સાબરકાંઠા / પોળો ફોરેસ્ટથી પ્રવાસીઓનો થયો મોહભંગ? ધંધા-રોજગાર પર પડી રહી છે માઠી અસર

• પોળો ફોરેસ્ટમાં પાણીના અભાવે પર્યટકોનો અભાવ
• પર્યટકોના અભાવને પગલે સ્થાનિક રોજગારને માઠી અસર
• હાલમાં પોળો ફોરેસ્ટમાં નદી-નાળાઓ ખાલી ખટ

રાજ્યભરમાં કાળઝાળ ગરમીનો કહેર જોવા મળી રહ્યો છે. ત્યારે અત્યારે આ ગરમીથી થોડી રાહત મેળવવા પર્યટકો વોટર પાર્ક, સ્વિમિંગ પુલ અથવા તો જ્યાં નદી-તળાવ કે દરિયો હોય તેવાં સ્થળોએ જઇને નાહવાનો આનંદ ઉઠાવે છે. એવામાં ગુજરાતના લોકો સાબરકાંઠામાં આવેલા પોળો ફોરેસ્ટને પણ વધારે પસંદ કરતા હોય છે. કારણ કે ત્યાં કુદરતી સૌંદર્યનો અદભુત નજારો જોવા મળતો હોય છે. પરંતુ અત્યારે આ ગરમીની સીઝનમાં ત્યાં નદી-નાળાઓ ખાલી થઇ જતા પર્યટકો જવાનું ટાળી રહ્યાં છે. જેથી ત્યાના ધંધા રોજગારને માઠી અસર પડી છે.

પ્રવાસીઓ ઘટતા મોટા ભાગના ધંધા રોજગાર બંધ હાલતમાં

ભર ઉનાળે પોળો ફોરેસ્ટમાં કુદરતી નજારો વેરાન બની ગયો છે. પાણીના અભાવે પર્યટકો ત્યાં જવાનું ટાળતા હોવાથી સ્થાનિક રોજગારને માઠી અસર થઇ છે. પર્યટકોના અભાવને પગલે ત્યાંના સ્થાનિક લોકોની આવક બંધ થઇ ગઇ છે. જેથી તેઓએ ભારે મુશ્કેલીનો સામનો કરવો પડી રહ્યો છે. પ્રવાસીઓ ઘટતા મોટા ભાગના ધંધા રોજગાર પણ બંધ થઇ ગયા છે. હાલમાં કાળઝાળ ગરમીના કારણે નદી-નાળાઓ પણ ખાલી ખટ થઇ ગયા છે.

ગ્રામીણ અને પ્રકૃતિ પ્રેમીઓ માટે મહીસાગર નદી બની આશિર્વાદ

ઉનાળાની આ કાળઝાળ ગરમીથી રાહત મેળવવા લોકો કુદરતી સ્વિમિંગ પુલ એટલે કે જ્યાં નદી કે દરિયો હોય તેવાં સ્થળોએ જઇને નાહવાનો ભરપૂર આનંદ ઉઠાવે છે. ત્યારે હાલમાં રાજ્યમાં ગ્રામીણ અને પ્રકૃતિ પ્રેમીઓ માટે મહીસાગર નદી પણ આ ધકધકતા તાપમાં આશિર્વાદરૂપ બની છે. કુદરતી સ્વિમિંગ પુલમાં નાહવાની મઝા માણવા માટે માનવ મહેરામણ ઉમટ્યું છે.
બાળકો અને પૂરા પરિવાર સાથે લોકો નદીમાં ઠંડકની મોજ માણી રહ્યાં છે. વહેતા પાણીમાં નાહવા અલગ-અલગ જિલ્લામાંથી લોકો ઉમટ્યા છે. પંચમહાલ, મહીસાગર, વડોદરા, ખેડા જિલ્લાના લોકો મહીસાગરમાં નાહવાનો આનંદ ઉઠાવી રહ્યાં છે.