લોકસભા ચૂંટણીનાં ત્રીજા તબક્કા માટે ઉમેદવારીપત્ર ભરવાનો આજે છેલ્લો દિવસ હતો. કેટલાંક ઉમેદવારોનાં નામ છેક અંતિમ ઘડી સુધી જાહેર થયાં ન હતાં તો કેટલાંક ઉમેદવારો યોગ્ય વિજય મુહૂર્તની રાહ જોઈ રહ્યાં હતાં. પરંતુ આજે ઉમેદવારીપત્રો ભરવાનાં છેલ્લાં દિવસે તમામ પક્ષોએ પોતાનાં ઉમેદવારોનાં નામ પર મંજૂરીની મહોર મારી દીધી તો જાણે ઉમેદવારોને પણ વિજયમુહૂર્ત જોવા જેવું ન લાગ્યું. સામ સામે ઉભા રહેલાં ઉમેદવારોને ઉમેદવારીપત્રો ભરવા માટે ભલે સરઘસ અને શક્તિ પ્રદર્શનનો મોકો ન મળ્યો પરંતુ તેમનાં ટેકેદારોએ સામાસામે શક્તિ પ્રદર્શન કરી નાખ્યું. સુરતમાં કોંગ્રેસ અને ભાજપનાં સમર્થકો સામસામે આવી ગયાં તો તેઓ પોતાની પક્ષભક્તિ રોકી ન શક્યાં.
આજે ત્રીજા તબક્કાની ચૂંટણી માટે ઉમેદવારી પત્ર ભરવાનો છેલ્લો દિવસ હતો. બાકી ઉમેદવારોનાં જેવાં નામ જાહેર થયાં કે તેમને ઉમેદવારીપત્રો ભરવા માટે તેનાં જેવું બીજું એકેય વિજય મૂહુર્ત ન લાગ્યું. ઉમેદવારોએ તાબડતોબ તૈયારી કરી અને સંબંધિત કલેક્ટર કચેરીએ પહોંચીને ઉમેદવારીપત્રો જમા કરાવવાની તૈયારી કરી દીધી. કેમ કે સરઘસ અને શક્તિ પ્રદર્શન માટે કોઈ ઉમેદવાર પાસે વધારે સમય બચ્યો ન હતો. પરંતુ આ તો સમર્થકો છે પોતાનાં નેતાઓને પણ ખબર ન હોય તેમ તેમનાં પગલે-પગલે તેઓ ચાલતા હોય છે.
આ માહોલમાં આજે સુરત લોકસભા બેઠક માટે ભાજપ અને કોંગ્રેસનાં ઉમેદવારોએ કલેક્ટર કચેરીએ ઉમેદવારી ફોર્મ ભર્યું હતું. બંને પક્ષોનાં ઉમેદવારો મોટી સંખ્યામાં કાર્યકરો સાથે કલેક્ટર કચેરી પહોંચ્યાં હતાં. જ્યાં સમર્થકો પોતાનાં પક્ષ પ્રત્યેની વફાદારી દર્શાવવા સામસામે સૂત્રોચ્ચાર કરવા લાગ્યાં. વાત સૂત્રોચ્ચારથી ન અટકી. પરંતુ વાત મારામારી સુધી પહોંચી ગઈ અને એ પણ કલેક્ટર કચેરીનાં ગેટ પર. જાણે નેતાઓની રાજનીતિનાં અને સમર્થકોની વફાદારીનાં નવા અધ્યાયની શરૂઆતનો આ એક સંકેત હોય.
સમગ્ર વાત એમ હતી કે, સુરત લોકસભાની ચૂંટણી માટે ભાજપ કોંગ્રેસ બન્ને પક્ષનાં ઉમેદવારો એક સરખા સમય પર જ ફોર્મ ભરવા માટે કલેક્ટર કચેરી આવી પહોંચ્યાં હતાં. પહેલાં ભાજપનાં ઉમેદવાર દર્શના જરદોશનાં ટેકેદાર સાથે આવ્યાં ત્યાર બાદ કોંગ્રેસનાં ઉમેદવાર અશોક અધેવાડ અને ટેકેદારો આવતાં તેમને અટકાવવા માટે ગાડી આડી મુકી દેવામાં આવી હતી. બન્ને પક્ષનાં કાર્યકરો સામ સામે આવી જતાં જોતજોતામાં એકબીજાનાં વિરોધમાં સુત્રોચ્ચાર શરૂ થઈ ગયાં.
થોડોક સમય `ચોકીદાર ચોર' અને `પપ્પુ ચોર' જેવાં સુત્રોચ્ચાર બાદ ભાજપનાં કેટલાંક મહિલા કાર્યકરો કોગ્રેસનાં મહિલા કાર્યકરો વચ્ચે મામલો ગરમાયો ગયો. થોડીક જ વારમાં બન્ને પક્ષનાં મહિલા કોર્પોરટો વચ્ચે ઝપાઝપી થઈ ગઈ. તેમાં એક મહિલા કાર્યકરનાં કપડાં ફાંડી નાખવાની અન્ય મહિલાનાં વાળ ખેંચી નંખાયાનાં આંક્ષેપો પણ ઉઠ્યાં. મહિલા કાર્યકરો વચ્ચે રીતસર ઝપાઝપી સર્જાઈ. આ ઝપાઝપી ચાલતી હતી તે દરમ્યાન બન્ને પક્ષનાં પુરુષ કાર્યકરો દ્વારા પણ આક્રમક વલણ અપનાવવામાં આવ્યું.
કલેક્ટર કચેરીનાં ગેટ પર જ રાજકીય પક્ષનાં કાર્યકરોને આવી રીતે મારામારી કરતાં જોઈ લોકો ડઘાઈ ગયાં હતાં. આ ઘટનાની જાણ થતાં પોલીસ ઘટનાસ્થળે દોડી આવી અને કાર્યકરોને દૂર કરવા બળપ્રયોગ કરવાની ફરજ પડી એટલું જ નહીં લોકો દ્વારા પોલીસને વિડિયો શુટીંગનાં આધારે પગલાં ભરવા માટે રજુઆત પણ કરવામાં આવી હતી. ત્યારે આમ નાગરિકોનાં મનમાં એ સવાલ ઊઠી રહ્યો છે કે શું લોકશાહી દેશમાં પક્ષ કે નેતાનાં સમર્થનમાં મારીમારીનો રસ્તો પણ અખત્યાર કરવો ફરજિયાત છે. ફોર્મ ભરતી વેળાએ જ શક્તિ પ્રદર્શનની આ રીત તંદુરસ્ત લોકશાહી માટે યોગ્ય તો નથી જ. શું નવા અધ્યાયમાં વર્ચસ્વની લડાઈનો આ આરંભ છે?