કોરોના વાયરસ / લૉકડાઉનની સાઈડ ઈફેક્ટ: જાયે તો જાયે કહાં, ભૂખ્યાં-તરસ્યાં અને છોલાયેલા પગે પકડી વતનની વાટ

• કોરોનાને પગલે લૉકડાઉનની સ્થિતિમાં લોકોએ કરવી પડી હિજરત
• ઉદ્યોગો બંધ થતા હજારો શ્રમિકો બેકાર બન્યા છે
• ભૂખ્યા-તરસ્યા લોકો પગપાળા જવા મજબૂર બન્યા, કોઇના પગે છાલા પડી ગયા

એક તરફ જનતાની સુરક્ષા માટે રાજ્ય સરકારે રાજ્યને લોકડાઉન કરી નાખ્યું છે. જે રાજ્યની જનતા માટે તો સારી વાત છે. પરંતુ આ સારી વાત હજારો લોકો માટે આજે મુસિબત પણ બની ચૂકી છે. ઉદ્યોગો પણ બંધ થતા હજારો શ્રમિકો બેકાર બન્યા છે. તેઓને કંપનીઓએ રજા આપી દેતા તેમના માટે મહા મુસિબત ઉભી થઈ છે. તમામ ખાનગી અને પ્રાઈવેટ બસો અને ગાડીઓ બંધ થતા શ્રમિકોની પરિસ્થિતિ કરે તો ક્યા કરે જેવી થઇ હતી. રોજનું રોજ કમાઇને ખાતા શ્રમિકો માટે શહેરમાં રહેવું અશક્ય બન્યું. જેથી આ શ્રમિકોએ 200-200 કિલોમીટર પોતાના ઘરે જવા પગપાળા જ જવાનો નિર્ણય કર્યો. પરંતુ આ દરમિયાન તેમની ખુબજ દયનિય પરિસ્થિતિ જોવા મળી. ભૂખ્યા, તરસ્યા બસ લોકો ચાલતા જ રહ્યા.... કોઈના પગ છોલાઈ ગયા તો બાળકોને તેડી તેડીને થાક્યા પરંતુ ચાલતા જ રહ્યા... ત્યારે આ પરિસ્થિતિનું વર્ણન પણ ખુબ દયનીય છે.

મહામારીથી બચવા માટે અમદાવાદ અને ગાંધીનગર હાઈવે પર શ્રમિકો પોતાના વતન રાજસ્થાન જવા નિકળ્યા છે. તો સુરતથી સૌરાષ્ટ્ર અને અન્ય રાજ્યોમાં જવા શ્રમિકોએ પગપાળા યાત્રા શરૂ કરી દીધી છે. તો વડોદરા, વાપી સહિત અનેક જગ્યાઓ પરના કારખાનેથી શ્રમિકોએ પગપાળા યાત્રા માંડી છે. મોરબીમાંથી ગોધરાના મજૂરો વતન જવા પગપાળા નીકળ્યા છે. ત્યારે જાણો કેવી છે આ મજૂરોની રડાવી દે તેવી છે આપવીતી...

સુરતથી રાજપીપળા જતા શ્રમિક મહિલાના પગે છાલા પડી ગયા

કોઈ 100 કિલોમીટર, કોઈ 200 અને 300 કિલોમીટર દૂર આવેલા શ્રમિકો પગપાળા પોતાના ઘરે જઈ રહ્યા છે. ભૂખ્યા, તરસ્યા અને કોરોનાના જોખમ વચ્ચે વતનની વાટે ઉપડ્યા છે. મહિલાઓ, પુરૂષો અને પોતાના નાના-નાના બાળકોને તેડીને પગપાળા પોતાના ઘરે જઇ રહ્યા છે. સુરત સહિતના મોટા શહેરોમાં મજૂરી કરી રહેલા મજૂરોનું જિંદગીનું ગાડું માંડ ગબળાવતા આ આદિવાસીઓ હાલ કોરોના વાયરસને લઈને રઝળી પડ્યા છે. પરત છોટાઉદેપુર જવા ઇચ્છતા હતા પરંતુ વાહન ના મળતા ગઈકાલથી જ તેઓ ચાલતા ચાલતા છોટાઉદેપુર જવા નીકળ્યા છે. તેઓ રાજપીપળા ખાતે પહોંચે તે પહેલા જ પગે છાલા પણ પડી ગયા હતા.

કૂખમાં નાના બાળક, માથે પોટલું ઉંચકી માતા જઇ રહી છે

લોકડાઉનને કારણે વાહનો પણ બંધ હોઈ તેઓ પગપાળા વાપીથી નીકળી ઝઘડિયા પગપાળા પહોંચ્યા હતા. હતાશા ભરેલા ચહેરા સાથે પોતાની આપવીતી જણાવી રહ્યા હતા. બે દિવસથી સતત ચાલતા મજૂરો પરિવાર સાથે હેરાન પરેશાન જણાય રહ્યા હતા. માતા માથે પોતાનો સામાન અને કૂખમાં નાના બાળક લઇ, પિતાએ એક બાળકને ખભે બેસાડી બીજા હાથમાં સામાનનો થેલો પોટલું ઉંચકી લઇ જઈ રહ્યા હતા. 

