જુઓ મોદી બાદ સુરતના સાડી માર્કેટમાં હવે રાહુલ-પ્રિયંકા ગાંધી પણ મચાવી રહ્યાં છે ધૂમ

આગામી સમયમાં લોકસભાની ચૂંટણીઓ આવી રહી છે રાજકીય પક્ષો દ્વારા ચૂંટણી પ્રચાર આરંભી દેવામાં આવ્યો છે બદલાતા સમયમાં જેમ નેતાઓની માનસિકતા બદલાઈ છે તેમ ચૂંટણી પ્રચારની રીતો પણ બદલાઈ છે અને પ્રચારનું માધ્યમ પણ બદલાયું છે. ત્યારે હવે સુરતના કાપડ માર્કેટમાં પ્રિયંકાગાંધી અને રાહુલ ગાંધીની ઈમેજ વાળી સાડીઓ જોવા મળી રહી છે. ત્યારે આ સાડીઓએ  વિશે શું કહેવું છે વેપારીઓનું અને કેવા આશાસ્પદ છે નેતાઓ જોઈએ આ અહેવાલ.

આવનારા મહિનાઓમાં દેશમાં લોકસભાની ચૂંટણી યોજાશે જેના માટે દેશના બન્ને મુખ્ય રાજકીય પક્ષો કોંગ્સે અને ભાજપ દ્વારા સાડીનો સહારો લેવામાં આવી રહ્યો છે. બજારમાં કોંગ્રેસ અને ભાજપ પક્ષ દ્વારા પ્રચાર માટે પોતાના પક્ષ તરફ અને નેતાઓ તરફ આકર્ષતી ઈમેજ વાળી સાડી તૈયાર કરવામાં આવી છે.

બન્ને પક્ષો દ્વારા જાણે સાડીના માધ્યમથી પ્રચારનો આરંભ કરી દેવામાં આવ્યો છે. ઉપરના બન્ને દ્રશ્યો બન્ને પક્ષોનો ઉભરાયેલો સાડીપ્રેમ દર્શાવી રહી છે. કોંગ્રેસે રાહુલગાંધી અને પ્રિયંકાનીને સાડી પર સ્થાન આપ્યું છે તો ભાજપે મોદીજીને સાડીના સહારે લહેરાતા મૂક્યા છે. બન્ને પક્ષોનો હેતુ સાડીને જ સત્તાની સીડી બનાવવાનો લાગે છે. કેમ કે બન્ને પક્ષો સારી રીતે જાણે છે કે સાડી એ દેશના અડધા મતદારોને ઢાંકીને બેઠી છે.

આગામી સમયમાં ચૂંટણી માહોલ જામશે ત્યારે રાજકીય પક્ષો દ્વારા ચાલુ વર્ષે ચૂંટણી જીતવા માટે વેવિધ્યસભર પ્રચાર અભિયાન અપનાવવામાં આવી રહ્યું છે ભારતીય મહિલાઓનો પારંપરિક પોષાક સાડી છે જે સાડી પણ હવે ચૂંટણી પ્રચારનું માધ્યમ બનવાથી બાકાત રહી શકી નથી.

હાલ લગ્નગાળાની સિઝન ચાલી રહી છે ત્યારે લોકો સાડીઓ તેમજ અન્ય વસ્તુઓની ખરીદી કરી રહ્યા છે જેમને હવે બજારમાં એક નવી વેરાયટિ જોવા મળી રહી છે. વડાપ્રધાન નરેદ્ર મોદીની ડિજિટલ પ્રિન્ટની સાડી બાદ હવે કાપડ બજારમાં પ્રિયંકા ગાંધીની સાડીઓ આવી છે.

નરેદ્ર મોદીની છાપ વાળી સાડી બજારમાં આવ્યા બાદ બાદ કૉંગ્રેસી કાપડ વેપારીઓ એ પણ પ્રિયંકા ગાંધી અને રાહુલ ગાંધીની છાપવાળી સાડી બનાવી છે અને એક રીતે લોક સભાની ચૂંટણી માટે પ્રચાર કરવાનું શરૂ કરી દીધું છે. પ્રિયંકા ગાંધીના રાજકારણ પ્રવેશ સાથે જ તેમની લોકચાહના વધી રહી છે તે સાથે સાથે સાડીઓ પર પ્રિયંકા ગાંધીની પ્રિન્ટવાળી સાડી ખૂબ ડિમાન્ડમાં આવી છે. 

