લોકસભા ચૂંટણી ર૦૧૯ના પરિણામો પૂર્વે એક્ઝિટ પોલનાં તારણોએ સ્પષ્ટ કરી દીધું છે કે હવે ફરી એક વાર મોદી સરકાર સત્તારૂઢ થશે. આ દરમિયાન આજે વધુ આંકડા સામે આવ્યા છે. વાસ્તવમાં ટીવી ન્યૂઝ ચેનલ ‘આજતક’એ પ્રથમવાર અનોખો પ્રયાસ કરીને જનતાને ઇ-વોટિંગની તક આપી હતી.
દેશની જનતાએ આ ઇ-વોટિંગમાં ઉત્સાહપૂર્વક ભાગ લીધો હતો અને આ ઇ-વોટિંગનાં પરિણામોમાં મોદીની સુનામી સ્પષ્ટપણે જોવાઇ રહી છે. ઇ-વોટિંગમાં ભાજપ અને તેના સાથી પક્ષોને ૩ર૬ બેઠકો મળી રહી છે. જ્યારે કોંગ્રેસ અને તેના સાથી પક્ષોને ૧૧ર બેઠકો મળશે. જ્યારે અન્ય પક્ષોને ઇ-વોટિંગમાં ૧૦પ બેઠકો મળતી દેખાય છે.
આમ હવે નરેન્દ્ર મોદીના નેતૃત્વમાં એનડીએ સરકારની વાપસી સુનિશ્ચિત છે. આજતક ઇ-વોટિંગનો આંકડો લગભગ એક્ઝિટ પોલ જેવો છે. આજતક-એક્સિસ માય ઇન્ડિયાના એક્ઝિટ પોલમાં ૩૩૯-૩૬ર બેઠકો મળવાનું અનુમાન લગાવવામાં આવી રહ્યું છે.
આજતક ઇ-વોટિંગમાં પ્રજાએ એનડીએને ૩ર૬ બેઠકો આપી છે જે સંપૂર્ણ બહુમતીથી ઘણી વધુ છે.આજતક દ્વારા ઇ-વોટિંગ ૧ર માર્ચે શરૂ થયુું હતું અને ૧૯મેના રોજ સાંજના પ-૦૦ વાગ્યા સુધી વોટિંગ ચાલુ રહ્યું હતું. ઇ-વોટિંગમાં પ૪૩ લોકસભા બેઠકો પર ર,૬૯,૪૧ર મતદારોએ ભાગ લીધો હતો.
આ ઉપરાંત કેટલાક એક્ઝિટ પોલમાં પણ એવું તારણ નીકળ્યું છે કે ભાજપ પોતાના અત્યાર સુધી ર૮ર બેઠકના રેકોર્ડને તોડીને પોતાની એકલી તાકાત પર ૩૦૦થી વધુ બેઠકો મેળવશે. શાસક એનડીએને ટાઇમ્સ નાઉ-વીએમઆર એક્ઝિટ પોલે ૩૦૬, ન્યૂઝ-ર૪- ટુડેઝ ચાણકયએ ૩પ૦, ઇન્ડિયા ટુડે-એક્સિસ માય ઇન્ડિયાએ ૩૬ર અને સી વોટરે ર૮૭ બેઠકોનું અનુમાન મૂકયું છે.
એકલા ભાજપને ૩૦૦ કે તેથી વધુ બેઠકોની આગાહી કરનાર ટુડેઝ ચાણકય અને એક્સિસ માય ઇન્ડિયાના જણાવ્યા અનુસાર યુપીમાં એસપી-બીએસપી ગઠબંધન ભાજપને રોકવામાં નિષ્ફળ રહ્યું છે.
એક્સિસ માય ઇન્ડિયાના જણાવ્યા અનુસાર યુપીની ૮૦ બેઠકોમાંથી એનડીએને ૬રથી ૬૮ બેઠકો મળી શકે છે. તેમાં એકલા ભાજપને ૬૦થી ૬૬ અને સહયોગી પક્ષ અપના દલને બે બેઠક મળી શકે છે. એસપી-બીએસપી ગઠબંધનને ૧૦થી ૧૬ અને કોંગ્રેસને ૧થીર બેઠક મળી શકે છે. આ રીતે ટુડે ચાણકય એક્ઝિટ પોલ અનુસાર યુપીમાં એનડીએને ૬પ (+૮ બેઠક) અર્થાત પ૭થી લઇને ૭૩ બેઠક મળી શકે છે.
એક્ઝિટ પોલ અનુસાર સ્પષ્ટપણે દેખાઇ રહ્યું છે કે ભાજપ નવાં રાજ્યોમાં પણ પોતાનો પ્રભાવ અને વિસ્તાર કરવામાં કામિયાબ રહ્યો છે. ખાસ કરીને બીજેડી શાસિત ઓડિશા અને તૃણમૂલ કોંગ્રેસની સરકારવાળા પશ્ચિમ બંગાળમાં ભાજપને શાનદાર સફળતા મળી રહી હોવાના સ્પષ્ટ સંકેતો એક્ઝિટ પોલમાં મળી રહ્યા છે.
પહેલેથી હિંદી ભાષી વિસ્તારોમાં મજબૂત ભાજપે હવે નવાં રાજ્યોમાં પણ બાકીના ખાસ કરીને પ્રાદેશિક પક્ષોને બેકફૂટ પર ધકેલી દીધાં છે. તેનાથી ભાજપના પ્રમુખ અમિત શાહની છબી અને ધાક વધુ મજબૂત થશે. ગુજરાત, રાજસ્થાન, મધ્યપ્રદેશ, દિલ્હી જેવાં રાજ્યોમાં પણ ભાજપ ર૦૧૪ની જેમ ક્લીન સ્વિપ કરતું દેખાય છે.