ગુજરાતમાં કોરોના વાયરસ મહામારીના કાળો કહેર વર્તાય રહ્યો છે. જેને લઇને રાજ્યભરમાં લોકડાઉન જાહેર કરવામાં આવ્યું છે. રાજ્યમાં કોરોનાની સૌથી વધુ ભયંકર અસર અમદાવાદ શહેરમાં જોવા મળી રહી છે. રાજ્યભરના કોરોના પોઝિટિવ કેસોમાં સૌથી વધારે એકમાત્ર અમદાવાદમાં જોવા મળી રહ્યાં છે. કોરોના વાયરસના પોઝિટિવ કેસોની સંખ્યામાં વધારાને ધ્યાનમાં લઇને તંત્ર દ્વારા શહેરમાં લોકડાઉનનો કડક અમલ કરાવામાં આવી રહ્યો છે. આવમાં મ્યુનિ. કમિશનર મુકેશ કુમાર અને ડૉ. રાજીવ ગુપ્તાની બેઠક બાદ વધુ નિર્ણયો લેવામાં આવ્યાં છે.
અમદાવાદમાં હોમ ડિલિવરી સુવિધા શરૂ કરવાનો કરાયો નિર્ણય
કન્ટેનમેન્ટ ઝોન સિવાયના વિસ્તારમાં શરૂ કરાશે હોમ ડિલિવરી
AMC દ્વારા હોમ ડિલિવરી બોયના હેલ્થ કાર્ડ કરાશે ઈશ્યૂ
કોરોના વધતા કહેર વચ્ચે અમદાવાદ શહેરને રેડ, ગ્રીન અને ઓરેંજ ઝોનમાં વહેંચી દેવામાં આવ્યું છે. શહેરના કેટલાંક વિસ્તારોમાં કોરોના પોઝિટિવ કેસોની સંખ્યા સૌથી વધુ જોવા મળી રહી છે. તેવા વિસ્તારોમાં લોકડાઉનનો કડક અમલ કરાવા માટે પોલીસ સહિત આરપીએફ તહેનાત કરવામાં આવી છે.
અમદાવાદ શહેરમાં તંત્ર દ્વારા હોમ ડિલિવરી સુવિધા શરૂ કરવામાં આવી રહી છે. જેમાં કન્ટેન્ટમેન્ટ ઝોન સિવાયના વિસ્તારમાં હોમ ડિલિવરી સેવા શરૂ કરવામાં આવશે. અમદાવાદ મ્યુનિસિપિલ કોર્પોરેશન દ્વારા હોમ ડિલિવરી બોયને હેલ્થ કાર્ડ ઇસ્યુ કરવામાં આવશે.
અમદાવાદની મોટા ભાગની રિટેલ અને હોમ ડિલીવરી કરતી સંસ્થાઓને ડિલીવરી સ્ટાફનું સ્ક્રિનીગ કરવા સૂચના આપવામાં આવી છે. સંક્રમણ ચલણી નોટો દ્વારા ન ફેલાય તે માટે ડિજીટલ અને કેશલેશ પેમેન્ટને ફરજીયાત બનાવવામાં આવેલ છે. 15મી મેથી ડિલીવરી પર કેશ પેમેન્ટ થઇ શકશે નહી.
ડિલીવરી કરનાર વ્યક્તિ પાસે AMC નું હેલ્થ કાર્ડ અનિવાર્ય રહેશે. હેલ્થ કાર્ડની મુદત 7 દિવસની રાખવામાં આવી છે. કંટેનમેન્ટ વિસ્તારમાંથી ડિલીવરી બોય હોવો જોઈએ નહીં. હાથમોજાં, સેનિટેશન કેપ, સેનીટાઈઝર અને સોશિયલ ડીસ્ટન્સના નિયમોનું પાલન કરવું પડશે. આ સિવાય આરોગ્ય સેતુ એપ પણ ડાઉનલોડ કરવી જ પડશે.
તંત્રના ડિલિવરી બોયને ફરજિયાત સુરક્ષા સેતુ એપ ડાઉનલોડ કરવાની રહેશે. આ સાથે જ કોઈ પણ ચીજ-વસ્તુનું ડિજિટલ પેમેન્ટ આપ-લે કરવાનું રહેશે.
નોંધનીય છે કે કાગળ પર કોરોના વાયરસ ઘણા દિવસ સુધી સક્રિય રહી શકે છે તેથી AMC ની 100 ટીમ શહેરની આશરે 1700 રિટેલ દુકાનો પર જશે અને મોબાઈલ ફોનમાં ઓનલાઈન પેમેન્ટની એપ ઇન્સ્ટોલ કરાવવા માટે ટેક્નિકલ સપોર્ટ પૂરો પાડશે.