મોદી મેજિક બાદ હાલ સુરતના કાપડવેપારીઓના ગ્રૂપમાં પ્રિયંકા ગાંધીના ફોટાવાળી સાડીઓના ફોટા અને વીડિયો ખૂબ વાયરલ થઈ રહ્યા છે. આ વેપારીએ માત્ર પ્રિયંકા ગાંધીની સાડી જ પ્રિન્ટ કરી છે એવું નથી તેમણે સાડીના પૅકિંગ ઉપર જેમ કિંમત સાથે સ્ટીકર્સ લગાવવામાં આવે તેમ પેશકગની નીચે 'ચોકીદાર ચોર હૈ' ની લાઇન પણ પ્રિન્ટ કરાવી છે. રાહુલ ગાંધી વારંવાર જે વાકય બોલે છે. તે વાક્યને કોંગ્રેસ સમર્થક વેપારીએ સાડીના બોક્સ પર લગાવ્યું છે. 

આ પ્રકારની સાડી લોન્ચ કરાતાં રાજકીય પક્ષોને તો ચૂંટણી પછી ખબર પડશે કે ફાયદો થયો કે કેમ પરંતુ હાલ તો વેપારીઓને ફાયદો થઈ રહેલો જણાય છે. બજારમાં આ પ્રકારની સાડી દ્વારા મહિલા વોટબેન્ક ઉભી કરવાના પ્રયોગ સ્વરૂપે લોન્ચ કરવામાં આવી છે. ઉત્પાદક દ્વારા માર્કેટિંગ કરવાનો પણ આ પ્રયોગ છે. જે વોટમાં કેટલો પરિવર્તિત થાય છે તે તો ચૂંટણી પછી ખબર પડશે બાકી હાલ તો વેપારીઓ ડિજિટલ સાડીના વધારે ઉપાડનો આશાવાદ સેવી રહ્યા છે.

આ ઉપરાંત ટેક્સટાઇલ માર્કેટના કેટલાક વેપારીઓએ સાડી પાર્સલના પેકિંગમાં જે પ્લાસ્ટિક પટ્ટીઓ વપરાય છે તેમાં 'કમલ કા ફૂલ હમારી ભૂલ' એવું સૂત્ર છપાવીને જાણે ચૂંઠણી પ્રચાર શરૂ જ કરી દીધો છે. સામાન્ય રીતે પટ્ટી પર જે તે સાડીની કમ્પનીનું નામ હોય છે. પરંતુ પ્રચાર ચબરાક વેપારીઓએ સાડીની  પટ્ટી પર વિપક્ષ પર પ્રહારને કરવાની જગા બનાવી લીધી છે. 

સામાન્ય રીતે દરેક રાજકીય પક્ષો દ્વારા તમામ સમય આરોપ પ્રત્યારોપનો દૌર ચાલુ જ રહેતો હોય છે અને આ આક્ષેપ બાજી સંસદથી લઈને શેરીઓ સુધી અવિરત ચાલુ જ રહેતી હોય છે અને દેશના સામાન્ય નાગરિકને એવો પણ ભાવ થતો હોય છે કે નેતાઓ દ્વારા લોકશાહીનું વસ્ત્રાહરણ થઈ રહ્યુ છે. ત્યારે રાજકીય પક્ષોના નેતાઓની કે સમગ્ર પક્ષની આબરુ ઢાંકવા આ પ્રકારની સાડીઓને માધ્યમ બનાવવામાં આવે છે ત્યારે સામાન્ય લોકોમાં નવાઈનો માહોલ બને તે સ્વાભાવિક છે. કેમ કે લોકશાહીના વસ્ત્રાહરણ વચ્ચે સાડીઓને પણ સિયાસતના રંગે રંગવાનું શરૂ કરી દેવાયું છે.