વલસાડમાં ગિરિરાજ સેવા ચેરીટેબલ ટ્રસ્ટ ધમડાચીમાં, તેમજ રાજકોટના રાજપરામાં સેવા કાર્ય અર્થે લોકડાયરાનું આયોજન કરવામાં આવ્યું હતું
વલસાડમાં યોજાયેલ લોકડાયરામાં પૈસાનો થયો વરસાદ
રાજકોટ લોક ડાયરામાં ફરી એકવાર નોટોની છોળો ઊડી
વલસાડના ધમડાચીમાં લોકડાયરામાં નોટોનો વરસાદ થયો હતો.ગિરિરાજ સેવા ચેરીટેબલ ટ્રસ્ટ સંચાલિત લોકડાયરામાં રાજભા ગઢવી સહિતના કલાકારોએ લોકગીતો અને સાહિત્યની રમઝટ બોલાવી હતી. આ લોકડાયરો ગૌસેવાના લાભાર્થે યોજાયો હતો. જેમાં મોટી સંખ્યામાં લોકોએ ઘોર કરી ફાળો આપ્યો હતો.આ કાર્યક્રમમાં ગુજરાતની જાણીતી ગાયક કલાકાર અલ્પા પટેલે પણ ગીતોની સરવાણી કરી હતી.
રાજપરામાં યોજાયેલા લોક ડાયરામાં રૂપિયાનો વરસાદ
તો બીજી તરફ રાજકોટના રાજપરામાં યોજાયેલા લોક ડાયરામાં નોટોની છોળો ઊછળી હતી. ગાયક કલાકાર અપેક્ષા પંડયા અને સાથી કલાકારોએ લોકપ્રિય ગીતો ગાઈ લોકોને થનગનાવ્યા હતા.ડાયરામાં એકઠી થયેલી મોટી રકમ સેવાના કાર્ય માટે વાપરવામાં આવશે તેવું એલાન પણ કરવામાં આવ્યું હતું.જેથી લોકોએ બમણા વેગે નોટોનો વરસાદ કર્યો હતો.ઉપરોક્ત બંને ડાયરામાં લોકો એ મન મૂકી ને રૂપિયા ઉડાવ્યા હતા. ડાયરા પ્રેમી જનતાએ સેવા કાર્ય માટે યથાયોગ્ય યોગદાન આપ્યું હતું
રાધનપુરમાં કિંજલ દવેના ડાયરામાં ખુરશીઓ ઉછળતા અફરાતફરી મચી ગઇ હતી
થોડા દિવસ પહેલા પાટણના રાધનપુર હિંમત વિદ્યાનગર અમર જ્યોત એજ્યુકેશન ટ્રસ્ટ સંચાલિત જે ડાયરાનું આયોજન કરાયું હતું. જેમાં ડાયરામાં એકાએક કેટલાંક અસામાજીક તત્વોએ હોબાળો મચાવ્યો હતો. કિંજલ દવેનો ડાયરો સાંભળવા માટે આવેલા લોકોએ ચાલુ ડાયરે ધમાલ મચાવી હતી. અચાનક જ ડાયરામાં બબાલ થતાં કેટલાંક અસામાજીક તત્વોએ જાહેરમાં ખુરશીઓ ઉછાળી હતી. જેનો વીડિયો પણ સોશિયલ મીડિયામાં વાયરલ થયો હતો. તેઓએ ડાયરાની મજા બગાડવાની કોશિશ કરી હતી.