ત્રાસ / ઉત્તર ગુજરાતના ખેડૂતોના ખેતરો પર કરોડો તીડનું આક્રમણ, એકલો ખેડૂત શું કરશે?

• ઉપરથી તીડનું આક્રમણ
• જમીન પર હમદર્દીની રાજનીતિ
• ડબ્બા ખખડાવાની જામી સ્પર્ધા

બીજી તરફ સરકાર તીડ ભગાડવાના  વૈજ્ઞાનિક ઉપાયોનો પ્રસાર કરવા લાગી છે. ત્યારે આ મામલે હવે રાજકારણ શરૂ થઈ ગયું છે. થાય છે વૈજ્ઞાનિક ઢબે તીડ ઉડાવવાની વાતો પરંતુ ખેડૂતોના ખેતરમાં જઈ નેતાઓ વચ્ચે ડબ્બા ખખડાવવાની સ્પર્ધા જામી છે.
 
ખેતીને બચાવવા ખેડૂતોએ હાથ ધરી કવાયત

છેલ્લાં એક સપ્તાહથી ઉત્તર ગુજરાતના ખેતરો  અને ખેડૂતોને તીડના ટોળાઓ જાણે બાનમાં લીધા છે. કરોડોની સંખ્યામાં આવેલા તીડના આક્રમણથી પોતાની ખેતીને બચાવવાની કવાયત ખેડૂતો કરી રહ્યા છે. કોઈ ડબ્બા ખખડાવી તીડને  દૂર કરી રહ્યા છે. કોઈ પાણીનો છંટકાવ કરીને તીને દૂર રાખવા મથી રહ્યા છે. કોઈ વળી તીડથી બચાવવા પોતાના ખેતરને ઢાંકી રહ્યા છે. પરંતુ તીડનું આક્રમણ એમ ખાળી શકાય તેમ નથી. કેમ કે તીડ કરોડોની સંખ્યામાં છે અને જગતનો તાત એકલો છે.  

ખેડૂતો તીડને ઉડાડવા માટે વગાડ્યા ઢોલ નગારા અને થાળી 

એક તરફ તીડે છેલ્લા એક સપ્તાહથી ખેડૂતોના પાક પર આક્રમણ ચાલુ રાખ્યુ છે. તો બીજી તરફ ખેડૂતો પોતાનો પાક બચાવમાટે અવનવા અખતરા કરી રહ્યા છે. ત્યારે ખેડૂતો તીડને ઉડાડવા માટે ઢોલ નગારા, થાળી વગાડી રહ્યાં છે. નાના બાળકો સાથે માતા-પિતા પણ વહેલી સવારથી ખેતરોમાં પહોંચી અને તીડને ભગાડવાના કામે લાગી જાય છે ત્યોર ખેતી પર તીડના આક્રમણનો આ મુદ્દો હવે નેતાઓ માટે હમદર્દી દર્શાવવાની તક બની ગયો છે. વિધાનસભામાં હાકોટા પડકારા કરતાં નેતાઓ હવે તીડ મુદ્દે જાહેરમાં ઝઘડા કરવા લાગ્યા છે. બનાસકાંઠામાં તીડના મામલે ભાજપ-કોંગ્રેસના નેતાઓ આમને-સામને આવી ગયા.  સાંસદ પરબત પટેલ અને કોંગ્રેસના ધારાસભ્ય ગુલાબસિંહ રાજપૂત વચ્ચે જાહેરમાં બોલાચાલી થઇ.  

કેટલાક  નેતાઓ, ખેતરમાં જઈને ડબા ખખડાવીને તીડ ભગાડવાનો કર્યો દેખાડો

એક તરફ ખેડૂતો પ્રત્યે હમદર્દી  દેખાડવાની રાજકીય હોડ જામી છે. વૈજ્ઞાનિક ઢબે તીડનો પ્રતિકાર કરવાની વાતો કરતી સરકારના જ કેટલાક  નેતાઓ, ખેતરમાં જઈને ડબા ખખડાવીને તીડ ભગાડવાનો દેખાડો કરવા લાગ્યા છે. દસ દિવસથી તીડ ખેડૂતના ખેતરો સાફ કરી રહ્યા છે ત્યારે આજે હવે ભાજપના પ્રદેશ પ્રમુખ જીતુ વાઘાણીને ખેડૂતોની વહારે જવાનું મુહૂર્ત મળ્યુ હતું. જીતુ વાઘાણીએ થરાદના અંતરોલ ગામની સીમમાં જઈને ડબ્બા ખખડાવીને તીડ ભગાડવાની રાજકીય સ્પર્ધામાં ભાગ લીધો હતો.   

કોંગ્રેસે ખેડૂતોની આ અવદશા માટે સરકાર પર કર્યા પ્રહાર

એક તરફ હવે ભાજપને ખેડૂતો પર સહાનુભૂતિ જાગી છે અને તીડ ભગાડવાના કાર્યક્રમોમાં જોડાઈ ગયા છે ત્યારે મુદ્દો પોતાના હાથમાં જ રાખવા મથતી કોંગ્રેસે ખેડૂતોની આ અવદશા માટે સરકાર પર પ્રહાર શરૂ કરી દીધા છે. કોંગ્રેસ આક્ષેપ કરી રહી છે કે તીડ આવવા અંગે  સરકારને જાણ હોવા છતાં અગાઉથી કોઈ જ તૈયારીઓ રાખવામાં આવી ન હતી. 

સરકાર તીડને દૂર કરવા માટે વૈજ્ઞાનિક પગલાં ભરવાની સૂચના આપી

સરકાર તીડને દૂર કરવા માટે વૈજ્ઞાનિક પગલાં ભરવાની સૂચના આપી રહી છે. રાજકીય નેતાઓ ખેડૂતોનો પક્ષ લઈને એક બીજા પર પ્રહાર કરવામાં વ્યસ્ત છે. ખેડૂતો પર આવી પડેલી આપત્તિ સામે લડવા સરકાર પરિપત્ર કરીને શિક્ષકોને તૈયાર રહેવા સૂચના આપે છે ત્યારે લોકોના મનમાં સવાલ ઊઠી રહ્યો છે કે, પક્ષના કાર્યક્રમોમાં લાખો કાર્યકરોને એકઠા કરી શકો છો. 

તો કાર્યકરોને તીડ ભગાડવાના સેવાકાર્યમાં જોડાવા આહવાન કેમ નથી કરતાં? નેતાઓ ખેડૂતોના ખેતરમાં તીડ ભગાડવા એકલા જ કેમ જાય છે?  શું નેતાઓ  ડબા ખખડાવશે એટલે તીડ ભાગી જશે? આવા અનેક સવાલ ખેડૂતોના મનમાં ઊઠી રહ્યા છે.