તેમણે જણાવ્યું હતુ કે, તેઓ સોમવારના વાપીથી પગપાળા નીકળ્યા છે કોઈ વાહનો મળતા નથી, એટલે ચાલીને અમારા ગામડે જઈ રહ્યા છે. આશરે 100થી 200 કિલોમીટર સુધી ચાલીને આવેલ અને વતન તરફ જતા મજુર પરિવારો મુશ્કેલીમાં જણાતા હતા. ઝઘડિયા ખાતે કેટલાક મજૂરોને લોકોએ ચા-પાણી કરાવ્યા હતા. ઝઘડિયા પોલીસની મદદ વડે તેમને રાજપીપલા, બોડેલી સુધી જતા નાના મોટા વાહનોમાં બેસાડી માનવતાનો ધર્મ નિભાવ્યો હતો.

પોલીસે ભૂખ્યા લોકોના પેટની આંતરડી ઠારી

રાજ્યના હાઈવે પરની તમામ હોટેલો પણ બંધ, નાની દુકાનો પણ નથી ખુલ્લી. જેથી આ પગપાળા લોકો પેટનો ખાડો પુરે તો કેમ પુરે. બીજી તરફ કેટલાકના ખિસ્સામાં જમવાના પૈસા પણ નથી. પરંતુ કહેવાય છે ને કે ભગવાન સૌનો હોય છે ત્યારે કેટલીક જગ્યાઓ પર ભૂખ્યા લોકોની આતરડી ઠરી હતી. પોલીસે કેટલાકના ભુખ તો કેટલાકની તરસ છુપાવી હતી. તો પોતાના વતન સુધી પહોંચાડવાની વ્યવસ્થા પણ કરી દીધી હતી. 

સુરતમાં શ્રમિકોની વ્હારે આવ્યો મુસ્લિમ સમાજ

સુરતમાં શ્રમજીવી લોકોના વ્હારે મુસ્લિમ સમાજ આવ્યો છે. પગપાળા જતાં શ્રમજીવી લોકોને સેવા આપી છે. ચા, નાસ્તા, પાણીની સુવિધા સાથે વતનમાં મોકલ્યા હતા. પોલીસ-સામાજિક કાર્યકરો પણ મદદ માટે આગળ આવ્યા છે. જિલ્લાની બોર્ડર સુધી સલામત રીતે પહોંચાડાઇ રહ્યાં છે. બસ, ટેમ્પો અને ટ્રકથી બોર્ડર સુધી પહોંચી રહ્યાં છે. મુસ્લિમ સમાજે બસ, ટેમ્પો-ટ્રકમાં લોકોને માસ્ક-સેનેટાઇઝરની વ્યવસ્થા કરી આપી હતી.

વડોદરામાં પણ આદિવાસીઓના હાલ-બેહાલ

વડોદરા શહેર પોલીસ તરફથી અત્યાર સુધી લગભગ આઠસો જેટલા આદિવાસીઓ માટે વાહનની વ્યવસ્થા કરીને દાહોદ, પંચમહાલ તથા છોટાઉદેપુર તરફ મોકલવામાં આવી રહ્યા છે. આ ઉપરાંત રસ્તામાં આવતા કેટલાક મોટા ગામોના યુવાનો દ્વારા પગપાળા જઇ રહેલા પરિવારને વ્યવસ્થા કરી આપવામાં આવી રહી છે. 

VTVએ સમાજીક જવાબદારી નિભાવી

વડોદરામાં એક એવો કિસ્સો બન્યો કે સરકારી બે-બે એજન્સીઓ મદદ ના કરી શકી ત્યારે વીટીવીએ આ સમાજ સેવાને પોતાની જવવદારી સમજી અને પરિવારને તેના ગામ સુધી પહુંચાડ્યો હતો. વડોદરાની ગોત્રી હોસ્પિટલમાં દાખલ કરેલા બાળકને રજા આપી દેતા દંપત્તીને ઘરે જવું હતું પણ કોઈ વ્યવસ્થા ન હતી. તો પોલીસની મદદ માગી હતી જોકે ત્યાંથી પણ કઈ વ્યવસ્થા ના થતા VTVએ સમાજીક જવાબદારી નિભાવી અને વિનાયક સિટીબસના મેનેજરની મદદથી એમ્બ્યુલન્સની વ્યવસ્થા કરાવી આ નાના બાળકને પોતાના ઘરે પરિવાર સાથે હેમખેમ પહોંચાડ્યું હતું.

.