધાવી.