બંગાળ / Video: આસનસોલમાં બાબુલ સુપ્રિયોની ગાડીના કાચ તોડાયાં, હિંસા બાદ પોલીસનો લાઠીચાર્જ

જ્યારે બંગાળના આસનસોલમાં પણ આજરોજ મતદાન યોજાઇ રહ્યું છે. જો કે પશ્ચિમ બંગાળમં મતદાન શરૂ થયાના થોડા જ સમયમાં આસનસોલમાં હિંસા જોવા મળી છે. એક મળતાં અહેવાલ મુજબ આસનસોલ લોકસભા બેઠકના જેમુઆમાં એક મતદાન કેન્દ્ર પર ભાજપ અને તૃણમુલ કોંગ્રેસના કાર્યકર્તાઓ વચ્ચે અથડામણ જોવા મળી છે. બંને પક્ષના કાર્યકર્તાઓ વચ્ચેના ઘર્ષણને જોતાં પોલીસે હળવો લાઠીચાર્જ કર્યો છે. 
 

ઉલ્લેખનીય છે કે આસનસોલ બેઠક પરથી ભાજપના વર્તમાન સાંસદ બાબુલ સુપ્રિયો જ્યારે ટીએમસી તરફથી અભિનેત્રી મુનમુસેન ઉમેદવાર છે. જો કે આ અથડામણને લઇને ભાજપના નેતા બાબુલ સુપ્રીયોએ આરોપ લગાવ્યો છે કે તેમની ગાડી પર હુમલો કરવામાં આવ્યો છે. બાબુલ સુપ્રીયોએ જણાવ્યું કે તેમની ગાડી પર હુલમો કરવામાં આવ્યો અને તેમની કારના કાચ પણ તોડી નાંખવામાં આવ્યાં. બાબુલ સુપ્રિયોએ જણાવ્યું કે તેઓ પોતે બૂથ પર પહોંચ્યાં હતા. મમતા બેનરજી ડરી ગઇ છે, આ જ કારણ છે કે તેઓ મતદાનને પ્રભાવિત કરી રહ્યાં છે. 



ઉલ્લેખનીય છે કે  લોકસભાની ચૂંટણી માટે આજે ચોથા તબક્કાના મતદાનનો પ્રારંભ થઇ ગયો છે. આજે નવ રાજ્યોની 71 બેઠકને લઇને મતદાન યોજાઇ રહ્યું છે. જેમાં મહારાષ્ટ્રની 17, રાજસ્થાન અને ઉત્તર પ્રદેશની 13-13, પશ્ચિમ બંગાળની આઠ, મધ્યપ્રદેશ અને ઓડિશાની છ-છ બેઠક, બિહારની પાંચ અને ઝારખંડની ત્રણ બેઠક પર મતદાન યોજાઇ રહ્યું છે.