રાજકોટના અમુક વિસ્તારના વાહન ખરીદનારે મહાનગરપાલિકાને પુરાવો આપવો પડશે કે તેમના ઘરની આજુબાજુના 250 મીટર વિસ્તારમાં પાર્કિંગ છે
RMC નવી પાર્કિગ નીતિ લાગુ કરવાના ફિરાકમાં
જુઓ કયા માર્ગો પર પ્રીમિયમ પાર્કિંગ ચાર્જ લેવાશે?
રાજકોટવાસીઓએ કહ્યું આ પોલિસી માત્ર પૈસા વસૂલવા માટે છે
રાજકોટ મહાનગરપાલિકાએ 2019માં નવી પાર્કિંગ પોલિસી બનાવી હતી જે હવે લાગુ થવા માટે પ્રયાસ શરૂ કરાયા છે. મ્યુનિસિપલ કમિશનરે સ્ટેન્ડિંગ કમિટીમાં આ અંગે દરખાસ્ત કરી છે હાલ કમિટી અભ્યાસ કરી રહી છે અને બુધવારે બેઠકમાં સુધારા વધારા અંગે ચર્ચા કરાશે. હાલ તો નવી પાર્કિગ પોલિસીને લઈને રાજકોટ વાસીઓ RMCથી ખૂબ જ નારાજ છે. કહી રહ્યા છે કે આ પોલિસી માત્ર પૈસા વસૂલવા માટે છે, પહેલા મનપા યોગ્ય પાર્કિંગની વ્યવસ્થા કરે પછી પોલિસી બનાવવાનો બળાપો લોકો રાજકોટ મનપા સમક્ષ ઠાલવી રહ્યા છે.
પાર્કિગ નીતિ પર અસમંજસ
રાજકોટ શહેરમાં નવી પાર્કિંગ પોલિસી અમલી થઈ રહી છે જે મુજબ વાહન ખરીદનારે મહાનગરપાલિકાને પુરાવો આપવો પડશે કે તેમના ઘરની આજુબાજુના 250 મીટર વિસ્તારમાં પાર્કિંગ છે કે નહીં. જોકે આ નીતિ હજુ પણ રાજકોટમાં લાગુ કરવી કે નહિ તે માટે વિચાર ચાલી રહ્યો છે.
નવી પાર્કિંગ પોલિસી મુજબ મનપા ઓન સ્ટ્રીટ પાર્કિંગ માટે હવે પરમિટ આપશે અને આ પરમિટ કાર સહિતના વાહનચાલકોએ પોતાના વાહનના વીન્ડશિલ્ડ પર લગાવવાનું રહેશે. જો કોઇ વ્યક્તિ કે જેનું ઘર મુખ્યમાર્ગ પર જ છે અને અને તે રોડ પર વાહન રાખે છે તો તેને પણ ચાર્જ આપવો પડશે. એક વર્ષના એક સાથે પાર્કિંગ શુલ્કની ભરપાઈ કરાય તો 50થી 65 ટકા ડિસ્કાઉન્ટ મળશે. પાર્કિંગમાં જગ્યા છે કે નહિ તે માટે સેન્સર મુકાશે અને તેના દ્વારા કઈ સાઈટ પર કેટલી જગ્યા છે તે સેન્ટ્રલ સિસ્ટમમાં આવશે. આ જ માહિતીનો ઉપયોગ વાહનચાલકોને સાઈટ શોધવા માટે કરાશે. જેથી કરીને પાર્કિંગ સ્પેસ શોધવામાં લોકોનો સમય બગડે નહીં. જોકે તે ક્યાં સુધીમાં બની જશે તે હજુ નક્કી કરાયું નથી નવી
રાજકોટ વાસીઓ મનપાના નિર્ણય પર બગડ્યા
જોકે નવી પાર્કિંગ પોલિસીને લઈ રાજકોટ વાસીઓમાં રોષ છે તેનું સ્થાનિકોના મત મુજબ નવી પોલિસી બનાવતા પહેલા મનપાએ પાર્કિંગ અંગે યોગ્ય આયોજન કરવું જોઈએ અને ત્યાર બાદ અમલવારી કરવી જોઈએ. કોરોના કાળથી એમ જ લોકો આર્થિક રીતે ઝઝૂમી રહ્યા છે ત્યારે મોંઘવારી માં વધુ બોજ જનતા પર નખાશે તો સહન થાય તેમ નથી. રાજકોટ મનપા દ્વારા જે નવી પાર્કિંગ પોલિસી બનાવવામાં આવી છે તેનાથી ચોક્કસ પણે ટ્રાફિક નિયંત્રણ થશે પરંતુ સમસ્યાઓ અનેક છે જે જુના બાંધકામ છે ત્યાં પાર્કિંગ ની વ્યવસ્થા નથી , શહેરમાં અનેક જગ્યાએ બાંધકામના દબાણો છે જેને લીધે ટ્રાફિકની સમસ્યાઓ થઈ રહી છે શુ નવી પાર્કિંગ પોલિસી સાથે દબાણ દૂર કરવા TP શાખા કોઈ કાર્યવાહી કરશે તે જોવું રહ્યું
નવી પાર્કિંગ પોલિસીમાં શું?
