વડોદરા / લૉકડાઉનમાં 3 મહિનાનું ઘરનું ભાડું ન ભરી શકી તો જીજાજીએ કહ્યું, વડોદરા આવીજા કામ અપાવું અને પછી...

• લૉકડાઉનમાં નાણાંની અછતથી યુવતી કોલગર્લ બનવા મજબૂર
• યુવતીના જીજાજીએ દેહવ્યપારના વ્યવસાયમાં ધકેલી 
• યુવતી પર એક યુવકે હોટેલમાં કર્યો જીવલેણ હુમલો

25 વર્ષની રાજસ્થાનની યુવતી પર એક માથાભારે શખ્સે હુમલો કરતાં તે ગંભીર રીતે ઘાયલ થઇ છે, જોકે યુવતી હાલ હોસ્પિટલનાં બિછાને સારવાર લઇ રહી છે. પરંતુ યુવતીને હોસ્પિટલનાં બિછાના સુધી પહોંચાડવા માટે જેટલો જવાબદાર તેનાં પર હુમલો કરનાર માથાભારે શખ્સ છે તેનાં કરતાં વધારે જવાબદાર તેને અહીંયા સુધી પહોંચાડનાર તેનાં પોતાનાં જ બનેવી છે.

વાસ્તવમાં મુળ રાજસ્થાનની 25 વર્ષીય યુવતીની આ હાલત માટે લૉકડાઉનની એ પરિસ્થિતિ જવાબદાર છે જેને દેશમાં સેંકડો લોકોનો જીવ લઇ લીધો અને લાખો લોકોને આર્થિક રીતે કંગાળ કર્યા. જો કે, કોરોના જેવી મહામારીથી લોકોને બચાવવા સરકાર દ્વારા લૉકડાઉન લાગુ કરવામાં આવ્યું હતું. પરંતુ તેનું બીજું કડવું પાસું એ છે કે, આ લૉકડાઉને લોકોને આર્થિક નબળી પરિસ્થિતિમાં ધકેલી દીધાં છે. એવામાં લૉકડાઉનની મજબુરીએ એક યુવતીને દેહવ્યાપાર જેવાં અનૈતિક ધંધામાં ધકેલી દીધી હોવાનો ચોંકાવનારો કિસ્સો સામે આવ્યો છે.

બનેવીએ તેને વડોદરા લાવી દેહવ્યાપારમાં ધકેલી દીધી

રાજસ્થાનનાં જયપુરમાં રહેતી આ યુવતીની લૉકડાઉન દરમ્યાન આર્થિક પરિસ્થિતિ નબળી થઇ ગઇ હતી. જેથી આ યુવતીએ વડોદરામાં રહેતાં તેનાં બનેવી પાસે આર્થિક મદદ માંગી હતી. પરંતુ દેહવ્યાપારનાં કાળા ધંધા સાથે સંકળાયેલ ભવાનીશંકર ઉર્ફે રાજ દાયમા નામનાં તેનાં બનેવીએ તેને વડોદરા લાવી દેહવ્યાપારમાં ધકેલી દીધી. દરમ્યાન દેહવ્યાપાર માટે એક હોટલમાં ગયેલી યુવતીને એક ગ્રાહક એવાં માથાફરેલ વ્યક્તિએ હોટલમાં થયેલી તકરારમાં તેનાં પર ચાકુ વડે હુમલો કરી દીધો. એટલું જ નહીં તેનો જીવ લઇ લેવાં સુધીનો પણ પ્રયાસ કર્યો. 

હુમલો કરનાર માથાભારે શખ્સે પહેલા યુવતીના સસરાની પણ કરી હતી હત્યા

પરંતુ સદનસીબે યુવતી બચી ગઇ અને ત્યારબાદ તેને હોસ્પિટલમાં સારવાર માટે ખસેડાતાં આખીયે ચોંકાવનારી હકીકતનો પર્દાફાશ થયો. આ દરમ્યાન એ હકીકત પણ સામે આવી કે, આ યુવતી પર હુમલો કરીને ભાગેલો મિતુલ ટેલર નામનો આ માથાભારે શખ્સ એ જ હતો, જેને બાદમાં તરસાલી ખાતે તેની સાસરીમાં પહોંચી તેનાં સસરાની કરપીણ હત્યા કરી હતી અને સાસુને ગંભીર રીતે ઘાયલ કરી દીધી હતી.

યુવતીના બનેવી અને એજન્ટની ધરપકડ

ગોરવા પોલીસે ફિલહાલ આ સમગ્ર ચોંકાવનારા કિસ્સામાં યુવતીની ફરિયાદનાં આધારે તેનાં બનેવી ભવાનીશંકર દાયમા ઉપરાંત અર્જુન રાજપુત નામના એ એજન્ટની પણ ધરપકડ કરી છે, જેણે યુવતીની મજબુરીનો લાભ ઉઠાવી તેને દેહવ્યાપારની અંધકારમય દુનિયામાં ધકેલવાનો પ્રયાસ કર્યો. જ્યારે મકરપુરા પોલીસ દ્વારા ધરપકડ કરાયેલાં પોતાનાં સસરાનાં હત્યારા અને આ યુવતી પર જીવલેણ હુમલો કરનાર મિતુલ ટેલરની ધરપકડ કરવાની બાકી છે.