કોરોના વાયરસ / મહારાષ્ટ્ર જ નહીં આ રાજ્યોમાં પણ પરિસ્થિતિ બદતર, લોકોને સતાવી રહ્યો છે કડક પ્રતિબંધોનો ડર

• ભારતમાં કોરોના વાયરસની બીજી લહેર 
• એક દિવસમાં દોઢ લાખ કેસ 
• દેશના કેટલાય રાજ્યોની હાલત ખરાબ 

કોરોના વાયરસના કારણે દેશમાં પરિસ્થિતિ દિવસેને દિવસે ખરાબ થઈ રહી છે અને દરરોજ કેસની સંખ્યામાં ઉછાળો જોવા મળી રહ્યો છે. મહારાષ્ટ્રમાં કડક લોકડાઉનના ભણકારા થઈ રહ્યા છે ત્યારે દિલ્હીમાં પણ કડક નાઈટ કર્ફ્યૂ કરી દેવામાં આવી છે. યુપીના પણ કેટલાય જિલ્લાઓમાં નાઈટ કર્ફ્યૂ છે તથા 24 કલાકમાં ભારતમાં દોઢ લાખ કેસ સામે આવ્યા છે. 

ભારતમાં કોરોના વાયરસની પહેલી લહેર ચાલી રહી હતી ત્યારે તેની પિક કરતાં પણ વધારે કેસ અત્યારે સામે આવી રહ્યા છે અને કોરોના વાયરસની ચેનને તોડવા માટે રાજ્યોએ કડકાઇ દાખવી પડી રહી છે. 

કોરોના વાયરસ કેસ અપડેટ 

ભારતમાં આજે કોરોના વાયરસના નવા 1,52,879 કેસ સામે આવ્યા છે જે અત્યાર સુધીનો સૌથી મોટો રેકોર્ડ છે. કુલ કેસની સંખ્યા વધીને 1,33,58,805 થઈ ગઈ છે જ્યારે અત્યારે એક્ટિવ કેસની સંખ્યા પણ પહેલી વાર 11 લાખને પાર થઈ ગઈ છે. છેલ્લા 24 કલાકમાં કોરોના વાયરસના કારણે 839 કેસ સામે આવ્યા છે. 

મહારાષ્ટ્રમાં પરિસ્થિતિ બદતર 

કોરોના વાયરસથી સૌથી વધારે પ્રભાવિત રાજ્ય મહારાષ્ટ્ર છે જ્યાં સૌથી વધારે કેસ સામે આવી રહ્યા છે અને પરિસ્થિતિ ભયંકર થઈ રહી છે ત્યારે સીએમ ઠાકરેએ પણ કહી દીધું છે કે હવે સંપૂર્ણ લોકડાઉન સિવાય કોઈ રસ્તો બચ્યો નથી. રાજ્યમાં માનવામાં આવી રહ્યું છે કે એક અથવા બે સપ્તાહનું લોકડાઉન કરવામાં આવી શકે છે. શનિવારે મહારાષ્ટ્રમાં 55,441 કેસ સામે આવ્યા છે. 

દિલ્હી

દિલ્હીમાં શનિવારે 7,897 કેસ સામે આવ્યા છે ત્યારે મુખ્યમંત્રી કેજરીવાલે કહ્યું છે કે લોકડાઉન લગાવવા નથી માંગતા પરંતુ મજબૂરીમાં પ્રતિબંધો લગાવવામાં આવ્યા છે. તેમણે કહ્યું કે બેડની સંખ્યા ઓછી પડી જશે તો ક્યાંક લોકડાઉન ના લગાવવું પડે. નોંધનીય છે કે દિલ્હીમાં પણ વિવિધ પ્રતિબંધ લગાવી દેવામાં આવ્યા છે જેની ગાઈડલાઇન બહાર પાડવામાં આવી છે. 

યુપી-બિહાર 

ઉત્તરપ્રદેશમાં કોરોના વાયરસના કેસ રેકોર્ડજનક સ્તર પર વધી રહ્યા છે ત્યારે રાજ્યની શાળાઓને 30 એપ્રિલ સુધી બંધ કરવાનો નિર્ણય લેવામાં આવ્યો છે. આ સાથે જુદા જુદા જિલ્લાઓમાં નાઈટ કર્ફ્યૂ સહિતના કડક નિર્ણય લેવામાં આવ્યો છે. બિહારમાં પણ પહેલેથી કોરોના વાયરસના પ્રતિબંધો લગાવી દેવામાં આવ્યા છે. દુકાનોનો સમય નક્કી કરી દેવામાં આવ્યો છે જ્યારે જાહેર જગ્યાઑ માટે જુદા જુદા નિયમો બનાવી દેવામાં આવ્યા છે. 

ગુજરાતની વાત કરીએ તો મુખ્યમંત્રી રૂપાણી પહેલા જ કહી ચૂક્યા છે કે સંપૂર્ણ લોકડાઉનના પક્ષમાં તેઓ નથી. જોકે હવે લોકો સ્વયંભૂ લોકડાઉન કરી રહ્યા છે આ સિવાય જુદા જુદા શહેરોમાં તંત્ર  દ્વારા નિર્ણય લેવામાં આવી રહ્યા છે. 

ઓડિશામાં કોરોના વાયરસના કેસ વધતાં બોર્ડર સીલ કરી દેવામાં આવી છે તથા મુખ્યમંત્રીએ માસ્ક ન પહેરવા પર દંડની રકમ ડબલ કરી દીધી છે.