નવી પોલિસી મુજબ વાહન ખરીદનારે મનપાને પાર્કિંગનો પુરાવો આપવો પડશે
ઘર આસપાસ 250 મીટર વિસ્તારમાં પાર્કિંગ છે કે નહીં તેનો પુરાવો આપવો પડશે
મુખ્ય ચોકની 30 મીટરની ત્રિજ્યામાં વાહન માટે નો પાર્કિંગ
ઝિબ્રા ક્રોસિંગ હશે તો 10 મીટર સુધી નો પાર્કિંગ
હાલ નડતરરૂપ વાહનને પોલીસ ટો કરે છે અથવા ટાયરમાં ક્લેમ્પ મારી દંડ વસૂલે છે
નવી પાર્કિંગ પોલિસીમાં મનપાને પણ આ સત્તા મળશે
મનપા ઓન સ્ટ્રીટ પાર્કિંગ માટે પરમિટ આપશે
આ પરમિટ કાર સહિતના વાહનચાલકોએ વાહનના વીન્ડશિલ્ડ પર લગાવવી પડશે
જો કોઈ વ્યક્તિનું ઘર મુખ્યમાર્ગ પર જ છે તો તે રોડ પર વાહન રાખશે તો ચાર્જ લેવાશે
વાર્ષિક પાર્કિંગ ચાર્જ ચૂકવણી પર 50થી 65 ટકા ડિસ્કાઉન્ટ મળશે
શું કહ્યું સ્ટેન્ડિંગ કમિટી ચેરમેન પુષ્કર પટેલે ?
રાજકોટ મહાનગર પાલિકાના સ્ટેન્ડિંગ કમિટીના ચેરમેન પુષ્કર પટેલે VTV સાથે ખાસ વાતચીતમાં કહ્યું કે, રાજકોટ મહાનગર પાલિકાના કમિશ્નરે પાર્કિંગ પોલીસી મુદ્દે સ્ટેન્ડિંગ કમિટીમાં દરખાસ્ત મૂકી છે.પાર્કિંગ પોલીસી માટે નિર્ણય લેવાનો છે.કોઈ ચાર્જ કે ઘર પાસે વ્હીકલ રાખવાના ચાર્જની વાત નથી. રાજકોટમાં જે પાર્કિંગ પોલીસી બનશે તે રાજ્ય સરકારમાં મંજૂરી માટે મોકલવામાં આવશે.48 જેટલા રાજમાર્ગ પર પાયલટ પ્રોજેક્ટનો અમલ કરવામાં આવશે. સ્ટેન્ડિંગ કમિટીના ચેરમેન પુષ્કર પટેલે જણાવ્યું કે, ટ્રાફિક અને પાર્કિંગની સમસ્યાને નિવારવા નવી પાર્કિંગ પોલીસી અમલમાં મુકાશે. બુધવારે સ્ટેન્ડિંગ કમિટીની બેઠકમાં ચર્ચા કરીને નિર્ણય લેવાશે.