કર્ણાટક સરકારે ખેડૂતો, ફૂલોની ખેતી કરનારા સહિત ધોબી, વાળંદ, ટેક્સી ડ્રાઈવરને માટે રાહત પેકેજની જાહેરાત કરી છે. આ જાહેરાતના આધારે કર્ણાટક સરકાર તેમને 5000 રૂપિયાની રકમ આપશે.
કર્ણાટક સરકારે આ લોકો માટે જાહેર કર્યું રાહત પેકેજ
નાના ઉદ્યોગો માટે સરકારે જાહેર કર્યું 1610 કરોડ રૂ.નું પેકેજ
ફૂલની ખેતી કરનારા ખેડૂતો માટે 25000 રૂપિયા પ્રતિ હેક્ટર વળતર મળશે
કર્ણાટકની બીએસ યેદિયુરપ્પા સરકારે લોકડાઉનના કારણે નાના વેપારીઓ અને ખેડૂતોને સંકટથી બચાવવા માટે 1,610 કરોડ રૂપિયાના રાહત પેકેજની જાહેરાત કરી છે. કર્ણાટક સરકારનું આ રાહત પેકેજ ખેડૂતો, નાના ઉદ્યોગપતિઓ, હેન્ડલૂમ વણકરો, ફ્લોરિસ્ટ્સ, ઓટો અને ટેક્સી ડ્રાઇવરો માટે છે. આ સાથે કર્ણાટક સરકારે પણ 11 ટકા એક્સાઈઝ ડ્યુટી વધારવાની જાહેરાત કરી છે.
ફૂલોની ખેતી કરનારા માટે કરી છે આ જાહેરાત
કર્ણાટકના મુખ્યમંત્રી બી.એસ. યેદુયુરપ્પાએ કહ્યું કે માંગના અભાવે ફૂલોના નાશ કરવામાં આવી રહ્યો છે. એક અંદાજ મુજબ રાજ્યમાં લગભગ 11,687 હેક્ટરમાં ફૂલો ઉગાડવામાં આવે છે. ફૂલો ઉગાડનારાઓની સમસ્યાઓ ધ્યાનમાં રાખીને રાજ્ય સરકારે તેમને પાકના નુકસાન માટે પ્રતિ હેક્ટર 25,000 નું વળતર આપવાનું નક્કી કર્યું છે. તે ખેડૂત માટે મહત્તમ 1 હેક્ટર સુધી મર્યાદિત રહેશે. આ સિવાય શાકભાજી અને ફળો ઉગાડતા ખેડુતો તેમની પેદાશ માટે બજારમાં જઈ શકતા નથી, તેથી સરકારે તેમના માટે રાહત પેકેજની જાહેરાત કરી છે.
ધોબી અને વાળંદ માટે સરકારે લીધો આ નિર્ણય
કર્ણાટકના મુખ્યમંત્રી યેદિયુરપ્પાએ રાજ્યના ડ્રાઇવર, હેરડ્રેસર અને ધોબી સમુદાય માટે આર્થિક પેકેજની પણ જાહેરાત કરી છે. લોકડાઉનને કારણે શહેરી અને ગ્રામીણ બંને વિસ્તારોમાં વાળંદ અને ધોબીના વ્યવસાયને અસર થઈ છે. આવી સ્થિતિમાં, કર્ણાટક સરકારે પેકેજ હેઠળ આશરે 2,30,000 વાળંદ અને આશરે 60,000 ધોબીઓને વ્યક્તિ દીઠ આશરે 5-5 હજાર રૂપિયાનું એક સમયનું વળતર આપવાની જાહેરાત કરી છે.
ટેક્સી ડ્રાઈવરો માટે સરકારે લીધો આ નિર્ણય
લગભગ 7,75,000 ઓટો અને ટેક્સી ડ્રાઇવરોને પણ 5000 રૂપિયા વળતરની જાહેરાત કરવામાં આવી છે. આ સિવાય નાના અને મધ્યમ ઉદ્યોગો માટે બે મહિનાનું ફિક્સ લાઈટ બિલ માફ કરવામાં આવશે.
મુખ્યમંત્રી યેદિયુરપ્પાએ કહ્યું કે અમારી સરકારે 3500 બસો અને ટ્રેનો સાથે આશરે એક લાખ લોકોને તેમના ઘરે પાછા મોકલી દીધા છે. તેમણે કહ્યું, મેં પરપ્રાંતિય મજૂરોને કર્ણાટકમાં રોકાવાની અપીલ કરી છે કારણ કે હવે બાંધકામનું કામ ફરી શરૂ થયું છે.