પ્રધાનમંત્રી નરેન્દ્ર મોદીએ શનિવારના તમિલનાડુના થેનીમાં જનસભાને સંબોધિત કરી. તેમણે કહ્યુ કે, દ્રમુક સુપ્રીમો એમકે સ્ટાલિનએ કેટલાક દિવસો પહેલા નામદાર (રાહુલ ગાંધી)ને પ્રધાનમંત્રી ઉમેદવાર જાહેર કર્યા હતા, પરંતુ તેમના (રાહુલ) મહામિલાવટી મિત્રો જ તેમના નામ પર રાજી નથી. કારણ કે ત્યાં કેટલાંક લોકો પ્રધાનમંત્રી બનવાની લાઇનમાં છે. અમારી પાર્ટીમાં મોદી જ પ્રધાનમંત્રી પદના ઉમેદવાર છે, આ અમારી એકતાને દર્શાવે છે. મોદી આજે કર્ણાટકમાં પણ ચૂંટણી રેલી સંબોધિત કરશે.
'કોંગ્રેસ ગરીબોના પૈસા લૂંટી રહી છે'
મોદીએ કહ્યું, આપણે અગાઉની સરકારોમાં જોયું છે કે, પિતા (પી ચિદંમ્બરમ)ના નાણામંત્રી બનવા પર દીકરો (કાર્તિ) દેશને લૂંટે છે. મધ્યપ્રદેશની સરકાર તેઓનું એટીએમ બની ગઇ છે. તેઓ ગરીબોના પૈસા લૂંટી રહ્યા છે. હવે દિલ્હીમાં તુગલક રોડ ચૂંટણી કૌભાંડ સામે આવ્યું છે. જ્યારે પણ કોંગ્રેસ સત્તામાં હતી, તેઓએ દેશને લૂંટ્યો છે. આજે દેશ વિશ્વમાં અનોખી ઓળખ બનાવી ચૂક્યો છે. આજે કોંગ્રેસ અને દ્રમુક મારાંથી નાખુશ છે. મારા તમામ વિરોધીઓ મહામિલાવટ માટે એકસાથે આવી ગયા છે. તમામ ભ્રષ્ટ મળીને મોદીને હરાવવા ઇચ્છે છે.
'60 વર્ષ સુધી અન્યાય કરનારા ન્યાયની વાત કરી રહ્યા છે'
પીએમ મોદીએ કહ્યુ કે, ''હવે ન્યાય થશે, પરંતુ છેલ્લાં 60 વર્ષોથી તેઓ અન્યાય જ કરી રહ્યા છે. મારો કોંગ્રેસને સવાલ છે કે, 1984નાં રમખાણ પીડિતો સાથે કોણ ન્યાય કરશે? એમજીઆરની સરકાર સાથે કોણ ન્યાય કરશે? કોંગ્રેસે તેઓને હટાવી દીધી હતી, કારણ કે એક પરિવાર તેમના જેવા નેતાઓને ઇચ્છતો નથી. ભોપાલ ગેસ ટ્રેજેડી કોંગ્રેસ સરકાર દરમિયાન થઇ. તેઓના પીડિતો સાથે કોણ ન્યાય કરશે? ''
'લોકોનો વિશ્વાસ અને મોટા પગલા લઇ શક્યો'
મોદીએ શુક્રવારે અહમદનગરમાં કહ્યું હતું, કે, ''મને ખુશી છે કે એક દેશ રાષ્ટ્ર સુરક્ષા માટે એક જ સૂરમાં વાત કરી રહ્યો છે.આ વિશ્વાસ મારી તાકાત રહ્યો છે, જેના પર હું મોટા નિર્ણય લઇ શક્યો છું. જે લોકો આ વખતે પહેલી વખત વોટ કરવા જઇ રહ્યા છીએ તેમને પૂછવા ઇચ્છુ છું કે, રાષ્ટ્રીય સુરક્ષા સાથે તમે કોઇ સમજૂતી તમને મંજૂર છે? કોંગ્રેસ જમ્મૂ-કાશ્મીરની સેનાને હટાવવા વાત કરી રહી છે. કોંગ્રેસ કહી રહી છે કે સૈનિકોને મળેલો વિશેષ અધિકાર દૂર કરો. શું આ યોગ્ય છે? ગામ-ગામ રસ્તા બની રહ્યા છે, વર્ષોથી અટકેલા રેલ્વે પ્રોજેક્ટ આજે પૂરા થઇ રહ્યા છે તો આ પાછળ તમારા વોટની શક્તિ છે. આજે સ્વરોજગાર માટે કરોડો યુવાનોને ગેરેન્ટી વગર બેંકમાંથી લોન મળી રહી છે અને આ પાછળ તમારા વોટની તાકાત છે.''